بووبێ ئەسەر

دەما نھا ئەم تێ دە دژین، دەمەکە وەھایە کو راستی بوویە دەرەو، مەلاقی بوویە دلسۆزی، سیاسەت بوویە بەرژەوەندی و سڤکاتیکرن ب ھەڤ ژی بوویە کار و خەباتێن سیاسی یێن ئیرۆ ئانگۆ یێن ڤێ دەما مە.

ئەم دزانن کو ئیرۆ سیاسەتا باکورێ کوردستانێ د سالێن 1960 ھەتا یێن 1980 دە مایە. مە وەکە نفشێ وان دەمان کارێن باش ژ بۆنا گەلێ خوە کر. ژ کێ چ ھات، ھەرکەسی ل گۆر ھێز و قاوەتا خوە تەخسیر نەکرن.

دەرەو شنەکی، فەسادی و حەسوودی وێ دەمێ ب مە رە تونە بوو. لەورا ھەمی کار و خەباتێن مە تەنھا ژ بۆنا ئازادی و سەرخوەبوونا کوردستانێ بوو. مە هەموویان گەلەک نەقەبێن ئاسێ ب ھەڤرە دەرباس کرن. مە تەڤان بەدەلێن گران دان. کەسەک ژ وی نفشێ مە ل بەرژەوەندیێن خوەیێن شەخسی نەدفکرین.

ھا ئەم بێ تەجروبە بوون، کێمانیێن مە پر بوون. دەستێن تاری د ناڤا مە دە زێدە بوون. لێ ژ بەر بێ تەجروبەیێن خوە ئەم ل سەر تشتێن وەھا نەدفکرین. لۆما ئەم ھەرکەس ب کارێ خوە ڤە مژوول بوون. و مە تەڤان ژ بەر بێ تەجروبەیێن خوە ب ھەڤرە وەندا کرن.

مە ھەمیان ب فەدەکاریێن مەزن، گەلێ خوە شیار دکر و بندەستیا وی ب وی ددا زانین دا کو ئەم بکاربن ب ھەڤرە زنجیرێن داگیرکەران بقەتینن.

داگیرکەرێن مە، ژ ڤان خەباتێن مە ھایدار بوون، ئەو ژی نەدسەکنین و ل گۆر خوە کەتن ناڤا خەباتان دا کو پێشی ل وان چالاکیێن مە بگرن. لێ دیسا ئەم ب خوە نەحەسیان. مە ھەر کارێ خوە دکرن و ب باوەریا ها ئیرۆ ھا سبێ ئەمێ وەلاتێ خوە ئازاد بکن، دخەبتین.

داگیرکەران ناکۆکیێن مەزن و دژمناتیا بێ ھەمپا خستە ناڤا کوردان. ژ بەر کو وان دخوەستن ئەم ب ھەڤ داکەڤن دا کو کارێ وانی ژ بۆنا تونەبوونا جوانێن کورد ھێسان ببە. وان پر ھەول دان، لێ ب سەرنەکەتن. مەجبوور مان کۆدەتایەک لەشکەری چێ بکن دا کو وان داخوازێن خوە ئێدی ل گۆر شکلدایینا حوکمێ لەشکەرێ پێک بینن و د 12 ئیلۆنا 1980 داخوازا دەولەتێ پێک ئانین.

ھەلبەت ئەو دیرۆک و چیرۆک نە کارێ نڤیسەکێیە. دڤێت ب دەھان پرتووک بێنە نڤیسین کو نفشێ ل دوو مە دیرۆک و پێڤەژۆیا ئەم تێ دە ژیان، بزانبن و فێر ببن.

پشتی کۆدەتایا لەشکەری رەڤ و بەلاڤبوونا ھێزێن کوردستانی، بوو سەدەم کو کارێ داگیرکەران رەحەت کرن. کارێن وان رەحەت کرن دا کو ئەو ژی وان داخوازێن خوە د ناڤا جوانێن کوردان دە پێک بینن و ئانین.

ژ وەلات دوورکەتن و نەکرنا خەباتێن سیاسی، ئەم بێ تاقەت بوون، لۆما ژی ئێدی ئەم ب ھەڤ کەتن. تشتێن دژمنی دخوەست یەک ب یەک و ھێدی ھێدی بێ کو ئەم ل خوە ھای ببن پێک دھات و ھات.

تالیا تالی ئەم بوونە دژمنێ ھەڤ. ئەم بوونە فەساد و کیندارێن ھەڤ. ئەم بوونە سووجدارێن ھەڤ. مە ب ئاقلەکی سەلیم پێڤاژۆیا ئەم تێ دە دەرباس بوون، وەکە برا مە ل گەل ھەڤ موناقەشە نەکر. مە ھەرکەسی یێن ل ھەمبەر خوە تاوانبار کر. لۆما ئەو پێڤاژۆ و لیستکێن ب دەستێ دژمن کەتبوون ناڤا مە، نەھات زانین…

ئێدی کارێ مە ژ سیاسەتێ پێتر بوو کێمکرن و تاوانبارکرنا ھەڤالێن خوە. حەسوودی، فەسادی و مەلاقیا مەزن بوو کولتورا مە. ب چاندەکە وەھا ئەم ھەتا ئیرۆ ھاتن. لێ وێ چاندێ ل مە وەھا کر کو ئێدی ئەم ب ھەڤرە مژوول بوون. مە ب گۆتنێن مەزن ھەڤدو تەوان بار کرن، ھەتا گەلەکان ئەمرێ کوشتنا ھەڤالبەندێن خوەیێن دلسۆزێ گەلێ خوە ژی دان. یانی ئەم گھشتبوون رادەیەکە وەھا کو ئێدی کار و خەباتا ل دژی ھەڤ بوو پەرچەک ژ ژیانا مە.

لۆما ئەم ئیرۆ بوونە قوربانا وێ چاندا کو ئەم ژ ھەڤ خستن و نکارن بێنە با ھەڤ. ھەر چقاسی داخواز و گازیا یەکتیان بلند ژی دبە، پێک نایێ. ژ بۆنا پێکانینا وێ پێویستە ئەم بەرێ خوە ژ وێ کولتورا ب دەستێ دژمن کەتبوو ناڤا مە و بوویە پەرچەک ژ ژیانا مە، خوە دوور بخن. ئانگۆ خوە ژێ ئازاد بکن. ب ئاقلەکی سەلیم دڤێت ئەم خوە رەخنە بکن و ئوزرێ خوە ژ بەر کرنێن خوەیێن شاش، ژ گەلێ خوە و ژ ھەڤ بخوازن.

دڤێت ئێدی ئەم ب چاڤەکی برانە ل ھەڤ بنێرن. بزانبن کو ھەڤکاری، تەڤکاری و یەکیتیەک ب دەستێن وەلاتپارێز و ب بەرپرسیاریا پارتیێن کوردستانی، پێک بێ دێ د بەرژەوەندیا مە تەڤان دە بە.. ب پێک ھاتنەکە وەھا ئەمێ ھەمی ب ھەڤرە قەزەنج بکن و وێ سەرکەتن ببەیا گەلێ مە.

لێ وەکە کو قەت تشتەکە نەبوو بوو، وەکە چ کەسان کێمانی و شاشی نەکربن، ب وان کەسێن سالان دژمناتیا ھەڤ کربوون، یەکتی پێک نایێ. پێویستە ئەم ژ ڤر دە دەستپێ بکن.

چ دەما مە بەرژەوەندیا کورد و کوردستانێ د سەر ھەر تشتەکی خوە رە گرت، ئاھا ئەمێ وێ دەمێ بگێژن ئازادیێ و گاڤێن بەر ب سەرخوەبوونا گەلێ خوە ژی باڤێژن.

ب ڤێ قووشێ ئەم نکارن خوە بگێژینن مووشێ. رەفۆرمەک جدی و ل سەر خەتا نەتەوەیی ژ تەڤگەرا باکورێ کوردستانێ رە لازمە. ھەگەر ئەم د سەد سالیا لۆزانێ دە ڤێ پێک نەینن، ھەتا سەد سالەکی دن ئەمێ نکاربن بژین و ئەمێ ھەمی ب ھەڤرە وەندا بکن. ئەڤ وەنداکرن وێ نەبە وەکە یێن بەرێ. د وەنداکرنەکە وەھا دە ئێدی ئەمێ وەکە گەل و ملەتێ کورد ل باکورێ کوردستانێ نەمینن.

ژ بۆنا ئاڤاکرنا سیوانەکە نەتەوەیی دڤێت دەستپێکێ ھەرکەس حەسابا خوە بدە. کێمانی و شاشیێن خوە بێژن. نابە کو ئەم بێژن: “تشتێ چوو نەدە دوو”. ل گۆر من گاڤا ئەول دڤێ ھاک-پار، پاک، ھەرەکەتا ئازادی. کەدەپە و تەڤگەر ب شەرتێ کو ھەرکەس ب دلسۆزی، کێمانی و شاشیێن کرنە بێژن دا کو گاڤا ئەول بێ ئاڤێتن. ھەتا کو ئەڤ نەبە یەکیتیا پارتییێن کوردستانی ژی زەحمەتە کو پێک بێ و ئەز دبێژم نایێ. ھاک-پارێ د ڤێ ھلبژارتنێ دە گاڤەکە باش ئاڤێت. ئەم ڤێ ژ خوە رە بکن وەکە میلادەکە نوو و دەست ب کارێ ھەڤکاری، تەڤکاری و یەکتیێ بکن.

پێویستە رەوشەنبیر و رۆناکبیرێن کورد ژی دەستێن خوە درێژی ئالیکاریا پارتیان بکن، ھەیە. د رەوشا ئیرۆ دە بێ ئالیبوون و سەکنا چ ژ من رە فێدا خوە ژ گەلێ مە رە تونەیە.

“یان ئەمێ ببن یەک، یان ژی ئەمێ ھەرن یەک ب یەک.”