وەزارەتا پێشمەرگە و تیما شێورمەندێن ھێزێن ھەڤپەیمانان یا ل ھەرێما کوردستانێ، ئامادەکاریێن جێبەجێکرنا خالێن ھەڤتێگھشتنا ناڤبەرا وەزارەتا پێشمەرگە و پەنتاگۆنێ گۆتووبێژ کرن.
ل گۆر داخویانیا وەزارەتا پێشمەرگە، ئیرۆ چارشەمبێ 5 تیرمەھا 2023، سەرۆک ئەرکانێ وەزارەتا پێشمەرگە عیسا عوزێر ب ئامادەبوونا شێورمەندێن وەزارەت و جیگرێ سەرۆک ئەرکان بۆ ئیدارە و میرە، پێشوازی ل بەرپرسێ تیما شێورمەندێن ھێزێن ھەڤپەیمانانا ل ھەرێما کوردستانێ کر.
د جڤینێ دە بەحسا پرۆسەیا چاکسازیا وەزارەتا پێشمەرگە کرن ل ژێر رۆناھیا خالێن ھەڤتێگھشتنا ناڤبەرا وەزارەتا پێشمەرگە و وەزارەتا بەرەڤانیێ یا ئامەریکایێ، ب مەبەستا رێکخستن و یەکخستنا ھەموو ھێزێن پێشمەرگە د چارچۆڤەیا وەزارەتا پێشمەرگە دە.
ھەروھا ھەردو ئالیان ل سەر ئامادەکاریێن کو ژ بۆ جێبەجێکرنا خالێن ھەڤتێگھشتنا ناڤبەرا ھەردو ئالیان ھاتنە کرن، گۆتووبێژ کرن و ل سەر ڤێ مژارێ دانووستاندنا فکر و رامانان کرن، ب ئارمانجا کو بلەز بهێن جێبەجێکرن و ئەڤ پرۆسە بگەھە ئەنجامێ.
