دوھ ل نێزی گوندێ تل شەعیرێ ل سەر رێیا تربەسپیێ-قامشلۆ ل دژی ترومبێلەکێ ئێریشەکە بالەفرێن بێ پیلۆتا ترکان پێک ھات. چاڤکانیێن سەر ب پەیەدێ ڤە راگھاندن کو د وێ ئێرشێ دە 3 کەسان کو 2 ژن و یەک زلامن ژیانا خوە ژ دەست دانە.

ل گۆری داخویانیێ، د ئەنجاما ئێریشێ دە ھەڤسەرۆکا کانتۆنا قامشلۆ یوسرا دەروێش، جیگرا وێ لیمان شوێش و ئاژۆکارێ وەساییتێ فرات تووما ژیانا خوە ژ دەست دانە. ھەڤسەرۆکێ کانتۆنێ گابی شەمعوون ژی بریندار بوو.

چاڤکانیێن وەکی ھاوار نیوس ھەر چەندی ناڤێ یوسرا دەروەش ئەشکەرە بکن ژی، لێ ب راستی تێ فکرین کو کەسەک دن، د وەساییتێ دە ھاتیە ئارمانجکرن.

ما لیمان شوێش «یەکبوون عاموودێ» ھاتییە ئارمانج کرن؟

بەریا ھەر تشتی تێ گۆتن کو لیمان شوێش وەکە کادرۆیەکا پەکەکێ رێڤەبەرا کانتۆنێیە و ھاتییە ئارمانج کرن. ھاتە دیارکرن کو لیمان شوێش د سالا 1969 دە ل عاموودێ یا رۆژئاڤا ژ دایک بوویە. د سالا 1988 دە لگەل پەکەکێ تێکلدار دبە و ل ئاکادەمیا مەعسووم کۆرکماز یا ل دۆلا بیقاع پەروەردەیا سیاسی و لەشکەری دبینە. د سالا 1990 دە وێ دشینن باکورێ کوردستانێ. پشتی کو ل گەلەک ھەرێمێن وەکی ئامەد و گارزانێ کار کری، د سالا 1998 دە جارەکە دن ڤەدگەر سووریێ. ھات زانین کو لیمان شوێش د ناڤ پەکەکێ دە ب ناڤێ «یەکبوون عاموودێ» تێ ناسکرن.

تێ زانین کو شوێش پشتی سالێن 2000 د رێخستنا سەر ب پەکەکێ پەچەدەکێ یا ھەرێما کوردستانێ دە و ھەروھا د ناڤ باسکێن جودایێن رێخستنا رۆژئاڤا پەیەدێ دە ژی کار کرییە.

یەکبوون عاموودێ د ناڤبەرا سالێن 2019-2022 دە د ناڤا رێخستنا ژنان یا پەکەکێ یەکتیا ستار و کۆنگرە ستار دە کار دکە.

یەکبوون عاموودێ ئەڤە سالەکە ل رۆژئاڤا د ناڤا سەرکردایەتیا رێخستنا ژنان یا پەکەکێ PAJKێ دە جھ دگرت.

پاژکێ ب سەرکردایەتیا کو ئافراندیە، کادرۆیێن کو رێڤەبەریا سڤیل ب رێ ڤە دبن، مینا موفەتیشەکی کار دکن. ھاتە دیارکرن کو لیمان شوێش (یەکبوون عاموودێ) رێڤەبەریا سەرەکەیا ژنان یا کانتۆنا قامشلۆیە.

لێ چاڤکانیێن نێزیکی پەکەکێ دیار دکن کو تەڤی کو لیمان شوێش کادرۆیەکا بەرێ یا پەکەکێ یە ژی، کەسەکا ب باندۆر نینە و کادرۆیەکا ناڤەندییە. نایێ زانین چما دەولەتا ترک ناڤەک نەدیار ئانکو ناڤەندی دکە ئارمانج. و ئاگاھییێن چاڤکانیێن ھەرێمی گۆمانێ جەم مرۆڤی چێدکن گەلۆ د ترومبێلێ دە کەسەک دن ژی ھەبوو؟

گەلۆ ژنا سێیەم ژی د ترومبێلی دە ھەبوو؟

چاڤکانیێن ھەرێمی ئیدیعا دکن کو ژنا سێیەمین ژی د ترومبێلێ دە ژیانا خوە ژ دەست دایە. د ھندەک حەسابێن مەدیایا جڤاکی یێن عەرەبی دە تێ گۆتن د ترومبێلی دە “ژنەکا پۆر درێژ و وەک باکوریان ب کوردی دئاخڤی” ژی ھەیە. SOHRێ ژی دا دییارکرن کو د ترومبێلی دە سێ ژنان ژییانا خوە ژ دەست دانە.

پێگەھا دارکا مازی ھێ ئەڤ زانیاری ب چاڤکانیێن ھەرێمی رە پشتراست نەکرییە. ل ئالیێ دن رێخستنا رۆژئاڤا زانیاریێن سەختە پێشکێشی چاپەمەنیێ دکە، گەلەک جاران ونداهیان، ناڤ و ئاگاھیێن بوویەرێ ڤەدشێرە و زانیاریان تێرا خوە زەلال ناکە.

لێ دەولەتا ترک چاوا دکارە ل رۆژئاڤا چالاکیێن ب ڤی رەنگی یێن ئارمانجکری پێک بینە، جھێ نیقاش و پرسێیە. پەکەکە؛ ئەو ئێرشێن دەولەتا ترک د ناڤا سینۆرێن حکوومەتا ھەرێما کوردستانێ دە دکە، پەدەکێ و پێشمەرگە تەوانبار دکە. دبێژە ئاگاھی ژ ھێزێن باشوور بۆ ترکان چوویە. لێ بەلێ پەکەکە ئاشکەرا ناکە کا چاوا چێدبە جھەکی وەکە رۆژئاڤا سەد سەدی د بن کۆنترۆلا وێ دایە چاوا دەولەتا ترک دکارە ئێرشی خەباتکارێن وان بکە. دەربارێ ڤان پرس و گومانێن گەلێ کورد دە پەکەکە-پەیەدە چ داخویانی بەلاڤ نەکرینە.