په‌كه‌كه باشترین چەکێ رەژیمێن داگیرکەرێن کوردستانێ یه
گەر ئەم ل چار پارچەیێن کوردستانێ ل جهێن په‌كه‌كێ بنەرن، ئەمێ چ ببینن؟ ژناڤبرنا فكرا نەتەوی، وێرانی، هه‌ژاری و کۆچبەری، هه‌ر وها کوشتن، رەڤاندن، برچیبوون، خاپاندنا زارۆكان ب سلۆگانێن وەلاتپارێزیێ، لیستنا ل سەر ئاوازێن هەستیار ژ بۆی خاپاندنا ته‌خێن كو هشمەندیا وان ئا سیاسی تونه. ژ بلی پارچەکرنا یەکتیا کوردان و ئاڤاکرنا پارتیێن کاریکاتۆری ژ بۆی بێ واته كرنا پرسگرێکا كورد، دیسان ل جهێن كو په‌كه‌كه لێ یه كریز د ناڤبەرا کوردان و پێکهاتەیێن مایی دە ده‌ردكه‌ڤن، نەفرەت و ناکۆکی به‌لاڤه، ئارامی و پێکڤەژیان تونه، دزی، تالان و گەندەلیا برێخستنکری هه‌یه، هه‌ر وها بێئەخلاقی و فوهووشێ. ئەڤ یێك، رامان و فەلسەفەیێن هەری بەربچاڤێن پارتیا وێرانکەر ئا كوردستانێ نه.
ئەگەر په‌كه‌كه بکەڤن ئەردەکی، بێیی وێرانکرنا وی جیهی ده‌رناكه‌ڤن و گەر بكه‌ڤن مالەکێ، ده‌رناكه‌ڤن هه‌یا كو هشێ خۆرت و کەچێن وێ مالێ خەراب نه‌كن، گەر ب کەسەکی رە سه‌ره‌ده‌ریێ بكن، ئه‌و كه‌س دبه دیلێ ده‌ستێ وان، ئەگەر ب پارتیەکە کوردی رە کەتنە ناڤ دانووستاندنان، پارتیێن کوردی ووسا دفكرن كو ئه‌و ب كه‌مالیستان یان ب ره‌ژیما ئیرانێ ره كه‌تنه نیقاشێ، لۆما دڤێ مرۆڤ حێبه‌تی نه‌مینه كانێ چما ره‌ژیمێن داگیركه‌ر په‌كه‌كێ ل سه‌ر پارتی و ته‌ڤگه‌رێن سیاسی یێن كوردان ته‌رجیح دكن.
د درێژاهییا شۆرەشا سووریێ ده، په‌كه‌كێ چ دا کوردان و پێكهاته‌یێن دن یێن ل رۆژئاڤا كوردستانێ؟ نێزیکی 20 هەزار خۆرت و ژن د شەرێن بێ ئەنجام دە ژیانا خوە ژ دەست دان، کین و نەفرەت د دلێ خەلکێ دە ژ بەر سیاسەتا برچیکرنێ د بن ناڤێ کوردان دە چاندن، ژ بۆی رەژیما سووریێ ل دژی ئۆپۆزیسیۆنا نەرم شەر کرن. ژ بۆ رازیکرنا ئیرانێ ل هەمبەر ئارتێشا ئازاد راوەستیان، د پێکانینا ئێریشا ترکیێ دە هنجەتێن گونجاو چێکرن.
ل باشوورێ كوردستانێ ژی، ژ بۆی به‌رژه‌وه‌ندییا خوه ب حکوومەتێن عەبادی و مالکی رە ل هەڤ کرن كو هەرێما كوردستانێ دۆرپێچ بکن و گەلێ وێ برچی بهێلن، ل دژی ئێزدیان شەر کرن و چیایێن وان و شەنگال داگیر کرن و ئالیکاریا داعشێ کرن کو خوە ئاڤا بکە و رێ نه‌دا كو ئێزدی خوه رزگار بكن.
سامانێ وەلات دزین و ب تۆنان دۆلار برن قەندیلێ، کادرۆیێن وان ب ملیۆنان ئەورۆ برن ترکیە و ئیرانێ، ئیماژه‌یه‌كا خەراب ئا جوداخوازیێ د مەژیێ عەرەب و خرستیانان دە ل هەر دەرێ چاندن، شەرێ چاندنیێ کرن و پێشی ل پیشەسازی گرت، گه‌ل خستن بن دەستێ خوە و نه‌چار كرن كو د رێڤەبەریا خوەسەر دە بخه‌بتن، رێڤه‌به‌رییا كو بریارێن وێ رۆژانە دبن سەدەما کارەسات و پرسگرێکان ل سەر ئاستا جڤاکێ ب گشتی.
ته‌ڤی ڤێ رێڤه‌به‌رییا خوسه‌ر و په‌كه‌كه ده‌ریێ سێمالكایێ ل گۆری به‌رژه‌وه‌ندییا خوه برێڤه دبن، گاڤا خوه‌ستن كریزان دئافرینن ژ بۆ كو ده‌ری وه‌ره گرتن و گه‌لێ رۆژئاڤا دبه قوربانیێ ڤێ سیاسه‌تا په‌كه‌كێ.
چاوا دبە کو ئەو هەموو دەپۆیێن خوارنێ، چیمەنتۆ و هەسنێن کو د ئاڤاهیسازیێ دە تێن بکارانین و یێن كو ژ باشوورێ كوردستانێ به‌ر ب رۆژئاڤا ڤه د ده‌ریێ سێمالكایێ ره ده‌رباس دبن، وه‌ندا ببن، ئەو تۆنێن کو د دەرگەهێ رە دەرباس دبوون ب کوو ڤە چوون؟ چما ئەو ژ نشکا ڤە وندا بوو؟ ته‌ڤێ ڤێ ب كێفا خوه رییا خه‌باتكارێن كورد دگرن، ب كورتاسی په‌كه‌كه ژ خەینی خوە کەسەکی دن ل سەر راستیێ نابینن، هەموو ئارمانج و خەونا وێ ژناڤبرنا هزرا نەتەوی یا کوردستانی یە كو هه‌مان ئارمانج و خه‌ونا ره‌ژیمێن داگیركه‌ر ه.
ئه‌ڤ هه‌موو قرێژ و سیاسه‌تا شاش یا په‌كه‌كێ ل رۆژئاڤا، ژ هێلا گه‌نه‌رالێ ساخته و له‌یستۆكا قه‌ندیلێ مه‌زلووم عه‌بدی تێ برێڤه‌برن، دڤێ مه‌زلووم ژبیر نه‌كه كو ئه‌و ل ژێر پاراستنا ئامه‌ریكایێ یه، دڤێ ئه‌و چاره‌نووسا خوه و یا گه‌لێ رۆژئاڤا ب هێلینا ئاژانێن ره‌ژیمێن داگیركه‌ر ڤه ئانكو قه‌ندیلێ نه‌گرێده، دڤێ ئه‌و ره‌حمێ ب گه‌لێ رۆژئاڤا ببه و وان زێده‌تر نه‌كه قوربانیێن ده‌ستێ په‌كه‌كێ و پیلانێن وێ یێن دژه كورد.
