ل ترکیێ و باکورێ کوردستانێ ھلبژارتن خلاسبوون. وەک تێ زانین د پێڤاژۆیا ھلبژارتنان دە گەلەک گۆتوبێژ ھاتن کرن، پرانیا پرۆپاگاندەیێن ھلبژارتنا ل سەر بنگەھێ سەختەکاری و دەرەوا ھاتە رێڤەبرن. ھەر ئالیەکی ژ بۆ سەربکەڤە ھەر رێیەک ژ بۆ خوە حەلال دیت.
د داویێ دە ئاکەپە، ئەردۆگان و هەڤپەیمانیا جومھور سەرکەتن دەستڤە ئانی. ئەردۆگان جاردن بوو سەرۆککۆمار، هەڤپەیمانیا جومھور د پارلەمەنتۆیێ دە پرانی دەستڤە ئانی و خالەک گەلەک گرینگ ئەو بوو کو ھوداپار ژی ب 4 کەسان د لستەیا ئاکەپێ دە کەتە پارلەمەنتۆیێ دە. کەتنا ھوداپارێ یا پارلەمەنتۆیا ترکیێ دە ژ بۆ پرسگرێکا کورد ژی گرینگە. دێ پێشەرۆژێ دە بێ دیتن کا گەلۆ دێ کەتنا ھوداپارێ یا پارلەمەنتۆیا ترکیێ چ کارتێکرنەکێ ل پرسا کورد بکە.
سەرکەفتنا ئەردۆگان و هەڤپەیمانیا جومھور ل گەل خوە کێشەیەک مەزن چێکر د ناڤا تفاقا ملەت، جەهەپێ و ھەدەپێ دە ژی.
هەڤپەیمانیا ملەت بەلاڤ دبە، جەهەپە ل ھەڤکەت و ھەموو ئەندامێن رێڤەبەریا جەهەپێ دەست ژ کار کێشاندن، نھا دێ دەمەک ھەری نێزک دە کۆنگرەیا خوە بجڤینە و گەلەک کلک ژ نھاڤە ژ بۆ سەرۆکاتیا جەهەپێ کار دکن.
ژ ئالیەک دن ھەدەپە ژی جارا یەکەمە ب ئاوایەک ئەشکەرە د ناڤا خوە دە ل سەر ئەنجاما ھلبژارتنا و تایبەتی ل سەر نە سەرکەفتنا خوە گۆتوبێژا دکن. بوتێ ھەدەپێ دەمیرتاش ڤەکری رەخنە ل رێڤەبەریا ھەدەپێ دکە و ب ئاوایەکی خوە ژ سیاسەتا چالاک دا ئالیەکی. قەندیلا کو ب ھەموو ئیمکانێن خوە پشگری ددا کلچدارۆغلو بێ دەنگ مایە و نزانە چ بێژە. گەلەک کەس د ناڤا جەهەپێ دە دبێژن ژ خوە قەندیل سەرێ کلچدارۆغلو خوار.
ژ ئالیێ کوردان ڤە بێ دەنگی ھەیە، لێ گەرەک کورد باش تێ بگھن کو ئێدی ھەدەپە رۆژ ب رۆژ ژ پرسا کورد دوور دکەڤە و دێ پێشەرۆژێ دە ببە پارتیەک ڤەدەر یا چەپێن ترکا. ژ ئالیەک دن ڤە چارەنووسا سەلاحەدین دەمیرتاش ژی دبە وەکە لەیلا زانا و عۆسمان بایدەمیر و گەلەک کەسایەتێن دن. ھێڤی ئەوە کو کەسێن د ناڤا ھەدەپێ دە کوردن و پرسا کورد دپارێزن ڤێجا راستیا ھەدەپێ/پەکەکێ و سیاسەتا ترکبوونێ ببینن و رێیەکی ژ خوەرە ھلبژێرن و بەرێ خوە بدن خەتەک نەتەوی.
تێکچوونا ھەگەمۆنیا ھەدەپێ و شکەستنا باندۆرا پەکەکێ ل سەر کوردا، دێ رێیا کوردا ڤەکە و کورد دێ پێتر بکاربن ل نرخێن خوەیێن نەتەوی خوەدی دەرکەڤن. پەکەکە و ھەموو رێخستن و ئالیێن گرێدایی ڤێ سیاسەتێ د رێیا دەستکەفتیێن مافێ نەتەوییێن کوردان دە ئاستەنگن.
رۆژەڤا کورد
