گەلێ وارگەھا مەخموورێ دیسا ژ بەر پەکەکێ زەرەرمەند بوون، ڤێ جارێ ل دژی ئارتێشا ئیراقێ وەکە مەرتالێن زندی ھاتن بکارئانین.
ئیرۆ دانێ سبێ دەمژمێر 05:30 دە، ئارتێشا ئیراقێ دەردۆرا وارگەھا مەخموورێ دۆرپێچ کر. وارگەھا مەخموورێ ب سالانە د بن ئیدارەیا پەکەکێ دە یە و ل گۆری ئاژەندەیا خوە یا سییاسی و لەشکەر ب کار تینە.
لگۆری رەگەزێن ناڤنەتەوەیی دڤێت دەورۆبەرێن کامپێن پەنابەران بهێن دۆرپێچکرن. ھەر وھا دۆرپێچکرنا وارگەھێ زرارێ نادە گەلێ مەخموورێ، بەرۆڤاژی دێ کامپێ ژ ئێرشێن دەرڤە بپارێزە.
ھەر وھا تێ گۆتن کو ئارتێشا ئیراقێ ژ رایا گشتی رە ئەشکەرە کریە کو چما دخوازن دەردۆرا کامپێ دیوار بکن.
رایەدارێن ئیراقی: گەر کامپ ببە سڤیل دێ نەتەوەیێن یەکبوویی دیسا ڤەگەرە کامپا مەخموور.
ل گۆر ژێدەرێن خوەجھی، بەرپرسێن ئیراقی ژ مەخموورییان رە گۆتنە کو “ئەو دخوازن کامپێ بخن بن کۆنترۆلا خوە دە ژ بەر ئیحتیمالا کو ئەو کامپ ژ ئالیێ گرووپێن چەکدار ڤە تێ بکارئانین لۆما ژی دخوازن وێ کامپێ ب تەمامی بکن یا پەنابەرێن سڤیل”. لێ بەلێ ئەڤ بریارە ژ ئالیێ پەکەکێ ڤە نەھات قەبوولکرن، ژ بەر کو ئەڤ تەدبیرێن ئیراقێ دێ باندۆرێ ل خەباتێن لەشکەری یێن پەکەکێ یێن ل کامپێ بکە و پەکەکە ژ گەل خوەست کو چالاکیا روونشتنێ پێک بینن. گەل وەکە مەرتالێن زندی دھێن بکارئانین.
پەکەکە ژ بۆ پێشیلێگرتنێ ڤێ ھەولێ تەڤدگەرە
چاڤکانیێن ھەرێمی ژی دبێژن، کۆمیتەیا تێکلیێن دەرڤەیا پەکەکێ زەخت ل یەنەکێ کریە کو ل سەر ڤێ مژارێ لگەل بەغدایێ گۆفتووگۆیان بکە. ھەر وھا ھەمان کۆمیتەیێ لگەل کەسایەتی و بەرپرسێن شیعەیێن ل بەغدایێ جڤیا و ژ وان رە گۆت ئەڤ بریارا ئارتێشا ئیراقێ دێ زرارێ بدە ھەڤکاریا وانا ل شەنگال و دەردۆرا کەرکووکێ.
پەکەکە کو ب سالانە ل وارگەھا مەخموورێ ب جھ بوویە، ب تایبەتی پشتی ئێریشا داعشێ یا سالا 2014، لگەل ئیرانێ ل ھەڤ کر کو جھێ وارگەھا مەخموورێ نەگوھەرە و ھێزەکا لەشکەری ل کامپێ ب جھ بکە. د ڤێ چارچۆڤەیێ دە پەکەکێ ھێزا خوەیا لەشکەری ل مەخموورێ ل گۆری ئاژاندەیا ئیران و شیعەیان ب جھ کر. ل گۆری پەیمانا کو ژ ئالیێ پەکەکێ ڤە ھاتیە کرن دە؛ دێ ھێزا وێ یا ل مەخموورێ ژی مینا یەبەشێ یا شنگالێ ببە پارچەیەکە فەرمی یا سەر ب حەشدا شەعبی ڤە. لێ ژ بەر گوھەرینا شەرت و مەرجێن ئیراقێ ئەڤ یەک پێک نەھات. تەڤی ڤێ یەکێ ژی تێ گۆتن کو پەکەکە ل چیایێ قەرەچووخێ ل دەردۆرا کامپێ 3 تونەلێن جودا ھەنە و نێزی 150 کەس ژ ھێزا لەشکەری تێدە نە. د ناڤا کامپێ دە ھێزێن لەشکەری و سڤیل ژی ھەنە.
پەکەکە کامپا مەخموورێ وەکە رێیەکا گرینگا ل سەر خەتا سلێمانی-کەرکووک-مووسل-شنگالێ ب کار تینە.
وارگەھ وەکی ناڤەندەکە لەشکەری تێ بکارئانین
ل ڤر گەلەک کارێن نەقانوونی تێن کرن. ل باشوورێ کوردستانێ ب دەستێ ئەندامێن “یەکینەیا خوەپاراستنێ” ھنەک جینایەت ھاتن کرن. میناک پلان و فەرمانا ئێریشا 17 تیرمەھا 2019 یا ل دژی خوارنگەھا ھۆقەبازا ل ھەولێرێ ھاتی کرن و 3 کەس تێدە مری، ژ ئالیێ ڤێ یەکینەیێ ڤە ل کامپا مەخموورێ ھات رێکخستن و کوژەر رەڤییان کامپێ.
کامپ ھەما بێژە ژ ئالیێ پەکەکێ ڤە بوویە کامپا کۆمکرنێ. لڤ و تەڤگەرا خەلکێ 24 دەمژمێران ب سیستەما کامیرەیێن جێگر دهێت شۆپاندن. ل ھەموو کۆلانان کامیرە ھاتنە دانین.
پکک وارگەھا مەخموورێ فەدایی بەرژەوەندیێن خوە دکە
وارگەھا مەخموورێ ب سالان وەکە پارچەیەک ژ سیاسەتا پەکەکێ تێ بکارئانین. پرانیا کەسێن کو د سالا 1994 دە ژ بەر زەخت و زولما دەولەتا ترک رەڤیان، ل کامپێن د ناڤا سینۆرێن دوھۆک و زاخۆ دە مان. لێ پەکەکێ ژ بۆ ئەجیندایا خوەیا سیاسی کۆنترۆل ل سەر پەنابەران پێشخست و ئەو ل یەک دو جها کۆمکرن. وەکە ئەتریش، شێخان و نها ژی مەخموور. ل ناڤا کامپێ گەریلایێن خوەیێن بریندار جھ کرن و کامپ ژ بۆ کارووبارێن پارتییا خوە بکارئینا. کامپ وەک ئەنیا پاشی یا شەری ھاتە بکار ئانین. ژ بلی ڤێ ژی پەکەکێ نەھشت کو پەنابەرێن وارگەھێ ژ یاسایا دەستووری یا ڤەگەرا گوندان یا سالا 2004 سوود وەربگرە. ھنەک مال و کەسێن ب قاچاغی چوونە ترکیەیێ و فەرمییەتا خوە نوو کرن. د ناڤا جوانێن کامپێ دە ژی ھەژمارا زێدە چوون لەشکەرییا ترکان کرن و ڤەگەرییان. پرانیا کەسێن ل بەر کۆنسۆلۆسخانەیا ترکا ل ھەولێرێ ژ روونشتڤانێن وارگەھا مەخموورێ نە.
