ھەڤسەرۆکێن ھەدەپێ پەرڤین بولدان و میتحات سانجار تەڤلی بەرنامەیەکا تەلەڤزیۆنا پەکەکێ بوون و د دەربارێ پێشەرۆژا خوە دە ئاخڤین.
سانجار گۆت: د کۆنگرەیا کو دێ هێت لدارخستن ئەم نابینە بەربژێرێن ھەڤسەرۆکاتیێ. مە بریار دا کو ئەم د کۆنگرەیێ دە ئەرکەک نوو وەرنەگرن. ئەم دێ ئەرکا خوەیا ھەڤسەرۆکاتیێ ژ بۆی ھەڤالێن دن بھێلن.
تێ زانن کو د پێڤاژۆیا ھلبژارتنان دە ڤێ جارێ ژ دەستھلاتداریا ھەدەپێ پێتر راستە راست قەندیل کەت د ناڤا بازاران دە و گەلەک ڤەکری پێ ل سەر بولدان و سانجار دانا. لێ وان نەوێریان دەنگ دەرخن و نھا ژی جاردەک دن ب دەستیریا قەندیلێ دخوازن بچن. د پێڤاژۆیا ھلبژارتنان دە د ناڤا ھەدەپێ دە تایبەتی د ناڤا کوردێن وەلاتپارێزێن د ناڤا ھەدەپێ دە گەلەک رەخنە ل ڤان ھەردو ھەڤسەرۆکا ھاتنە گرتن. ژ بەر کو ب تەمامی بێ ئنسیاتیف بوون. ھەدەپێ بێ قەید و شەرت یان ژی ب بازارەک ڤەشارتی پشتگریا کلچدارۆغلو کر. ژ بۆ ڤێ ژی گەلەک کەسان د ناڤا ھەدەپێ دە ئەڤ یەک پرۆتەستۆ کر و ژ بۆ کلچدارۆغلو نەچوون سەر سەندۆقا و دەنگ نەدان.
دەمەکی ھەدەپێ دا خویاکرن کو ئەو دخوازن ژ بۆ سەرۆککۆماریێ کاندیدێ خوە دەرخن. سەردانا دەمیرتاش کرن و پشتی سەردانێ بەرپرسێن ھەدەپێ گۆتن: ئەم چوون سەردانا دەمیرتاش مە پێشنیار کر کو ئەو ببە کاندیدێ ھەدەپێ یێ سەرۆککۆماریێ. لێ وی قەبوول نەکر.
پشتی ھلبژارتنا دەما دەمیرتاش دا خوویاکرن کو ئەو دەست ژ سیاسەتا چالاک بەرددەت، گۆت: من پێشنیا کر کو ئەز ببم کاندیدێ سەرۆککۆماریێ، لێ ھەدەپێ قەت بەرسڤەک نەدا من. نھا کی راست دبێژە، کی دەرەوا دکە نایێ زانین. لێ ئەشکەرەبوو کو ھەلوەستا ھەدەپێ یا ژ کوردەیاتیێ دوور بوو سەدەمەک کو ڤێجارێ بنگەھێ ھەدەپێ دەنگێ خوە بلند بکە. د مەدیا جڤاکی دە بەشەک ژ ھەدەپەئیان ب دەنگێ بلند داخواز دکران کو بولدان ژ ھەڤسەرۆکیێ دوور بکەڤە.
نھا ژی بولدان و سانجار ھەولددن کراسەکی ژ بۆ چووینا خوە کەر بکن. د بەرنامەیا تەلەڤزیۆنی دە بولدان گۆت: د داخویانیا کو مە رۆژا پشتی ھلبژارتنێ دایی دا، مە راگھاند کو ئەم دێ پارتیێ ببن کۆنگرەیێ. ژ بەر کو ئارمانجێن مە پێک نەھاتن، پارتیا مە پشتی ھەڤدیتنێن ل گەل کۆمیتەیێن مە دێ چیت کۆنگرەیێ. د ھەر قۆناغەکە ڤێ تێکۆشینێ دە ئەز ئامادەمە کو تشتا بکەڤیتە ل سەر ملێ من پێک بینم، لێ ب بەرچاڤگرتنا ھەموو رەخنەیان، ئەز دێ د ڤێ کۆنگرەیێ دە پۆستا ھەڤسەرۆکاتیێ ب سەربلندی بدم ھەڤالەکی خوەیێ دن. د پێڤاژۆیا کۆنگرەیێ دە ئەز بەشداری چ مەکانیزمایێن بریاران نابم. د ڤێ قۆناغێ دە، بەرپرسیاریا مە ھەیە کو ئەم حەساب بدن. ئەم ھەما یەکسەر ناچن ئەم دێ پێشی حەسابێ بدن. ئەم دێ ل ھەمبەری گەلێ خوە، ل ھەمبەری دەنگدێرێن خوە و ل ھەمبەری ژنان حەساب بدن. ب من مژارا ھەری گرینگ ئەڤە.
ژ ئالیێ دن ڤە سانجار د دەربارێ ھەلوەستا دەمیرتاش دە گۆت: “دەمیرتاش ھەڤال و رێھەڤالەکی پر ھێژایە. نە تشتەکە کو ئەم راست ببینن کو ئەم نیەتا وی بپرسن. مە سەردانا دەمیرتاش کر، گۆت ئاستەنگیا وی یا یاسایی ھەیە و پشترە ژ چاپەمەنیێ رە ڤەگۆت. پشترە ئەم چوون کاندرایێ و مە پێشنیارێن فیگەن یوکسەکداگ و گولتان کشاناک وەرگرتن. پێشنیار کرن کو ئەگەر بەربژێرەک ھەبە، بلا ژنەک ببە بەربژێر. مە ئەڤ پێشنیار د کۆمیتەیێن خوە دە گۆتووبێژ کر. د خالا داوی دە مەیلا دەرخستنا ژنەکێ ھەبوو. ئەڤ یەک ژ دەمیرتاش رە ھات راگھاندن و وی ژی گۆت کو ئەو پشتگری ددە ڤێ فکرێ.”
دخوەیە ئێدی ھندەک تشت ژ کۆنرۆلا قەندیل ژی دەردکەڤە. کوردێن وەلاتپارێز د ناڤا ھەدەپێ دە ڤێجا یاریێن ل سەر چارەنووسا کوردا تێن کرن دبینە و نھا ژی ھەولددە ژ چەپێن مارژینالێن ترک ب ئاوایەکی ھەدەپێ دوور بخە. د پێشەرۆژێ دە ئەمێ ببینن کا گەلۆ ئەڤ خەلکێ دۆزا گوھەرتنا دکن، دێ بێنە تەسفییە کرن یان ھەدەپە پیچەکی بیت ژی بەر ب کوردەیاتیێ ڤە دچە.
لێ چ ببە بلا ببە گۆتارەک کەڤنارا کوردا دبێژە: پشتی ترێ ……..فایدە ناکە!
رۆژەڤا کورد
