Skip to contentره‌ش و سپى
گرفتا هه‌ری مه‌زن ئا پارتیێن كوردى ب گشتى و پارتییا كاركه‌رین كوردستانێ ب ته‌یبه‌ت، ته‌كه‌زا هه‌ری زێده ئا ل سه‌ر ره‌نگێن ره‌ش و سپى یه، هه‌تا نوكه ئه‌و نه‌گهیشتنه وێ باوه‌رێ كو د سیاسه‌تێ ده پڕ ره‌نگ د نێڤبه‌را ره‌نگێن ره‌ش و سپى ده نه.
هلبژارتنێن دهولهتا ترك یێن ئیسال ژ دو به‌شان پێك تێن، به‌شا یه‌كێ كو ب ده‌نگدانێ وێ سه‌رۆكه‌كی ژ بۆی تركیێ هلبژێرن و به‌شا دوویه‌مین نوونه‌رێن گه‌ل ژ بۆی پارلمه‌نتۆیێ تێن ده‌ستنیشان كرن.
د ڤێ گوتارێ ده ئه‌مێ رۆناهیێ بخن سه‌ر به‌شا یه‌كێ كو هلبژارتنا سه‌رۆكێ تركیێ یه، د ڤێ هلبژارتنێ دا چه‌ندین كه‌سان خوه كاندید كرنه، لێ هه‌ڤڕكیا دژوار د نێڤبه‌را دو كه‌سان ده یه، یه‌ك ژێ خۆ ب نوونه‌رێ ئیسلاما سیاسی دده ناسكرن كو ئه‌و ژى ره‌جه‌ب ته‌ییب ئاردۆگانه و یێ دن خوه ب نوونه‌رێ كه‌مالیزمێ دایه ناسكرن كو ئه‌و ژى كلچدارئۆغلو یه.
سه‌د سالان به‌رێ، كوردان حوكمدارییا هه‌ردو ئالیان ژیان كری یه، د سه‌د سالێن به‌رێ ده و ژ بۆی نه‌هشتنا گه‌لێ كورد، هه‌ر چ تشته‌كی ژ ده‌ستێ وان هاتبه كری یه، وان ت جاری باوه‌رى ب مافێن كوردان نه‌ئانیه و تم ب ئاوایه‌كی كورد ب تركێن چیا ناساندنه، جارانا ژی هه‌ر كورد ب مرۆڤ نه‌حه‌ساب كرنه، باشترین به‌لگه ژى ل سه‌ر ڤێ گۆتنا مه ئه‌وه ل سه‌رده‌ما حوكمدارییا ڤان هه‌ردو ئالیێن كو ئاردۆگان و كلچدارئۆغلو ته‌مسیلا وان دكن، ت باوه‌ریه‌كا وان وه‌ك گارانتۆر ب مافێن سه‌ره‌تایی یێن كوردان ژی تونه بوو، ئه‌و تیگه‌ها فكری یا كو زمانێ ته دخه ژێر پیان ئه‌وێ ل پاشه‌رۆژێ ژ بۆی گه‌لێ كورد چ بكه؟!
دهه‌لبژاتنێن ئیسال ده ژ بۆی سه‌رۆكتیا تركیێ، كورد بوونه سێ به‌ش، دابه‌شبوونا كوردان ده‌رده‌كی دویرزه‌مانه و كورد ت جاری نه‌كارینه خوه ژ ڤێ نه‌خوه‌شیێ قورتال بكن و هه‌ر ژ سه‌رده‌ما شه‌رێ چالدیران و كه‌ڤنتر، كوردان هه‌مان ده‌رد ژیان كری یه.
د ڤێ هلبژارتنێ ده ژى كوردێن كراسێ ئیسلامی ل خوه كری وێ ده‌نگى بدن ته‌ییب ئاردۆگان، ئه‌ڤ ده‌نگدایینا وان ل سه‌ر ئه‌ساسێ فكرا هه‌ڤبشه كو هه‌ردویان خوه ب ئیسلامی دانه ناساندن.
به‌شه‌كی دن یێ كوردان كو خوه ب كراسێ كوردى دانه ناسكرن كو ئه‌و ژى پارتییا كاركه‌ران په‌كه‌كه یه، ئه‌وێ ده‌نگیێ خوه بدن كلچدارئۆغلو، پرسا ل ڤر ئه‌ڤه، گه‌لۆ كلچدارئۆغلو ته‌مسیلا چینا ره‌گه‌زپه‌رستییا تركیێ دكه و ئه‌م هه‌موو ژى دزانین كانێ نه‌رینا ره‌گه‌زپه‌رستیا ترك ئا ل همبه‌ری كوردان چیه و د سه‌د سالێن رابووری ده وان چ ئانیه سه‌رێ كوردان، پارتیا كاركه‌ران ژى خوه وها دایه ناساندن كو مافێن كوردان و رزگاربوونا كوردان ژ ئارمانجێن وێ یێن سه‌ره‌كه نه، د ڤێ هاوكێشێ ده دیار دبه كو هه‌ڤدژییه‌ك دژوار هه‌یه، پرس ئه‌ڤه، قه‌ی تشتا كو ئه‌ڤ هه‌ردو هێز ژ بۆی سه‌رۆكتییا تركیێ كرن یێك چی یه؟
پشتى له‌كۆلینه‌ك درێژ گهشتینه وێ باوه‌رێ كو ده‌نگدایینا ڤێ به‌شا كوردان ژ بۆی كلچدارئۆغلو ژ بۆی ستراته‌ژییا ده‌وله‌تێن هه‌رێمی تێ و هه‌ر وها ژ بۆی نه‌رینا ڤان ده‌وله‌تان ژ بۆی قوناغا پێش مه یا برێڤبرنا دهولهتا ترك ڤه‌دگه‌ره، چا‌وا؟
كلچدارئۆغلو ب گشتى كه‌سه‌كی كو باوه‌ریه‌ك تام ب میساقا مللى و كه‌مالسیتێ هه‌یه و دیسان كه‌سه‌كی نێزى ئیرانێ یه و ئه‌و خوه ب ره‌گه‌ز ئیرانى حه‌ساب دكه و ناڤێ باپیرێ خوه ل سالا 1950 ژ قه‌مه‌رخان بۆ كلچدارئۆغلو گوهه‌راندی یه و دیسان وی باوه‌رییه‌ك تام ب مالباتا به‌شار ئه‌سه‌د و یه‌كپه‌رچه‌ییا سووریێ هه‌یه و دیسان كه‌سه‌كی نێزیكى نوورى مالكى یه و نوورى مالكى ژ وان كه‌سانه كو ته‌مسیلا فكرا شیعه‌گه‌رییا ئیرانێ ل ئیراقێ دكه.
پارتیا كاركه‌ران ل ڤێ داویێ و پشتى كو عه‌بدوللا ئۆجه‌لان كه‌تیه زیندانێ و ب ناڤێ پاردایمزمێ ستراته‌ژییا خوه ژ دهولهتا كوردى ژ بۆی براتییا گه‌لان گوهه‌راندییه و په‌سنا میسقا مللى یا تركیێ دكه و مسته‌فا كه‌مال ئه‌تاتورك ب كه‌سه‌كی ده‌مۆكراتیك دده ناسكرن و ب رییا جه‌میل باییك ته‌ڤلی ساخكرن و جیبجیكرنا هیلا شیعى بوویه و هه‌ر وها بوونه پاریزه‌رێن یه‌كپه‌رچه‌ییا سووریێ و ل شه‌نگالێ ژی بوونه شریكێن حه‌شدا شه‌عبى كو نوورى مالكى رێبه‌رتییا وان دكه.
واته د ڤێ قووناغا داویێ ده شریكێن پارتیا كاركه‌ران و كه‌مال كلچدارئۆغلو ژبۆ قووناغا پێش مه یا برێڤه‌به‌رنا دهولهتا ترك، نه‌گرێدایی مافین گه‌لێ كوردن، لێبه‌لێ گرێداى ستراته‌ژییا ئیرانێ نه.
به‌شا سێیه‌مین ئا كوردان ئه‌ون كو وێ به‌شدارى هلبژارتنان بن و ژ بۆ پارلمه‌نتۆیێ وێ ده‌نگێ خوه بده‌ن كاندیدێن راستىقینه یێن كوردان و ژ بۆی سه‌رۆكتییا تركیێ ده‌نگی نه‌دن، ئه‌ز دبینم كو نه‌رینا به‌شا سێیه‌مین كوردپه‌روه‌رانه‌یه و هه‌ری زێده وێ خزمه‌تا كوردان ژ روویێ ستراته‌ژی ڤه بكه.
