هەورام مەریوان
ئەڤ چەند رۆژن ھێزێن پاسدارێن ئیرانێ ب چەکێن گران کو د مەھا بۆری دە ژ ناڤچەیێن دن ڤەگوھەستبوون رۆژهلاتێ کوردستانێ، ئێرشی چیا و ژینگەھا ڤێ بەشا کوردستانێ دکە و باس ل ڤێ یەکێ تێ کرن کو قاشۆ ئەڤ ئێریش بۆ سەر گەریلایێن پەژاکێ نە.
د ڤێ گۆتارێ دە، ئەز وەک کەسەکی کو شەهرەزایی چەوانیا ئاڤاکرنا پژاکێ و تێکلیێن پەکەکێ و رەژیما ئیرانێ و ھەر وھا ھەرێما کو ئیران ئێرشی وێ دکە، ئەزێ ھەول بدم ب کورتی سەدەمێن ڤێ ئێرشێ و ئارمانجێن رەژێما ئیرانێ ژ ڤێ ئێریشێ باس بکم.
چیایێ کۆسالان کو ل نێزیکی زنجیرە چیایێ شاھۆ و د ناڤبەرا باژارێن سنە و مەریوانێ یێن رۆژھلاتێ کوردستانێ دەیە و دکەڤە ناڤچەیا باژارۆکێ سەولاوا، یەک ژ چیایێن ھەری ستراتەژیکێن ھەرێمێیە کو بەردەوام سەنگەرا پێشمەرگەیێن رۆژهلاتێ کوردستانێ بوویە و ل کۆسالان هێزا پێشمەرگە جۆش و خرۆشەک مەزن ل دژی چەکدارێن ئیرانێ ئەنجام دایە. خەلکێ رۆژھلاتێ کوردستانێ ب گشتی و پارێزگەھا سنە ب تایبەتی ژی دروشمەک ل سەر جۆش و خرۆشا پێشمەرگەیان ل کۆسالانێ ھەیە کو دبێژن: “کۆسالان ژ ئەڤەرەستێ بلندترە”. د ھەمان دەمێ دە وەکە ھەموو سالێن بۆری، ل گۆری خوەزایا کوردستانێ، بھار و ھاڤین دەمسالا دەستپێکرنا چالاکیێن پێشمەرگەیە و د راستیێ دە یێک ژ سەدەمێن کو رەژێما ئیرانێ کۆسالان کریە ئارمانج و دخوازە ژناڤ ببە، ژ بۆی ڤێ یەکێ ڤەدگەرە.
گەلۆ پژاک ل کۆسالانێ شەرێ ئیرانێ دکە؟
ئەگەر ئەم ل دیرۆک، چەوانی و سەدەمێن دامەزراندنا پژاکێ بنەرن، ئەم دبینن کو دامەزراندنا پژاکێ بەرھەما رێکەڤتنا ستراتەژیکا د ناڤبەرا سەرکردەیێن پەکەکێ و رەژیما ئیرانێ دە بوو و هەر دو ئالیان کۆمەک مفا ژ ڤێ لهەڤهاتنێ ب دەست خستنە. ل سەر وێ رێکەفتنێ ھێزێن پژاکێ ب ئاوایەکی ئەشکەرە ل چەند جھێن رۆژھلاتێ کوردستانێ ب جھ بوونە و د ناڤ وان دە ژی ل چیایێ شاھۆ. یەک ژ ئارمانجێن بجھکرنا گەریلایێن پژاکێ ل چیایان ژی ئەو بوو کو رێگریێ ل ھەر چالاکیەکا پێشمەرگەیێن ھێزێن نشتمانپەروەرێن رۆژھلاتێ کوردستانێ بکە. ھەر چەند مەبەستا ڤێ گۆتارێ نە بەحسکرنا چاوانیا دامەزراندنا پژاکێ و سەدەما دامەزراندنا پژاکێ بە ژی، لێ دڤێ وەرە گۆتن کو یەک ژ ئارمانجێن رەژیما ئیرانێ ژ دامەزراندنا باسکێ رۆژھلاتی یێ پەکەکێ گوھەرتنا رێیا تەڤگەرا نەتەوەیی بوو، دخوەست ب ڤێ رێیێ هێزا رزگاریخوازا کوردستانێ کۆنترۆل بکە و بکت کەنالەکی دە کو بکارە بەرێ وێ بدە هەر ئالیەکی کو ئەو دخوازە و هەر دەما خوەست ژی بێ دەنگ بکە، ئەڤ کەنال ژی پەکەکە بوو.
سەرھلدانا شۆرەشا ژینا ل رۆژھلاتێ کوردستانێ کو ل سەرانسەرێ ئیرانێ بەلاڤ بوو، نیشان دا کو رەژیما ئیرانێ د ئاڤاکرنا پژاکێ دە ئەڤ ئارمانجا خوە ب دەست نەخستیە و نەتەوەخوازیا کوردان ل رۆژهلات هێزەک زێدەتر وەرگرتیە و نە ب تەنێ د ناڤا کوردێن رۆژهلات دە بەلکو رۆلا رێبەریکرنا بزاڤا نەتەوەیی یا د ناڤا نەتەوەیێن دن یێن بن دەستێن ئیرانێ یێن وەکە بەلووچ، عەرەب و ھتد دگێرە. یەک ژ سەدەمێن سەرەکەیێن کێمبوونا باندۆرا پژاکێ د ناڤا کوردێن رۆژھلاتێ کوردستانێ دە، تێگھیشتنا رایا گشتییا کورد ل سەر تێکلیێن پەکەکێ/پژاک و رەژیما داگیرکەرا ئیرانێیە، بەرپرسێن رەژێمێ ژی ژ بۆ کو ڤێ راستیێ سەختە بکن، خوەزایێ کوردستانێ ددن بەر ئاگرێ چەکێن گران و دبێژن ئەم ل دژی پژاکێ شەر دکن.
ل گۆر زانیاریێن کو خەلکێ ھەرێمێ و چاڤکانیێن نووچەیان یێن رۆژھلاتێ کوردستانێ ل سەر تۆرێن جڤاکی بەلاڤ کرنە، د ئێریشێن رەژیما ئیرانێ دە ب تەنێ سوپایێ تەرۆریستێن پاسدارێن ئیرانێ ب چەکێن خوەیێن گران، ب ئاوایەکی یەکالی چیایان دکە ئارمانج، و گەلێ رۆژهلات باس ل ڤێ یەکێ دکە کو ژ ئالیێ بەرامبەر “پژاک” دەنگێ چ تەقەیەکێ نایێ بهیستن و ئەڤ شەر وەکە شەرەکی دو ئالی نایێ دیتن. ئانکو گەر ئەم وسا بفکرن شەرەکی راست د نێڤبەرا رەژێما ئیرانێ و پژاکێ دە هەیە، ئەم شاش دفکرن، ژ بەر کو ھەموو گەلێ رۆژھلاتێ کوردستانێ دزانە کو بارەگەھێن پژاکێ ل رۆژھلاتێ کوردستانێ دکەڤن کیژان ناڤچەیان و گەر ئیران بخوازە شەرێ پژاکێ بکە پێویستی ب ڤێ بۆمبەبارانا چیایێن کوردستانێ نیە و راستەراست دکارە بچە سەر تەڤ بنگەهێن پژاکێ کو ب کێفا دل خوە چێکرنە و تێدە دمینن.
د راستیێ دە ئارمانجا راستەقینە یا رەژێما ئیرانێ ژ ڤان ئێریشان، شەر کرن ل دژی پژاکێ نینە، بەلکو هندەک ئارمانجێن دن هەنە کو ئەم دێ ل ڤر باس بکن.
ئارمانجێن راستەقینە یێن رەژێما ئیرانێ ژ ئێریشێن ل سەر چیایێ کۆسالان
دیارە دڤێت ئەم ژ بیر نەکن کو رەژیما ئیرانێ ھەر چەند سالان جارەکێ شەرەکێ ساختە ل دژی پەکەکێ و پژاکێ دکە، ئەڤ شەر گەلەک جاران ژ بۆ پەیداکرنا ھنجەتەکێ ژ بۆ داگیرکرنا ناڤچەیەکا ستراتەژیکا کوردستانێ وەکە تەپێ جاسووسان بوویە، یانژی دخوازە ب ڤی ئاوایی سەرنجا گەل ل سەر تێکلیێن د نێڤەبرا پەکەکێ و تەهرانێ دوور بکە و ژ ئالیەکی دن وەکە چەکوچەکی ل سەر سەرێ پەکەکێ بە ژ بۆی کو وسا نەفکرە د بن فەرمانا ئیرانێ دەربچە.
گەر ئەم لێ بنەرین ئێریشێن ڤێ جارێ یێن رەژیما ئیرانێ کو دبێژە ئەم ل دژی پژاکێ ڤان ئێریشان ئەنجام ددن، د دەمەکێ دە یە کو ھلبژارتنێن ترکیێ ب داوی ھاتنە، پەکەکە د ھلبژارتنان دە راستی شکەستەکە مەزن ھاتیە و ئەو ھێڤیێن کو ل سەر ئەنجامێن ھلبژارتنان ئاڤاکری ژ بۆ دەرباسکرنا رەوشا خوەیا خەرابا لەشکەری ژ دەست دانە. مورات کارایلان کو یەک ژ رێڤەبەرێن پایەبلندێن پەکەکێیە، د رۆژێن پشتی سەرکەتنا ئەردۆگان دە ب ئاوایەکی ڤەکری راگھاند کو ئەم ژ ھەر تشتی رە ئامادە نە و چرا کەسک ژ بۆ دەستپێکرنا ھەڤدیتنان ب حکوومەتا ئاکەپێ رە ڤێخست. د ڤێ ناڤبەرێ دە پەکەکێ ئەڤ دەمەک بوو ئاگربەستا یەکالی ئیلان کربوو و ب هەموو شێوەیان ل دووڤ هێنجەتەکێ دگەریا کو ژ بۆ جارەکە دن دیسا ڤێ ئاگربەستێ درێژ بکە. د ناڤا دەولەتا ترک دە ژی نێرینەک ھەیە کو لێچوونا شەرێ ل دژی پەکەکێ لێچوونەکە ئابۆرییا زێدەیە کو بێیی ت بەرژەوەندی زەختێ ل ئابۆریا ترکیێ دکە.
ھەلبەت ئیران ناخوازە وەک بەرێ ترکیە و پەکەکە لھەڤ بکن و پەکەکێ ژی ئەو قاس خزمەتا بەرژەوەندیێن ئیرانێ کریە کو بەرپرسێن مەزن و بچووکێن ئیرانێ ناخوازن ڤێ کارتا گرانبھا ژ دەست بدن. ژ بەر ڤێ یەکێ ئەڤ ئێریشێن ئیرانێ ژ بۆ پەکەکێ وەکە ھشیاریەکێ تێ دیتن کو بلا هزر د دانوستاندنێن لگەل ترکیەیێ دا نەکە. مە دیت کو دەما ئێریشێن ئیرانێ دەست پێ کرن، پەکەکێ یەکسەر راگھاند کو ئاگربەست راکرنە. مەنتق دبێژیتە مە کو ئەڤە نە تەسادوف بوو.
وەکە کو بەرێ ژی ھات بەھسکرن، یەک ژ ئارمانجێن رەژیما ئیرانێ ژ دامەزراندنا پژاکێ وەک باسکێ پەکەکێ ل رۆژھلاتێ کوردستانێ ئەو بوو کو ئەنەرژیا سیاسییا کوردێن رۆژھلات بەر ب پەکەکێ ڤە ببە، کو ب ھێسانی بکارە وێ کۆنترۆل بکە. لێ بەلێ د شۆرەشا ژینا ئەمینی دە درووشمێن گەلێن رۆژھلات یێن وەکە “کوردستان، کوردستان، گۆرستانا فاشیستان”، “ھەتا کورد ھەبە وێ کوردستان بمینە”، “داگرکەرێ ئیرانێ تو کوژەرێ ژینا ئەمینی”، “ژن ژیان، رانەوەستان، سەرخوەبۆنا کوردستان” و هود… دەرکەت ھۆلێ کو ل رۆژھلاتێ کوردستانێ نێرینا نشتمانی و نشتمانپەروەری نێرینا سەردەستە و رەژیما ئیرانێ نەکاریە ڤێ ئارمانجێ پێک بینە. شۆرەشا ژینا ئەمینی ئیسپات کر کو خەتا پەکەکێ ل رۆژھلات خوەدی ھەلوەستەکە گەلێری و بباندۆر نینە و د راستیا خوە دە رەژیما ئیرانێ ب ڤی شەرێ سەختە دخوازە د قادا سیاسییا رۆژھلات دە پژاکێ پێتر بەرچاڤ بکە.
سەدەمەکە دنا هایدارکرنا پەکەکێ ژ ئالیێ رەژیما ئیرانێ ڤە ژی ئەوە کو ئیرانێ تێگھیشتنەکە کوور ل سەر پەکەکێ ھەیە و دزانن کو پەکەکێ بەروپشت ژ ت کەسی رە نینە و ئەگەر بزانە کو رەژیما ئیرانێ بەر ب رووخاندنێ ڤە دچە، پر ب ھێسانی دکارە پشتا خوە بکە ئیرانێ. ب تایبەتی نێزیکبوونا پژاکێ ژ ھێزێن نشتمانییێن رۆژھلاتێ کوردستانێیێن وەک حدکا و کۆمالە رە کو ب ئارمانجا ژ ھەڤ جوداکرنا باسکێ نەتەوییێ پژاکێ ژ پەکەکێ برێڤە دچە، ئەو ترس و خۆف د دلێ رەژیمێ و پەکەکێ دە چێکریە کو کوردێن رۆژهلات یێن د ناڤا رەفێن پەکەکێ دە ئاراستێ خوە ژ سیاسەتا دژە کوردستانی یا پەکەکێ جودا بکن و ڤەگەرن سەر هێلا بزاڤا نەتەوی یا رۆژهلاتێ کوردستانێ.
ئەڤ مژار نە مژارەکە نوویە و دیرۆکا وێ ڤەدگەرە دەستپێکا دامەزراندنا پژاکێ. جوودابوونا یەکەمین ئەندامێ مەکتەبا سیاسییا پژاکێ ژ بۆ شەرمەزارکرنا پاشڤەرووتیا راستەراستا پژاکێ ژ پەکەکێ و ب ئاوایەکی نەراستەراست ژ ئیرانێ رە و ھەروھا تاسفیەکرنا ھنەک کەسایەتیێن ناڤدار و نەتەوییێن کوردێن رۆژھلات د ناڤ پەکەکێ دە ژ میناکێن ڤێ راستیێ بوون. ب کورتاسی، رەژیما ئیرانێ دخوازە ژ باسکێ نەتەوەپەرەست یێ پژاکێ رە ببێژە کو گەر ھزر دکن کو بەرێ خوە بدن خەتا نەتەوەپەرەستیێ، دڤێ ل بەندا ئێریشا مە بن.
د بەشا دویەما ڤێ گۆتارێ دە، ئەمێ بەحسا پەیوەندیا ڤان ئێریشان و زەختێن ئیرانێ یێن ل سەر ھەرێما کوردستانێ و پرسا چەک کرنا پارتیێن نەتەوی یێن رۆژھلاتێ کوردستانێ بکن.
ل بەندا مە بن…
