ھەتا ئەم چیرۆکا خوە ب خوە نەنڤیسن، دێ نێچیرڤانێن مە ببن قەهرەمان

ھەتا ئەم چیرۆکا خوە ب خوە نەنڤیسن، دێ نێچیرڤانێن مە ببن قەهرەمان

نووری چەلیک

ھلبژارتنێن سەرۆککۆماری و پارلامەنتۆیا ترکییێ ب داوی بوون. ھلبژارتنا کاندیدێن پارلامەنتۆیێ خلاس بوون، لێ ژ بەر کو چ کاندیدێن سەرۆککۆمارییێ دەنگێن پێوست وەرنەگرتن، ھلبژارتن ما گەرا دویەم، ئانگۆ 28 گولانێ. د گەرا دویەم دە کیژان نامزەد (ئەردۆگان یان کلچدارۆغلو) دەنگێن ھەری زێدە بستینە، ئەوێ ببە سەرۆککۆمار.

ل گۆر ئەنجامێن ھلبژارتنێ، هەڤپەیمانیا کۆمارێ، ئانگۆ هەڤپەیمانیا ئەردۆگان و شریکێن وی پرانییا کورسییێن پارلامەنتۆیێ ب دەست خستن. ھەگەر د ھلبژارتنا سەرۆککۆمارییێ دە سەرۆکێ جەهەپێ کەمال کلچدارۆغلو وەک سەرۆککۆمار بێ ھلبژارتن ژی (کو ئیحتیمالا مەزن دیسا دێ ئەردۆگان هێت ھلبژارتن)، دێ حکوومەت ژ ئاکەپێ و شریکێن وێ پێک هێت و دەستھلاتداری دیسا دێ د دەستێ ئاکەپێ دە بە. ژ بەر کو دێ سەرۆککۆمارییا کلچدارۆغلو سەمبۆلیک بە و دێ بریار تەڤ د مەجلیسێ دە بێن گرتن. ئاکەپە و شریکێن وێ چ بێژن، چ بریاران بدن دێ دیسا ئەو بن و ل گۆر خوە بکن. یانی، تشتەکی کو ژ بۆ مە بێ گوھەرتن تونەیە.

کەمال کلچدارۆغلو ھەم کورد بوو و ھەم ژی عەلەوی بوو. ئەڤ یەک بوو سەبەب کو پرانییا ترکێن محافازکار، نەتەوپەرەست و کەمالیست دەنگێن خوە نەدن وی. ھەر چقاسی کلچدارۆغلو کەسەکی کەمالیست بە ژی، کەمالیستبوونا وی ژ سەرکەتنا وی رە نەبوو چارە. و ھەتتا خویایە گەلەک ترکێن کو ئەندام و ئالیگرێن پارتییێن هەڤپەیمانیا وی بوون ژی دەنگێن خوە نەدانە کلچدارۆغلو.

ھەتا سیستەما ترکییێ ئەڤ سیستەم بە، ھەلبەت ژ بۆ مە کوردان فەرقا پارتییا A یان B تونەیە. تەنێ سەرکەتنا کلچدارۆغلو ھێڤییەک ددا مە کو کوردێن باکور، باشوور و رۆژئاڤا پیچەکی بێھنا خوە بستینن و ئێریشێن ل سەر وان خلاس نەبن ژی ب کێمانی کێمتر و سڤکتر ببن. لێ خویایە ب سەرکەتنا ئاکەپێ و ئەردۆگان دێ دیسا ئێریش رانەوەستن و ھەتتا زێدەتر ژی ببن. ژ بۆ تێکبرن و ئالۆزکرنا دەستکەتنێن باشوور و رۆژئاڤا چ ژ دەستێ وان بهێت دێ کن.

دبێژن ماسی ژ سەری خوە گەنی دبە. ھەدەپا کو سەرێ وێ ترک و عەرەب و بنێ وێ کوردن، ژ بەر سیاسەتا شاش، د ڤێ ھلبژارتنێ دە دەربەیەک مەزن خوار و %2 ئانکو 2 ملیۆن دەنگێن وێ کێم بوون. ھەدەپا کو حەساسییەتێن کوردان نەدایە و نادە بەر چاڤ و ھەمێ سیاسەتا خوە ل سەر دەمۆکراتیککرنا ترکییێ و چەپێن مارژینالیێن ترک ئاڤا کریە، ب ڤێ سیاسەتا خوە پێهنەک ژ کوردان خوار و خویایە د پێشەرۆژێ دە دێ ھێزا خوە کێمتر ژی بکە. یەک ژ سەدەما تێکچوونا ھەدەپێ ئەڤە بوو کو ل شوونا کوردان ترک و چەپێن ترک کرن نامزەد و کورد خستن شوونا خەشیم و نەزانان. کوردێن کو ب سالانە ب کەد و خوینا خوە بارکێشییا ھەدەپێ کرنە، دەست ب دیتنا راستییان کرنە و ئێدی ناخوازن حەمالی و بارکێشییا چەپێن ترک بکن. ب تایبەت کوردێن کو ل باژارێن مەزن یێن ترکییێ دژین د ڤێ تێکچوونێ دە رۆلەک سەرەکە دلیزن. ئێدی حەمالی و بارکێشییا چەپێن ترک، نامزەدی و سەرۆکاتییا چەپێن ترک ویژدان و خیرەتا وان دێشینە، دخوازن ڤێ تۆقا نەعلەتێ ژ ستویێ خوە دەرخن، ژ ڤی کورتانێ کو ل وان ھاتیە بارکرن خلاس ببن و دخوازن وەک کورد دیسا ڤەگەرن سەر ئەسلێ خوە. ھەگەر ھەدەپە براستی خێرخوازێ کوردان بوویا و سیاسەتەک ئاقلێ سەلیم بمەشاندا، وێ نامزەدێ خوەیێ سەرۆککۆمارییێ دەرخستا، وێ د گەرا دویەم دە ب ئاکەپێ و جەهەپێ رە بازارییەک بکرا و وێ ھنەک ماف ژ بۆ کوردان ب دەست بخستا. لێ ئەڤ یەک نەکر و د بنێ ماسێ دە خزمەتا ئاکەپێ و ئەردۆگان کر. ھەر چقاسی ب دەڤکی پشتگری دا جەهەپێ و کلچدارۆغلو ژی، ب ڤێ کریارا خوە ھەم دەستێ ئەردۆگان خورت کر، ھەم ژی ل سەر ناڤێ کوردان رێ ژ بازارییێ رە گرت.

گۆتنەک مەزنێن ئەفریقییان ھەیە دبێژە “ھەتا شێر چیرۆکا خوە نەبێژن دێ نێچیرڤان ھەر تم وەک قەهرەمانان بمینن”. خویایە ئەڤ ژی مەسەلە و پرسگرێکا مەیە، پرسگرێکەک ھەری مەزن. ھەتا ئەم کورد ب ناڤێ خوە و ب نوونەرێن خوەیێن کورد ل سەر ماسە و دەزگەھا خوە روونەنێن، وەک کورد ھەتا ئەم ب ناڤ و نوونەرێن خوە نوونەرتییا دۆز و داخوازێن خوە و ملەتێ خوە نەکن، ئەمێ ھەر و ھەر دەستڤالا ڤەگەرن و تشتەکی ب دەست نەخن. یانی، ھەتا ئەم چیرۆکا خوە ب خوە نەنڤیسن و نەبێژن، وێ نێچیرڤانێن مە (چ چەپ، چ راست، چ ئۆلدار) ل سەر پشتا مە ببن لەھەنگ.

من د نڤیسێن بەرێ دە ژی ئانیبوو سەر زمان، مەسەلە نە فلان پارتی یان بێڤان پارتییە. مەسەلە ھەست و ھەلوەستە، سەکن و کوردەوارییە، کوردستانیبوونە. کوردێن کو د ناڤ پارتییێن جودا دە بکەڤن مەجلیسێ، ھەگەر نە خوەدییێ ھەست و ھەلوەستەک کوردەواری بن، ھەگەر د مەجلیسێ دە ماف و ھەق و ھقووقێ مڵەتێ کورد نەپارێزن، فەرقا وان و وەکیلێن دن ژ ھەڤ نامینە. ھا ئاکەپی دبە، ھا جەهەپی دبە، ھا ھەدەپی و ھودا-پاری دبە بەلا ببە فەرق ناکە. یێ کو وان ژ ھەڤ جودا دکە ھەستە، ھەلوەستە، سەکن و پاراستنا مافێ ملەتێ کوردە. 

ب کورت و کورمانجی؛ رۆناھی ل پەی تارییە. ھەتا مەرڤ خوارنا تەعل نەخوە، نکارە خوارنا شیرین بخوە. دڤێت کەسایەت، رەوشەنبیر، سیاسەتمەدار، دەزگەھ و پارتییێن سیاسی ل ھەڤ روونێن، رەوشا کو ئیرۆ کورد تێ دە نە ژ سەری دە بنرخینن و بەرسڤا سەدەما تێکچوونا خوە بدن. ڤێ ھلبژارتنێ جارەک دن ئەشکەرە کر کو ھەتا وەک کورد ئەم نە تەرەفەک بن، دێ ھەرکەس ل سەر حەسابا مە ھەسپێ خوە ببەزینە.

ب ڤێ مناسەبەتێ، ژ بەر ھەست و ھەلوەستا وی، ژ بەر کورد و کوردپەروەرییا وی، د کەسایەتییا نامزەدێ جەهەپێ یێ ئامەدێ سەزگین تانرکولو دە ئەز سەرکەتنا ھەموو نامزەدێن کورد پیرۆز دکم.

پوستێن ھەمان بەش