هەیا نها بوویەرا کوشتنا حوسەین تورەلی کو د کافەیا خوە دە ل رۆژا 17/4/2023 ل دوهۆکێ هاتیە قەتلکرن ب تەمامی نەهاتە زەلالکرن و ب دروستی خوەیا نەبوویە کێ ئەو قەتلکریە، لێ بەلێ دیسا وەکە کارێ خوە یێ هەرجار پەکەکەیا داردەستێ دەولەتا ترک ب تەڤ سازی و رێخستنێن خوە ڤە هەول ددە ژ ڤێ بوویەرێ سوود وەربگرن و دیسا بازارەکی سیاسی ب خوینا ڤی ولاتیێ باکورێ کوردستانێ بکە و د ئاڤا شوولی دە ماسیان بگرە، حوسەین تورەلی بەرا 10 سالان ژ بەر زۆلم و ستەما دەولەتا ترک و پەکەکێ ژ باکورێ کوردستانێ رەڤییا و چوو باشوورێ کوردستانێ، ل دوهۆکێ کافە-رەستۆرانتەک ڤەکر و ب ڤێ یەکێ دەبارا ژیانا خوە دکر، لێ ل دوهۆکێ ژی دەولەتا ترک و هەڤکارا وێ پەکەکێ دیسا خوەست وی ژ خوە رە بدن شوغلاندن و سیخوریێ ب وی بکن، لێ ئەو رازی نەبوو.

تەڤی کو پەکەکێ پشتی کوشتنا حوسەیین توورەلی تەنێ رۆژەکێ خوە کەڕ کر، لێ دەما دیت کو ئەو دکارە مفا ژ ڤێ بوویەرا تاری وەربگرە ب چارلەپکی خوە ئاڤێتە سەر ڤێ بوویەرێ. ھەموو سازییێن پەکەکێ د ناڤا 2 دەمژمێران دە داخویانی بەلاڤکر و دەست ب دەزەنفەرماسیۆنان کر، داخویانیێن وان هەیا نها بەردەوام دکن و دخوازن ب ڤێ یەکێ بازارەکی سیاسی ب خوینا حوسەین ژی بکن، پەکەکە ئەو رێخستنە کو ل سەر خوینێ ژیان دکە، لۆما هەر دەما خوینا کوردەکی تێ رشتن پەکەکە بازارەکی سیاسی پێ دکە و د بەرژەوەندا خوە دە بکار تینە.

داخویانیێن بێئەخلاقانە یێن پەکەکێ ل سەر ناڤێ کۆمیتەیا تێکلیێن دەرڤەیا کەجەکێ و هەڤسەرۆکاتیا کۆنسەیا رێڤەبەر ئا کەجەکێ

هەری داوی پەکەکێ ل سەر ناڤێ کۆمیتەیا تێکلیێن دەرڤەیا کۆما جڤاکێن کوردستانێ (کەجەکێ) و هەڤسەرۆکاتیا کۆنسەیا رێڤەبەر ئا کەجەکێ د ڤێ دەربارێ دە داخویانیەک وەک خوە سڤک، بێ بوها و چەپەل وەشاند، کەجەکێ د داخویانیێن خوە یێن بێ سەروبەر دە وەکە کارێ خوە یێ هەرتم و ب نەفەسەکە دوژمنکارانە پەدەکە سووچبار کر و راگهاند دەستێ پەدەکێ د هەر سوئیقەستەکی دە هەیە کو ل باشوورێ کوردستانێ بێ کرن. لێ بەلێ، یا راست ئەڤە کو هەر کەس دزانە د ناڤبەرا پەکەکێ و میتێ دە تێکلیەکا پارالێل ھەیە. ل کو دەرێ پەکەکە ھەبە، ل کێلەکا وێ میت ھەیە. ل کو دەرێ کوشتنا کوردان و داگرکرنا ئاخا کوردان هەبە دیسا پەکەکە و میتا ترک مل ب ملێ هەڤ ل ور تێن دیتن.

ھێژ کو خوینا ھوسەیین زوا نەبوویە، پەکەکێ قەتلکرنا حوسەین تورەلی ب دەرفەت دیت و جارەک دن ب ئاوایەک هۆڤانە ئێریشی سەر پەدەکێ کر، چاپەمەنیا پەکەکێ کو د بن کۆنترۆلا دەولەتێن داگیرکەر و کەسێن دژە کورد دەیە، ژ بۆ کو پەدەکێ بکە بەرپرسێ ڤێ ئێریشێ، گەلەک ھەول ددە.

ئەو بوویەرێن پەکەکێ د ڤان دو داخویانیێن ل سەر ناڤێ کۆمیتەیا تێکلیێن دەرڤەیا کۆما جڤاکێن کوردستانێ (کەجەکێ) و هەڤسەرۆکاتیا کۆنسەیا رێڤەبەر ئا کەجەکێ دە بەحس کری ب چ ئاوایی پێوەندی ب پەدەکێ ڤە نەبوون. د تەڤ بوویەرێن کو پەکەکە باس دکەت دە، بەرپرس و کوژەر دەولەتا ترک و پەکەکە ب خوەنە، پەکەکە ل هەر دەرێ ھەڤکاریێ ب پۆلیتیکایێن دەولەتا ترکێن قرکرنا کوردان رە دکە، پەکەکێ دەولەتا ترک ل تەڤ باکورێ کوردستانێ بالا دەست کر، جیهێن کو ت جاران دەولەتا ترک ب درێژاهیا دیرۆکێ نەکاریبوو داگیر بکە ب سایا سەرێ پەکەکێ تەڤ داگیر کرن، وەکە چەوا باکورێ کوردستانێ پێشکێشی دەولەتا ترکیێ کری پەکەکە دخوازە باشوور ژی ووسا پێشکێشی دەولەتا ترک بکە و ب ڤی ئاوا دەستهلاتا دەولەتا ترک ڤەگەرینا بۆ سینۆرێن میساقا میللی کو رێبەرێ پەکەکێ د هۆتەلا ئیرمالیێ دە سۆزا بجیئانینا وێ میساقێ و خزمەتکرنا ب دەولەتا ترک دایی میتێ.

بێ شەرمی و فەدی نەکرن و بێئەخلاقیا پەکەکێ تەڤ سینۆر دەرباس کرنە

بێ شەرمی و فەدی نەکرنا پەکەکێ گهایە ئاستەکی کو هەتتا ئالیکاریێن وەقفا خێرخوازی یا بارزانی ژ بۆی مەخدورێن ئەردهەژا جندرێس و عەفرینێ ل رۆژئاڤا کوردستانێ ژی وەکە خیانەت دبینە. کێ ژ بیر کربە مە ژ بیر نەکریە کو پەکەکێ چەوا ئەڤ دو باژارێن رۆژئاڤا کوردستانێ دیاری دەولەتا ترکیێ کر، ژ خوە دەما عەفرین و جندرێس د دەستێ پەکەکێ دە پەدەکە ل ور نەبوو، پەدەکە دەستهلاتدار نەبوو، هەر تشت د دەستێ پەکەکێ ب خوە دە بوو، چما پێشکێشی دەولەتا ترکیێ کر؟ هەر کەس بەرسڤێ دزانە، ژ بەر کو پەکەکە کرێگرتیا دەولەتێ یە و هەر دەرا دەولەتێ خواست داگیر بکە پەکەکێ رێ ژ بۆی ڤەدکە.

هەڤسەرۆکاتیا کەجەکێ دبێژە، “پەدەکە ب ناڤێ سازیا خێرێ ل عەفرینێ دەڤەرێن فەرمی ڤەدکە. گەلۆ ئەڤ چاوا دبە؟ گەلۆ ئەڤ نە ھەڤکاریا ب داگرکەران و قرکەرێن کوردان رەیە؟ بێگومان رایا گشتی و گەلێ کورد دزانە و دبینە کو پەدەکە ل کو دەرێ دسەکنە و چ دکە.” بەلێ ب راستی ژی بێ ئەخلاقیا پەکەکێ ت سینۆرەکی ناس ناکە، پەکەکە ب ئالیکاریێن وەقفا خێرخوازی یا بارزانی ژ مەخدورێن ئەردەهەژێ رە ئاڤس بوویە و هەما هەما وەختە کو بترکە! باشتر ئەڤە کو ل جیهێ بەرسڤدایینا ڤان بێ ئەخلاقیێن پەکەکێ هەر ب پرسێن وەک وان بەرسڤا پەکەکێ بێ دایین، گەلۆ ئەڤ چاوا نابە کو ئالیکاریا مەخدوران بێ کرن؟ گەلۆ ب راستی ژی ئەڤ هەڤکارییا ب داگیرکەر و قرکەرێن کوردان رە یان ژی ئالیکاریکرنا وان کوردانە کو پەکەکێ وەکە پەپووکان ب جی هشتی و خستیە د بن سیبەرا لوولیا چەکێ جەندرمەیێن دەولەتا داگیرکەرا ترک و پۆستالێن چەتەیان؟ بەلێ، بێگومان رایا گشتی و گەلێ کورد دزانە و دبینە کو پەدەکە ل کو دەرێ دسەکنە و چ دکە و پەکەکە ژی ل کو دەرێ دسەکنە و چ دکە.

پەکەکە-کەجەکە ژ بۆ کو تێکچوونا خوە یا ل باکور و دژمناتییا کو ل ھەمبەر کوردێن باکور کریە ڤەشێرە، ب شەڤ و رۆژ ئێریشی پەدەکێ و بارزانییان دکە

پەکەکا کو ژ رۆژا رۆژ دا ل سەر ئەساسێ کوشتنا کوردان دەرکەتیە ھۆلێ و د مەخزەنێن ئەنقەرێ دە ھاتیە دامەزراندن، 40 سالن ژ کوشتنا کوردان و وێرانکرنا ئەردنیگارییا کوردستانێ تێر نابە. کەجەکەیا کو وەک پەکەکێ ژی تێ ناسکرن و ل ئیمرالییێ ب دەستوورا ئۆجالان و میتا ترکیێ ھاتیە ئاڤاکرن، رۆژ نامینە کو ئێریشی پەدەکێ نەکە و تۆھمەتێن بێ بنگەھ نەخە ستویێ وێ. پەکەکە و کەجەکەیا کو باکورێ کوردستان وێران کریە و دەرگەڤانییا سینۆرێن داگیرکەران دکە، ھەتا ئیرۆ ل باکور کۆخکەک مریشکان ژی ئازاد نەکریە و ژ خسارێ پێ ڤە نەدایە کوردان. چ ب شەرێ خوە و چ ژی ب سیاسەتا خوە ھەر و ھەر خزمەتا پلان و پرۆژەیێن داگیرکەرێن کوردستانێ کریە و سەدەما دەرکەتنا وێ ژی ئەڤ ب خوەیە.

پەکەکە-کەجەکە ژ بۆ کو تێکچوونا خوە یا ل باکور و دژمناتییا کو ل ھەمبەر کوردێن باکور کریە ڤەشێرە، ب شەڤ و رۆژ ئێریشی پەدەکێ و بارزانییان دکە و وان وەک شریک و ھەڤکارێن دەولەتا ترک نیشان ددە. 

داخویانیا کەجەکێ تەنێ ژ دژمناھییا خەتا نەتەوی یا کورد بارزانی و پەدەکێ پێک تێ. دبە کو ئەم بزانین کو کەجەکە یان ژی ئەم ببێژین پەکەکە د ڤێ داخویانیێ دا کەرب و کین ل دژی پەدەکێ نیشاندایە. ب تاوانبارکرن و دەرەوێن بێ ئەخلاقانە ھەول دا ڤێ نەفرەتێ ئاشکەرا بکە.