ناڤێ کو بوویە سەمبۆلا بەرخوەدانا کوردان: لەیلا
لەیلایا مە: لەیلا قاسم.
ژنا جوانا کورد لەیلا قاسم بەرێ 49 سالان د سبەھا 12 گولانا 1974 دە ژ ئالیێ رەژیما بەعس ڤە ھات سێدارەدان. دەما کو لەیلا دا هێتە سێدارەدان، گۆتە جەڵادێن خوە: “من بکوژن، لێ ڤێ راستییێ بزانن کو ب کوشتنا من دێ ب ھەزاران کورد هشیار بن. ژ بەر کو ئەز جانێ خوە ژ بۆ ئازادیا کوردستانێ فەدا دکم، پڕ کێفخوەش و شانازم.”
ژیانا خوەیا سیاسی کو وەکە لەشکەرەکی رێبازا بارزانی دەست پێ کربوو، فەدایێ گەلێ خوە کر. و وەک کو وێ کەرەم کری چێبوو. کورد ب قارامانییا وێ هشیار بوون، ھاتن ناسکرن. و گەلێ کورد ناڤێ ب ھەزاران زارۆکێن خوە کرنە لەیلا. ئەو لەیلایا مە بوو، ئەو لەیلایا کوردستانێ بوو.
مە لەیلایەکا دن ژی ھەبوو، لەیلا زانا
ژیانا وێ یا کو ل گوندێ فارقینێ یەک ژ باژارێن ھەری وەلاتپارێز یێن کوردستانێ دەست پێ کر، د ناڤا سەرھلدانێن کوردان دە لەیلا زانا بوو رەمزا وەلاتپارێزییە. لەیلا زانایێ پشتی سالا 1989 پێشەنگیا گرەڤێن برچیبوونێ، ھلبژارتن و سەرھلدانێن باکورێ کوردستانێ کر. د مەجلیسا دەولەتا ترک دە داخویانیێن کو کیمیایا کۆمارا ترک خەراب بکن دان. لەیلا ب ڤێ ھەلوەستا خوە بوو قەهرەمانەکا زندی.
خەت و رێبازا ڤان ھەر دو لەیلایان کوردەواری و کوردستانی بوو. ژ بەر ڤێ یەکێ ژی یێن کو دخوەستن ڤێ ئەفسانەیێ ب داوی بینن و وان باڤێژن ئالیەکێ کەتن ناڤا لڤ و تەڤگەرێ.
سەرکێشێ ڤان ھەولێن نەیار پەکەکە بوو
پەکەکێ ل دژی ڤێ خەتا وەلاتپارێز و نەتەوپەروەر یا ھەر دو لەیلایان دەرکەت و خوەست ڤێ ئەفسانەیێ ب داوی بینە. ژ بۆ ڤێ یەکێ ژی پەکەکێ خوەست لەیلایا خوە دەرخە پێش.
د سالا 1995 دە دەما کو لەیلا زانا خەلاتا ئاشتیێ یا ساخارۆڤ وەرگرتی ئۆجەلان گۆت دڤێت من ئەڤ خەلاتە وەرگرتبا. پشترە دەست ب تەشھیرکرنا لەیلا زانا کر.
تەڤگەرا ژنان یا پەکەکێ خەتا لەیلا زانا نێزی بارزانی و پاشڤەروو ددیت، ل گۆری وان “ھشمەندیا ژنێ یا لەیلا زانا پێش نەکەتبوو و ئەو نژادپەرەستەکا کەڤنەشووپ بوو”. ژ بۆ ڤێ ژی گەف ل لەیلا زانا کرن و ژ سیاسەتێ دوور خستن.
دووڤرا پەکەکێ ھەول دا کو لەیلایەک دن بئافرینە دا کو خەتا ھەردو لەیلایێن کوردپەروەر ژ ھۆلێ راکە. ھەری داوی ژ خوە رە لەیلا گوڤەن چێکر.
لەیلا گوڤەن د دەما پارلەمەنتەریا خوە دە ھاتبوو گرتن و ل گرتیگەھێ دەست ب گرەڤا برچیبوونێ کربوو. سەدەما گرەڤا برچیبوونێ یا کو دەست پێ کری، تەجریدا ل سەر عەڤدلا ئۆجالان بوو.
بێ گومان لەیلا گوڤەن ب تەنا سەرێ خوە ئەڤ چالاک پلان نەکربوو. سەناریۆیا ڤێ گرەڤا برچیبوونێ لگەل پەکەکێ چێکر بوو. مەبەستا ڤێ چالاکییێ ئاڤاکرنا لەیلایا پەکەکێ بوو. 8 جوانێن کورد د ڤێ چالاکییێ دە ژییانا خوە ژ دەست دا. چاپەمەنیا پەکەکێ و یا چەپێن ترک لەیلا گوڤەن وەکە لەھەنگەکا مەزن دەرخست پێش. و ئەو وەکە میناکا ژنا بەرخوەدێر دەستنیشان کر.
لەیلا گوڤەن دەما کو ھێژ د گرەڤا برچیبوونێ دە بوو ھات بەردان و چوو پارلەمەنتۆیا ترکیێ و سۆند “ل سەر یەکتیا ترکیێ” خوار. مووچەیێ خوە ژی دستاند. لەیلا گوڤەن وەک قەھرەمان ھات راگەهاندن، لێ ناڤێ وان جوانێن د قەهرا وێ دە خوە شەوتاندی نایێ زانین. پەکەکێ ژ بۆ کو لەیلایێن لەھەنگ یێن کوردان د ناڤا گەل دە بدە ژبیرکرن لەیلا گوڤەن چێکر.