د ھلبژارتنێن سەرۆککۆماریێ و پارلەمەنتۆیا ترکیێ دە، وەک تێ زانین هەڤپەیمانیێن جودا پێکھاتن و ھلبژارتن چێبوون. ھەر پارتیەک یان ژی ئالیەک سیاسی ھەلوەستا خوە دا کفشکرن و ل گۆرا ھەلوەستا خوە تەڤگەرا. لێ راستیەک ھەبوو کو ئەڤ ھلبژارتن ژ ئالیێ کوردان ڤە و ھەلوەستا پارتیێن کو خوە کورد یان ژی کوردستانی ددن ناساندن گەلەک بالکێش بوو.
ژ بەری ھەر تشتەکی پرانی ھات دیتن کو کەتنا پارلەمەنتۆیێ “ئارمانجا سەرەکەیە” ھەروەھا ژ بۆ کەتنا پارلەمەنتۆیێ ھەموو نرخ تێکدچن “نرخێ ھەری گرینگ” کەتنا پارلەمەنتۆیێیە.
د دەربارێ ھلبژارتنان دە ھەلوەستا ھەری گرینگ و ب واتە جاردن ھەلوەستا ھاک پارێ و ئالیێن کو گاڤا یەکەم دە ل گەل ھاک پارێ ھەلوەست دایین ئەشکەرەکرنە. وەک دن لەیزتک و بزاڤێن سیاسی رۆلا سەرەکە لەیزت.
ژ ئالیەک دن ڤە ھندەک پارتیێن کوردا د سەری دە ژی پارتیا چەپێن کەسک/ھەدەپێ پشتی گەلەک چوون و ھاتنێ بریار دا کو د ھلبژارتنان دە ل ھمبەر ئەردۆگان پشتگریا کلچدارۆغلو بکە. لێ چ جارا ھەدەپێ نەکاری سەدەما ڤێ پشگریێ ئەشکەرە بکە. نھا ژی پشتی پرۆتۆکولا د ناڤبەر کلچدارۆغلو و سەرۆکێ پارتیا زەفەرێ ئۆزداگ دە ھاتی ئەشکەرەکرن، ھەدەپە جاردن ھەلوەستا خوە بەربچاڤ رە دەرباس دکە و ئیرۆ ھەلوەستا خوە ددە کەشفکرن. ھەلوەستا ھەدەپێ چبە ھێدی چ نرخێ وێ تونەیە. د راستیێ دە ڤێ جارێ ب تەمامی ھەلوەست ھەموو ژ قەندیلێ دەرکەتن و چ رۆلا ھەدەپێ نەبوو. ژ خوە چ جارا ناڤەرۆکا لھەڤھاتنا ل گەل جەهەپێ و قەندیل نەھات ئەشکەرە کرن. ھندەکا ژ ھەدەپێ دۆزا ئەشکەرەکرنا ناڤەرۆکا لھەڤھاتنا ناڤبەر ھەردو ئالیان دە کرن، لێ د جھ دە دەنگێ وان ھات برین.
ژ بەرپرسێن پەکەکێ ژ بۆ پشتگریا کلچدارۆغلو، رۆژانە داخویانی ھاتن راگھاندن. لێ ژ بلی گۆتگۆتوکان چ جاران کەسەکی بەحسا ناڤەرۆکا لھەڤھاتنا ناڤبەرا ھەدەپێ و قەندیل دە نەکر.
بنگەھا ھەدەپێ دە کەسێن کو دخوازن وەک کورد تەڤبگەرن، پرانیا وان ژ خوە ناچن سەر سەندۆقان و دەنگ نادن کلچدارۆغلو. د ناڤا وان دە ئەڤ یەک گەلەک جھان دە ڤەکری تێ گۆتوبێژ کرن.
وەک دن ھندەک پارتیێن قاشۆ کوردستانی پشتگریا خوە ژ بۆ کلچدارۆغلو دان کەشفکرن، لێ نەکارین سەدەما ڤێ یەکێ بدن کەشفکرن.
گەلۆ ژ بۆ چ ھندەک پارتیێن کورد پشتگریا کلچدارۆغلو دکن؟ ژ بۆ بەرژەوەندیا تەڤگەرا ئازادخوازا کوردایە یان سەدەمەک دن ھەیە. واتە یان ژی پشتا خوە ددن بەرژەوەندیێن کوردستانی و ژ قالبێن ئیدەۆلۆژیا کو تێدا ھاتنە مەحکوم کرن بنگەھ دگرن؟ گەلۆ ژ بۆ چ یان ژی ب چ پیڤانێ ئالیێن کورد تەرجیحەکی ناڤبەرا ئەردۆگان و کلچدارۆغلودا دکن؟ خوەزی بەرسڤا ڤێ پرسێ ب دلفرەھی بھاتا دایین.
ئەگەر کلچدارۆغلو سەربکەڤە و رۆژەک ژ رۆژا جاردن د دبستانان دە زارۆکێن کورد “سوندا مە” بخوینن و بێژن: “ئەم ترکن، راستن و ژیرن” گونەھا ڤێ ستۆیێ وان ئالیێن کوردە کو پشتگریا کلچدارۆغلو دکن. ھێدی پێویستی گۆتنەک دن تونەیە…
رۆژەڤا کورد
