نەسرەت حاجی
گەر ئەز باکوری بام و من مافێ دەنگدانێ ھەبوویا، چما ئەز دا دەنگێ خوە بدم ھاک-پارێ؟
“ئەم گەلەک جاران ھاک-پارێ رەخنە دکن و دخوازین ئەو پێتر ل سەر خەتەک نەتەوی سیاسەتێ بکن. رەخنەیێن مە نە ژ بۆ ئێشاندنا ھاک-پارێنە، ژ بۆ پێشکەتنا وانە. راستی دەما ل دیاربەکرێ ئەز ئۆتوبووسا ھاک-پارێ دبینم و سترانێن نشتمانی ب دەنگێ بلند گوھ لێ دبم ئەڤ یەک د ئالیێ هەستان دە باندۆرێ ل من دکە. ژ بۆ وێ ژی ڤەکری ئەزێ دەنگێ خوە بدم ئالای کوردستانێ و ڤان سترانێن نشتمانی کو دھێلە رۆندک ژ چاڤێن من ببارن..” ئەڤ گۆتنێن وەلاتیەکی کوردێ ژ باکورێ کوردستانێ نە.
ھاک-پار دێ وەک پارتیەکا کوردستانی بەشداری ھلبژارتنان ببە. یەکەم پارتیا کوردییە کو د پرۆپاگاندایا ھلبژارتنان دە ئەشکەرە و زەلال بەحسا مافێن گەلێ کورد دکە. ل باکورێ کوردستانێ مافێن نەتەوی یێن گەلێ کورد دپارێزە. ھاک-پار د کامپانیا خوەیا ھلبژارتنێن باکورێ کوردستانێ دە داخواز دکە کو پێکھاتەیەکا سیاسییا فەدەرال و ترکیا ببە کۆمارا فەدەرال.
ھاک-پار دخوازە زمانێ کوردی ل باکورێ کوردستانێ ببە زمانێ پەروەردەیێ و ببە زمانێ فەرمی. ب کورتی مرۆڤ دکارە ببێژە کو پرۆژەیا ڤێ پارتیێ ژ بۆ چارەسەریا پرسگرێکا کورد ل ترکیێ ھەیە و مافێن گەلێ کورد ل باکورێ کوردستانێ د پرۆژەیا خوەیا ھلبژارتنێیا ڤێ قۆناغێ دە جھ گرتیە.
مخابن ل سەر ڤێ پارتیا کوردی و بەرنامە و پرۆژەیا وێیا نەتەوی پر کێم ھات گۆتن. سەدەما سەرەکە ژی ئەوە کو پەکەکێ/ھەدەپێ کورد ئاسیمیلە کرینە و نە تەنێ ھەستا نەتەوی یا کوردان لاواز کریە، ب گشتی ل باکورێ کوردستانێ ھەستا نەتەوەیی ژی دکوژە. د ڤان سالێن داوین دە ئەڤ گۆتن ل باکورێ کوردستانێ وەک کوردستان، باکور ھاتن قەدەغەکرن. ڤێ یەکێ دکن ژ بەر کو ئەو سیاسەتەک چەپ و کەمالیست رێڤەدبن.
ل ترکیێ ملەتەکی کورد ھەیە، ل ترکیێ بەشەکێ کوردستانێ ھەیە. ل ترکیەیێ ل سەر ناڤێ گەلێ کورد گەلەک پرسگرێک ھەنە و گەلێ کورد ژ ھەموو مافێن خوەیێن بنگەھین بێپارە. کەسێ کو وسا هەست دکە و خوە ب خوەدیێ دۆزا کوردستانێ دبینە، دڤێت دەنگێ خوە بدە ھاک-پارێ. دڤێت حەژێکەرێن کورد، پارتیێن کورد و کوردستانێ و ھەموو کورد دەنگێ خوە بدن ھاک-پار. ب ڤی ئاوایی ل باکورێ کوردستانێ ھەستا نەتەوی و تەڤگەرا نەتەوی پێش دکەڤە، ئەڤ ژی ژ بۆ پاشەرۆژا پرسگرێکا کورد ل ترکیەیێ گەلەکی گرینگە.
