نسرەت حاجی
ئەز ب دیتنا نڤیسکارێ کورد یێ ژ باکورێ کوردستانێ گەلەک کێفخوەش بووم، دیارییا وی یا گرانبوھا، رۆمانا (ساپۆ) ئەز کێفخوەشتر کرم. گەلەک سپاس ژ بۆ نڤیسکار کاک بووبێ ئەسەر، ھیڤیدارم د کار و خەباتێن خوە دا سەرکەفتی بە و ژ بۆنا خزمەتکرنا زمان و ئەدەبیاتا کوردی خودێ سحەتێ بدە وی.
رۆمانا (ساپۆ) کەدا نڤیسکار یا حەفت سالانە. د وارێ جڤاکی و سیاسی دا رۆمان خوەدی ناڤەرۆکەک گەلەک زەنگینە و نڤیسکار گەلەک ب شارەزایی و پسپۆری ھەر دو ئالی، یێ جڤاکی و سیاسی، ب ھەڤرا گرێدانە، لەوما دڤێت ھەر کوردەک و ب تایبەتی کوردێن باکور ڤێ رۆمانێ ب ھووری بخوینن. ئەز د وێ باوەریێ دا مە کو پشتی خوەندنا رۆمانێ دێ بەرسڤا گەلەک پرس و پرسگرێکان د مەژیێ وان دا زەلال ببە و دێ باشتر د رەوشا ئیرۆ یا کو باکورێ کوردستانێ تێدایە تێبگەھن، کا چما باکورێ وەلاتێ مە کەتیە ڤی حالی و ڤێ رەوشێ کو چ کەس حەسوودیێ پێ نابە.
ب دیتنا من گەلەک باش بوو کو رۆمانا (ساپۆ) د ڤێ دەمێ و د ڤان رۆژان دا ژ چاپێ دەرکەتی و کەتیە بەر دەستێ خوەندەڤانان. چما دبێژم گەلەک گرنگ بوو د ڤان رۆژان دا کەتە بەر دەستێ خوەندەڤانان؟ ژ بەر کو ڤان رۆژان ل ترکیێ و باکورێ کوردستانێ ھلبژارتنێن سەرۆککۆمارییێ و پەرلەمانتۆیا ترکیێ ھاتن ئەنجام دان و ژ وان ھلبژارتنان ئەنجامێن گەلەک عەجێب و خەریب دەرکەتن ھۆلێ. ئەڤ رۆمان بەرسڤا گەلەک ژ وان پرسان ددە.
ئێدی نە پێدڤی شرۆڤە و ئەنالیزێن ھێرڤە و وێڤە یە. ئێدی نە پێدڤیە کەسەک خوە بوەستینە و ل بەرسڤان بگەرە. چما کورد دەنگان ددن نەتەوەپەرەستێن ترک؟ چما کورد دەنگان ددن ئۆلدارێن ترک؟ چما کورد دەنگان ددن چەپێن کەمالیست یێن کو ب دەھان کۆمکوژی ب سەرێ گەلێ کورد ئانینە؟ چما دەنگان ددن سیاسەتا شاش یا “براتیا گەلان”؟ چما خەلکێ مە ل باکورێ کوردستانێ دەنگێ خوە نادە ئالی و رێکخستنێن وەلاتپارێز و نەتەوەیی؟ چما دەنگان نادن وان ئالیێن کو داخوازا مافێن رەوا یێن گەلێ کورد دکن؟
ئەگەر تو بخوازی بەرسڤا ڤان پرسان ھەموویان بزانی، ڤێ رۆمانێ، رۆمانا (ساپۆ) ب ھووری بخوینە.
ھوون ڤێ رۆمانێ بخوینن ھوون دێ دگەل بێریڤانان بچن بێریێ و دێ ھەنەک و لاقردیێن بێریڤانان دگەل شڤانان ب چاڤێن خوە ببینن. رۆمان دێ وە د ناڤ خوەزا و سرووشتا سپەھی، رند و دلڤەکەر یا کوردستانێ دا بگێرینە، دێ ببن شاھدێ ئەشق و ئەڤینا کەچ و خۆرتێن گوند، ئەشق و ئەڤینا بێ خش و پاقژ و ژ دل.
دەما تو دگەھی بەشێن بەری داویا رۆمانێ، تویێ خوە خۆرتەک جوان و ژێھاتی ژ خۆرتێن گوندی ببینی. ئێدی تو خۆرتەکی کو ھەستا نەتەوەیی ل جەم تە بلند و ب ھێزە، ئێدی تو ھەست پێ دکی کو وەلاتێ تە پارچەکری یە و گەلێ کورد د بن نیرێ بندەستیێ دا ژ ئێش و ئازاران دنالە. تو ب روحەک نەتەوەیی و وەلاتپارێزی داخوازا مافێن رەوا یێن گەلێ خوە یێ بندەست دکی ھەتا تو دگەل ھەڤالێن خوە یێن وەلاتپارێز دگەھن کۆپیتکا بەرخوەدانێ. د ڤێ قۆناغێ دا دەولەتا کوور حساب و ھزرەکێ ژ بۆ تە دکە و ژ تە دترسە کو تو بسەرکەڤی.
ئیجا د ڤێ قۆناغێ دا دەولەتا کوور دکەڤە تەڤگەرێ، دخوازە رێ ل بەر تە بگرە، تە ژ ناڤ ببە و ژ ھۆلێ راکە. دەولەت دبینە و دبە، دنژینە و خەراب دکە، داویێ قەھرەمانێ خوە پەیدا دکە و ساپۆ دئافرینە.
ل بەر پەرێن داوییێ ژ رۆمانێ، ساپۆ دبە قەھرەمانێ دەولەتێ، ب ئالیکاریا دەولەتا کوور دبە گورەک ھار، ھۆڤ و درندە، بەرددن گیانێ خەلکێ باکورێ کوردستانێ و دەست ب شەرێ دژی وەلاتپارێز و کوردپەروەران دکە.
ئیجا د ڤێ قۆناغێ دا، دەما گەلێ مە ل باکور گاڤان بەر ب پێش داڤێژە، رێکخستن و سازیێن خوە یێن نەتەوەیی ئاڤا دکە و داخوازا مافێن خوە یێن رەوا دکە، ساپۆ ل سەر ناڤێ کوردان و ب ئالیکاریا دەولەتێ ھەر تشتی ژ ناڤ دبە، ھەتا رۆژا ئیرۆ ژی گەلێ مە ل باکورێ کوردستانێ د بن سیاسەتا ساپۆ دا دنالە و ژ ھەموو مافێن خوە بێپار مایە.
