د ڤان رۆژێن داوی دە مەدیایا پهكهكێ بەحسا رەوشا کوژەرێن کو ل هەولێرێ 3 کەس کوشتنە دکە. هەری داوی کۆمیتەیا تێکلیێن دەرڤە یا كهجهكێ ژی تێکلداری مژارێ داخویانیەک بەلاڤکر. د داخویانیێ دە هات ئدیعاکرن کو قاتلێن 3 کەسان مهزلووم داغ و عهبدولرهحمان ئەر د بەرخوەدانێ دا نە و هات گۆتن کو پهدهكه بەرپرسیارێ ژیانا وا نە.
گەلۆ چ قەومیبوو؟
د 19ێ تیرمەها 2019ێ دە ل خوارنگەها هۆککابازێ یا ل هەولێرا پایتەختا هەرێما کوردستانێ، 3 کەس هاتن کوشتن. یەک ژ وان ل کۆنسلخانەیا ترکیێ د خەبتی. هەردو کەسێن دن وەلاتیێن هەرێما کوردستانێ بوون و چ پێوەندی ب بوویەرێ ڤه نەبوو.
پشتی بوویەرێ ب چەند ساعەتان هنەک ژ بەرپرسێن ڤێ جنایەتێ هاتن گرتن و دەرکەت هۆلێ کو ل پشت بوویەرێ هن پێوەندی و پلانێن تاری هەنه و پهكهكێ ئەڤ جینایەتە کری یە. کەسێن دن یێن کو بەشداری کوشتنێ بووین رەڤیانه کامپا مەخموورێ و ژ ور ژی پهكهكێ ئەو برن و ل رۆژئاڤا ب جیهـ کرن.
مهزلووم داغ و عهبدولرهحمان ئەر یێن کو هاتن گرتن، ل بەر کامەرایان ل خوە مکور هاتن کو بوویەر چاوا کرنە و جهێ گومانێ نەهشتن. پشترە ل دادگەهێ جەزایێ دارڤەکرنێ ل وان هات برین. د یاسایا جەزایێن کوردستان و ئیراقێ دە، جەزایێ جینایەتا ب ئهنقهست و پلانکری ئیعدامە و هەردو ژی جەزایێ دارڤەکرنێ وەرگرتنە. ئەڤ جەزا هەتا نها نەهاتییە سەپاندن.
دەولەتا ترک خوەست کوژەر بێن رادەستکرن
دەولەتا ترک خوەست کو کەسێن کوژەر مهزلووم و عهبدولرهحمان رادەستی وان بێن کرن. لێ بەلێ حکوومەتا هەرێما کوردستانێ ئەڤ داخوازا ترکان رەد کر، دەولەتا ترک ژ حکوومەتا ئسراقێ خوەست کو گرتیان رادەستی وێ بکە.
بالیۆزێ ترکیێ ل بەغدایێ رۆژا 11ێ ئیلۆنا 2019ێ داخوازا هەڤدیتنێ ژ سەرۆکوەزیرێ ئسراقێ عادل عەبدولمەهدی کربوو و د جڤینەکە ڤەشارتی دە ژی ترکیێ داخوازا رادەستکرنا ڤان هەردو گرتیان بۆ ترکیێ کربوو. عادل عەبدولمەهدی ڤێ داخوازا فەرمی ژ حکوومەتا هەرێما کوردستانێ رە رادگهینە و لێ دیسا بەرسڤا نهرێنی دستینە. پاشی عادل عەبولمەهدی د سەرهدانا خوە یا هەولێرێ دە د 11\1\2020ێ دە ئەڤ داخواز ژ سەرۆکێ حکوومەتا هەرێما کوردستانێ مەسروور بارزانی رە راگهاند لێ دیسا تێ رەد کرن. کازمی هەروهها د سەردانا خوە یا هەولێرێ یا 9ێ گولانا 2020ێ دە داخوازا ترکیێ ژ رایەدارێن هەرێما کوردستانێ رە راگهاندبوو و دیسا رەد کربوو. رێڤەبەریا هەرێما کوردستانێ هەر چەند كو ئارمانجا راستی یا ئێریشێ زانیبوو ژی، ب هەستیاری نێزی مژارێ بوو و ئەڤ هەر دو کوژەر تەسلیمی ترکان نەکرن.
ئەڤ چالاکی نە ل دژی ترکیێ، ل دژی هەرێما کوردستانێ بوو، تاوانا خیانەتا وەلاتە
هەتا نها ژی ب دەهان دیپلۆمات، ئیستیخبارات و بیرۆکراتێن دەولەتا ترک ل ئەورۆپا و ترکیێ دگەرن. پهكهكێ د تێکۆشینا خوە یا 40 سالی دە، نە ل سووریێ، نە ل ئیرانێ و نه ژی ل ئەورۆپایێ و نە ژی ل ترکیێ یەک رایەدارێ ترک نەکری یە هەدەف. د جینایەتا کو 3 کەسان ل خوارنگەها هۆککابازێ ژیانا خوە ژ دەست دا بوو، ئارمانج نە دەولەتا ترک بوو، ئارمانج حکوومەتا هەرێما کوردستانێ بوو.
