ما ئەمپەریالیستان (ئینگلیز) دەولەتا ئیراقێ ئاڤا نەکرنە؟
ما ئەمپەریالیستێن کو ھەڤسەنگیا شیعا و سوننەیان چێکری ، 100 سال بەرێ سەرخوەبوونا کوردستانێ نەکرن قوربانێ دەولەتا چێکرییا ئیراقێ؟
ما دەما ئیراق ھاتیە دامەزراندن، قادا ھەری بەرھەمدار ژ بۆ ئەمپەریالیزمێ نە ئەو بوو؟ ما سەرخوەبوونا باشوورێ کوردستانێ ناھێ واتەیا ھلوەشاندنا رەوشا هەیی یا ئەمپەریالزمێ؟
ما پاراستنا “یەکیتیا دەولەتا ئیراقێ”، نابە نووژەنکرنا داگیرکەریا 100 سال بەرێ ھێزێن داگیرکەر ل سەر مە سەپاندی؟
یێن کو ل سەر ناڤێ چەپگری و ئومەتێ ئێریشی شەخسێ بارزانی و کوردێن سەرخوەبوونخواز دکن، ما بەرگرییێ ل رەوشا هەیی یا کو ئەمپەریالیستان ئاڤا کرنە ناکن؟
دژبەرییا وەیا ل ھەمبەر سەرخوەبوونا کوردستانێ چ شرۆڤەیەکا رەوشەنبیری، ئۆلی و مرۆڤی بۆ نینە! ھوون چەحش و کوژەرێن دەولەتێن داگیرکەرێن ھەرێمی یێن فاشیست و پاشڤەرووێن ئەمپەریالیزم و ھەڤکارێن وێ نە!
ھوون پۆلیتیکایێن قرێژێن کو نھا ئافرینەرێن وێ ئانگۆ ھێزێن ئەمپەریالیست ژی د پێکانینا وان دە بێبریار و دودلن، دپارێزن. ژ خوە باوەر بن، ھوون ژ ئەمپەریالیستان ھێژ بێھتر پاشڤەروو، خوەفرۆش و فاشیستن…
ماتەریالیستێن وە ل سەر ناڤێ چەپگریێ لگەل کەڤنەپارێزان بوونە برا و نرخێن چەپێن گەردوونی ھاتن قرێژ کرن؛ ئۆلدارێن وە ل سەر ناڤێ ئومەتێ لگەل ئاتەیستان بوونە برا؛ باوەریا ھەق و خوەزایی ژ ناڤ بر.
خالا ھەڤپارا وان گروپان ھەموویان دژمناتیا کورد/کوردستانێ یە. ھوون ژ تەییب ئەردۆگان، کەمال قلیچدارۆغلو و دەولەت باخچەلی گەمارترن. ژ بەر کو ھوون د بن لنگ و پستالێن وان دە “سیاسەتێ” دکن. دگەل ڤێ راستیێ، بێیی کو ھوون شەرم و عەیب بکن ھوون بەحسا “براتیا گەلان، ئازادی، ئانتی ئەمپەریالزم و براتیا ئۆلی” دکن. ئەڤ راستییا وە نە تەنێ تراژیکۆمیکە “تشتێ کو د هەمان دەمێ دە مرۆڤ دکارە پێ بکەنە یانژی پێ هێسران ببارینە”، د ھەمان دەمێ دە کەزەبا مە د حەلینە.
باشوورێ کوردستانێ تەڤی دژبەرییا ھەر کەسی رەفەراندۆما سەرخوەبوونێ پێک ئانی، رەوشا هەیی یا ئەمپەریالیست و کۆلۆنیالیستان ل کوردستانێ ھەژاند و د ھەمان دەمێ دە ماسکەیێن کەس و گروپێن چەپێن و ئۆلدارێن سەختە داخستن. روویێ وانێن فاشیست ئەشکەرە کر. ژ بەر ڤێ یەکێ شۆرەشا باشوورێ کوردستانێ ل دژی فاشیزمێ، ھەر جورە کەڤنەشۆپی و ئەمپەریالیزمێیە. د بنیات دە ئانتیکۆلۆنیال و پراتیکی دە ئازادیخواز و شۆرەشگەرە. ئەڤ دەستکەفتە وێ ژ بۆ ھەموو بندەست و ھەژاران ببە رۆناھی؛ ئەوێ ژ بۆ وە لایەنێن دژ-شۆرەشێ ژی ببە قەھر و ئەلەم.
دەما کو فکرا “ژ سەرخوەبوون و ئازادیێ ب قیمەتتر چ تشتەک نابە” ل باشوورێ کوردستانێ مسۆگەر بوو، ئەڤ یەک ژی ئیسپات کر کو ھەموو ھالھال و گالگالا کەس-لایەنێن کو د شەخسێ بەرزانییان دە ئێریشی باشوورێ کوردستانێ دکن، وێ نکاربن کاروانێ مەشا سەرخوەبوونێ بسەکنینن.
