سەرۆکێ گشتی یێ یەنەکێ بافل تالەبانی ب بۆنەیا سەدسالیا کۆنفەرانسا لۆزانێ پر ئەکتف داخویانیان ددە. بافل تالەبانی دەستپێکێ پەیامەک ژ بۆ کۆمبوونا ل سەر لۆزانێ یا ل حەسەکێ یا رۆژاڤا شاند. پەیرە ژی ل سەر ناڤێ خوە پەیامەک وەشاند.
بافل تالەبانی، د پەیاما خوەیا ب بۆنەیا سەدسالا لۆزانێ دە گۆت، ئەم ناکۆکیان ل ئالیەکی بھێلن و ژ بۆ کوردستانەکا مەزن بخەبتن. ھەکە ئەم کەسایەتیا بافل تالابانی بدین ئالییەکێ، نڤیسا کو ھاتیە وەشاندن ب ئاوایەکی مەنتقی و رەئالیست بوو. لێ ئیمزایا بافل تالابانی یا ل بنێ راڤەکرنێ یەکسەر نێرینا مەیا ل سەر نڤیسێ دگوھەرە. گەلۆ چ ما؟
ژ بەر کو سەرۆکێ نھایێ یەنەکێ بافل تالەبانی سەرۆکێ وێ کۆما خیانەتکارە کو د 17 جۆتمەھا 2017 دە بەشداری داگیرکرنا کەرکووکێ بوو.
ژ بەر کو شریکێ ئێریشێن دەولەتا ئیراقێ یێن ل سەر ستاتویا ھەرێما کوردستانێیە.
ژ بەر کو شریکێ پرۆژەیێن دەولەتا ئیراقێ یە یێن کو دخوازە شەنگالێ ژ ھەرێما کوردستانێ ڤەقەتینە و ب بەغدایێ ڤە بهێت گرێدان.
ژ بەر کو ئەو کەسە کو د پارتییا وی دە وی رەخنە دکن وان دکووژە و دژی وان کۆپلویان چێدکە.
ژ بەر کو ئەو کەسە کو ژ بۆ بەرژەوەندیێن خوەیێن مادی دەست داتنیتە ل سەر داھاتا گومرکا سلێمانیێ و دەست داتینە سەر ئاخ و زەڤیێن خەلکێ.
ب کورتی، بافل تالەبانی ئەو کەسە یێ کو ئەوقاس زرار دایە کوردستانێ. ل ئالیێ دن ژ بۆ مە “کریار گرینگە، نە گۆتن”. ئەم ل خەباتا بافل تالەبانی دنێرن و مخابن ژ بلی کریارێن کو ھەتا نھا زرارێ ددن کوردستانێ، تشتەکی دن نابینن. بافل تالەبانی و پارتیا وی یەنەکە، ب ھەستێن دیناتی، بەرژەوەندییێن شەخسی و پیلانگەری زرارێ ددن سلێمانییێ و تەڤایی ھەرێما کوردستانێ.
بافل تالەبانی و یەنەکە ھەولددن کو ئەو چقێ لێ سوار بوویین ببرن. دەستێ خوە دخن ناڤا ھەر دەستێ کو ئێریشی ھەرێما کوردستانێ بکە. ھەر چقاس بافل تالابانی ھەزار جاری لۆزانێ شەرمەزار بکە ژی بێ واتە و فەیدەیە.
شەرمەزارکرنا لۆزانێ ب قاسی زرارا کو بافل تالابانی د ڤان 6 سالێن داوی دە ل کوردستانێ کری، نینە. بافل تالەبانی بەحسا ئاڤاکرنا کوردستانا مەزن دکە، لێ دخوازە سلێمانیێ ژ ھەرێما کوردستانێ کو کوردان ب زەحمەتی، ب خوین و جان ئاڤا کرنە، ڤەقەتینە و بخە سەر ئیراقێ. بافل ب کەسێن کو ئێریشی ستاتوویا ھەرێما کوردستانێ دکن رە ھەڤالبەندیێ دکە و پەیرە بەحسا کوردستانا مەزن دکە؟ بافل و ئەڤ پێکھاتە ئانجاخ دکارن لۆزانێ ژ خوە رە وەک ماسکە بکار بینن. یا کو بافل تالابانی دکە ژی ئەڤە.
دڤێت دەملدەست بێ زانین کو نە تەنێ بافل تالابانی لۆزانێ وەک ماسکە بکار تینە، پەکەکە ھەمان سەختەکاریێ دکە. ژخوە، ئەندازیارێ فکرا بکارئانینا لۆزانێ وەک ماسکە پەکەکەیە. پەکەکێ یەنەکا کو د ھەموو مژاران دە وەکە ھەڤپار دبینە، خستە ناڤا ڤێ “شانۆیا دژبەریا لۆزانێ”. ب راستی ل ئۆرتێ شانۆیەک ھەیە.
دژبەریا پەکەکێ یا لۆزانێ و گۆتنا وێ یا “ئەمێ لۆزانێ تێک ببن” و ژ بۆ ڤێ ژی لدارخستنا کۆنفەرانسان ب قاسی نۆبەدارێی یا رووڤییا مریشکایە. ژ بەر کو پەکەکە بەرھەما لۆزانێیە. پەکەکە گارانتۆرێ لۆزانێیە. ئەم ڤێ نابێژن، پەکەکە بخوە دبێژە، د پرتووکێن عەڤدللا ئۆجالان دە تێ گۆتن.
بۆ میناک؛ عەڤدللا ئۆجالان، پەیمانا سیڤەرێ وەکە پەیمانەکە مەترسیدارا کو زرارێ ددە رۆژھلاتا ناڤین ب ناڤ دکە و د 10 کانوونا 2008 دە گۆت: “کوردنۆ، ئەم پەیمانا سیڤەرێ قەبوول ناکن. ئەم دخوازن لۆزانا خوە ئاڤا بکن و نووژەن بکن. دڤێت ئەم لۆزانا دویەمین ب نووژەنکرنا لۆزانێ بدن ژییاندن. ب ڤی ئاوایی میساقا مللی بەرفرەھبکن””
پەیمانا سێڤرێ پەیمانەک بوو کو مافێ دەولەتبوونا کوردان پاراستبوو. پەیمانا لۆزانێ یا کو کوردستان کرییە پارچە، پشتی ھلوەشاندنا پەیمانا سیڤەرێ ھات چێکرن. ئۆجالان دژبەریا سیڤەرێ دکە. ئۆجالان د پرتووکێن خوە یێن ژ ھەزاران رووپەلان پێک دهێن دە نابێژە؛ “ئەز ل دژی لۆزانێ مە، لۆزانێ زەرار دایە کوردان”. ئۆجالان گۆت، “دڤێت لۆزانا جڤاکی بێ کرن، لۆزانێ زرار دایە براتیا کورد و ترکان”. ھوون د پرتووکێن ئۆجەلان دە چ دژبەرییەکا وی یا ھەمبەری میساقا مللی یا ترکا نابینن، ئۆجەلان ب دلسۆزی پرۆژەیا ترکان یا میساقا مللی دپارێزە. ئۆجالان و پارتییا وی پەکەکە کو پشتگرییا لۆزانێ و پشتگرییا میساقا مللی دکە نکارە ل ھەمبەر لۆزانێ بسەکنن. ئۆجەلان و پەکەکە دبێژن ئەم سینۆرێن لۆزانێ چێکری ناگوھەرین.
ئۆجالان ل ئیمرالیێ ژ ئەفسەرێ ترک حەسەن ئاتیلا ئوگور رە گۆتبوو، “وەرە ئەم ھەولێرێ بھەڤرە بگرین، ب دزی پشتگری بدن مە”. ئۆجالانێ کو ب دەولەتا ترک رە پەیمانا “داگیرکرنا ھەولێرێ” چێکری و بافل تالابانی کو لگەل بەغدایێ ژ بۆ داگیرکرنا کەرکووکێ پەیمان چێکری، دێ چاوا دژی لۆزانێ بسەکنن؟ پەکەکە و بافل وەکە بەرماھییێن لۆزانێ تەڤدگەرن.
ژ بۆ ڤێ ژی دڤێت رەوشەنبیر و ولاتپاریزێن کورد ل ھەمبەری ھەموو گۆت-گۆتکێن پەکەکێ و یەنەکێ یێن ب ناڤێ “لۆزان” ھەلوەستێ وەربگرن. بلا ھەر دو لایەنێن سییاسی ل رابردوویا خوە بنەرن.
بافل تالەبانی ھەزار جارا پەیامان ل دژی لۆزانێ بەلاڤبکە ژی راستییا وی یا ھەڤالبەندییا پرۆژەیا لۆزانێ ناگوھەرە. لۆما ژی ئەم دبێژن “”بافل تالەبانی و ھەڤرێیێن وی نکارن لۆزانێ تێک ببن ئەو ب خوە گارانتۆرێن لۆزانێ نە”. پەکەکە ھەزار جاری گۆتارێن دژبەریا لۆزانێ بەلاڤ بکە، کۆنفەرانسان ل دار بخە، ل سەر مەدیایا خوە وەشانێ بکە ژی، یا راست ئەوە کو “پەکەکە نە ل دژی لۆزانێیە، پەکەکە گارانتۆرا لۆزانێیە” پەکەکە نۆبەدارێ سینۆرێن لۆزانێیە.
