په‌كه‌كه: پاراستنا شه‌نگالێ پاراستنا ئاپۆ یه!!
په‌كه‌كێ ل رۆژێن رابووری كۆنگره‌یا ب ناڤێ رێڤه‌به‌ریا خوه‌سه‌ر ئا شه‌نگالێ ل دارخست، 5 رۆژان ده‌وام كر و ئیرۆ گهیشتن ڤێ ئه‌نجامێ: «پاراستنا شنگالێ پاراستنا رێبه‌ر ئاپۆ یه» !!.
پارتیا كاركه‌ران كو ب دارێ زۆرێ و فیتا ده‌وله‌ت و هێزێن داگیركه‌ر ب ته‌یبه‌ت ئیرانێ و حه‌شدا شه‌عبی شنگال داگیركری یه، هه‌ر تشت ل ڤی په‌رچه‌یا باشوورێ كوردستانێ تێك دا، شیرازا جڤاكا ئێزدێ، ئۆلا كوردێن ره‌سه‌ن، دمۆگرافیا ناڤچه‌یێ، بژلی ته‌وانێن كو رۆژانه گه‌لێ ئێزدی ل سه‌ر ده‌ستێ وان ژیان دكن، ژ ره‌ڤاندن، ئیشكه‌نجه و چه‌كداركرنا زارۆكێن ئێزدیان، و ب كوشتن دانا وان ب ده‌ستێ ده‌وله‌تا ترك، ب كورتاسی گه‌لێ ئێزدی ژ فه‌رمانا داعشێ به‌ر ب فه‌رمانا پارتیا كاركه‌ران ڤه هاتنه.
پاش كه‌تنا شه‌نگالێ ب ساله‌كێ و ل چریا دویه‌مین یا سالا 2015ێ هێزه‌كا پێشمه‌رگه‌هان یا 7500 كه‌سی ب رێبه‌رتییا سه‌رۆك بارزانی شه‌نگال ژ زۆرا ته‌رۆرا داعشێ رزگار كر، لێ به‌لێ پشتره په‌كه‌كه هات داگیر كر و نه‌هشت ئاواره‌یێن ئێزدی كو هێژان د كامپان ده نه ڤه‌گه‌رن وارێن خوه.
په‌كه‌كه دبێژه هێژان كارێ مه د شه‌نگالێ ده خه‌لاس نه‌بوویه، یا راست كارێ وان هێژان ل ور مایه، په‌كه‌كه نها به‌شه‌كی «میحوه‌رێ مقاوه‌مێ» یه و ب فه‌رمانا ئیرانێ د شه‌نگالێ ده هه‌ولا چێكرن و پاراستنا هیلالا شیعی دكه، زارۆكێن ئێزدییان د ره‌ڤینه و ب ده‌ستێ ئارتێشا ده‌وله‌تا ترك دده كوشتن.
پرسگرێكا ئێزدییان و ئاپۆ
ب كورتاسی یا كو په‌كه‌كه نها ل شه‌نگالێ دكه ده‌واما فه‌رمانێ یه، تشتا كو داعشێ نه‌كری په‌كه‌كێ كری یه و ئیرۆ ژی هاتیه ئێزدی خاپاندنه و رێڤه‌به‌ریه‌ك ب ناڤێ رێڤه‌به‌رییا خوه‌سه‌ر ژ وار ره چێكری و ب ده‌ڤێ وان دبێژه: «پاراستنا شه‌نگالێ پاراستنا رێبه‌ر ئاپۆ و كوردستانێ یه»، لێ به‌لێ ل جیهێ ئالا كوردستانێ ئالا حه‌شدا شه‌عبی و ده‌وله‌تا ئیراقێ د هۆلا كۆنگره‌یا 5مین یا وێ رێڤه‌به‌ریێ ده دالقاندیه.
پرس ئه‌ڤه گه‌لۆ ت ئه‌له‌قه‌تا ئاپۆ ب شه‌نگالێ ڤه یه، گه‌لۆ قه‌ی دۆزا ئێزدییان و پرسگرێكان وان ئاپۆ یه، یان ڤه‌گه‌را شه‌نگالێ و ئاڤه‌دانكرنا وێ و ب داویبوونا ژیانا ئاواره‌یێ یه.
ته‌ڤی كو شه‌نگال ژ ده‌ما داعشێ و هه‌یا رۆژا مه یا ئیرۆ كاڤل و وێران مایه، ب سه‌ده‌ما په‌كه‌كێ هه‌ر رۆژ بالافرێن كه‌شفێ یێن ده‌وله‌تا ترك یا داگیركه‌ر شه‌نگالێ بۆردۆمان دكن و گه‌لێ ئێزدی تێ قه‌تل كرن، ته‌ڤگه‌را په‌كه‌كێ یا ل شه‌نگالێ، گهیشتیه ئاسته‌كی خه‌ته‌ریێ كو هه‌ر رۆژ ئاردۆگان ل ئه‌كرانان گه‌فا داگیركرنا شه‌نگالێ دخوه و دبێژه ئه‌مێ نه‌هێلن قه‌ندیله‌كه دن ل شه‌نگالێ بێ ئاڤا كرن.
به‌سێ هۆزات: شه‌نگال به‌شه‌كه ژ ئیراقێ
هێژان گۆتنا به‌سێ هۆزات یا هه‌ڤسه‌رۆكا كه‌جه‌كێ ده‌ما ل دیسامبه‌را 2021ێ ل تی ڤی یێن په‌كه‌كێ ده‌ركه‌تی و گۆتی: «شه‌نگال به‌شه‌كه ژ ئیراقێ، نه ژ هه‌رێما كوردستانێ یه» ل بیرا گه‌لێ ئێزدی و هه‌ر كورده‌كی یه، ئیرۆ ژی په‌كه‌كه هاتی یه ئێزدی خاپاندنه و ب ده‌ڤێ وان دبێژه پاراستنا شه‌نگالێ پاراستنا رێبه‌ر ئاپۆ و كوردستانێ یه.
په‌كه‌كێ ل به‌ر چاڤێ ئێزدییان شه‌نگال ژ كوردستانێ قوت كریه و كریه خانه‌دان ژ بۆی ملیسێن حزبوللاهـ، نوجه‌با و عه‌سائیب ئه‌هلولحه‌ق و ئه‌ڤ بوویه سه‌ده‌م كو 80% یا گه‌لێ ره‌سه‌ن یێ شه‌نگالێ د ئاواره‌یێ و كامپان ده بمینن.
حكوومه‌تا باشوورێ كوردستانێ و حكوومه‌تا فه‌ده‌رال یا ئیراقێ ل ئوكتۆبه‌را 2020ێ په‌یمانا شه‌نگالێ ئیمزه كر و ل گۆری وێ شه‌نگال وێ وه‌ره ئاڤه‌دانكرن و هه‌موو ئاواره‌یێن ئێزدی وێ ڤه‌گه‌رن وارێ خوه و په‌كه‌كه وێ ژ شه‌نگالێ وه‌ره ده‌رخستن و ل جیهێ وان هێزه‌كه ئه‌وله‌هیێ ژ جوانێن ئێزدییان وێ ئه‌وله‌هییا شه‌نگالێ بپارێزه، لێ به‌لێ په‌كه‌كێ نه‌هشت په‌یمان وه‌ره جیبجی كرن ژ بۆ كو بكاره ئه‌جێندایێن ده‌وله‌تا ئیرانێ و میحوه‌رێ مقاوه‌مێ ل وێ ناڤچه‌یێ جیبجی بكه.
