د وێ کۆنفەرانسا لۆزانێ یا کو ژ ئالیێ رێخستنا پەکەکێ یا ئەورۆپایێ کەنەکێ ڤە ھاتیە لدارخستن ھندەک کەس ژ باشوورێ کوردستانێ ژی بەشدار بوون. ھلبژارتنا بەشداربوویان پڕ بالکێش بوو. ژ بەر کو کەسێن د سەردەما سەدام دە لگەل بەعسیان ھەڤکاری کرین، ئالیگرێن حکوومەتا نھا یا ئیراقێ و گەلەک ناڤێن کو ل دژی رەفەراندووما سەرخوەبوونا کوردستانێ دەرکەتی ژی بەشداری ڤێ کۆنفەرانسێ ببوون.
پەکەکێ د 100 سالییا سالڤەگەرا لۆزانێ دە ل باژارێ لۆزانێ کۆنفەرانسەک ل دار خست. کۆنفەرانسا پەکەکێ د ھەر واری دە ژ ئالیێ رایا کوردان ڤە راستی بەرتەکێن مەزن ھات. ژ بۆ وان ناڤێن کو بەشداری کۆنفەرانسێ بوونە ژی کوردان بەرتەک نیشان دا. د کۆنفەرانسێ دە کەسێن جاشایەتی ژ بۆی رەژیما بەعس کربوون ژی ھەبوون.
پاسەوانێ سەدام، موولازم موحسن ژی د کۆنفەرانسا لۆزانێ دە بوو
د کۆنفەرانسا کو پەکەکێ ھەم ل رۆژئاڤا و ھەم ژی ل لۆزانێ پێک ئانی دە کەسێن بالکێش ھەبوون: میناک دارا حاج ئیبراھیم چەرمەگایی یێ ژ سلێمانیێ. ئەڤ کەس بەرێ ئەندامێ پارتیا بەعس بوو و مستەشارتی کریە. خەلکێ سلێمانیێ وی وەک “بەرپرسێ جەحشا” ناس دکن.
ئەڤ کەس د ھەمان دەمێ دە ھەڤالێ ھەری نێزیک یێ موولازم موحسنە. موولازم موحسن، ب ناڤێ موحسین فلستینی ژی تێ ناسکرن. وەکە بەرپرسێ ئاساییشا لەشکەری یا رەژیما بەعس ل باژارێ سلێمانیێ دهات ناسکرن. سەدام ژێ رە دگۆت “زێرەڤانێ من یێ ل سلێمانیێ”. بەرپرسیارێ یەکینەیا تایبەت بوو کو ب سەدان جوانێن کورد ئیشکەنجە دکرن. خەلکێ سلێمانی وی باش ناس دکن. دۆستێ پەکەکێ دارا ئیبراھیم چەرمەگا د کۆنفەرانسێ دە ل سەر ناڤێ کوردستانێ ئاخڤی.
چەرمەگا د بەرنامەیەکا تەلەڤزیۆنێ یا کو د سالا 2020 دە بەشدار بوو دە گۆتبوو کو پەیوەندیێن وی لگەل موولازم موحسین بەردەوامن. ھەتا ئەو قاس پێشدا چوو کو ل سەر خەبەرێ کوشتنا موولازم موحسن داخویانی دا و گۆت “ئەز ھەر دەم ب تەلەفۆنێ لگەل دئاخڤم” ئەڤ نووچە راستیە. ڤیدیۆیێن ڤان ئاخافتنان ژی ھەنە.
ئیرۆ د ڤێ کۆنفەرانسا لۆزانێ دە وەک نوونەرێ ھەرێما کوردستانێ چەرمەگا تێ قەبوولکرن و دئاخڤە. ئەو کەسێن کو د کۆنفەرانسا لۆزانێ دە کو کوردستان پارچە پارچە کری و ھەر پارچەیەک پێشکێشی ئالیەک جودا کری، چاڤێن خوە ژ ڤێ ھەلوەستا پەکەکێ گرتین مینا چەرمەگا بەرماھیێن داگیرکەرا نە. گەلەک ژ ڤان بەژداربوویان لگەل داگیرکەران پەیوەندیێن قرێژ ھەبوون. ب تایبەتی پەکەکە ل باشوورێ کوردستانێ لگەل کەسێن د سەردەما سەدام دە جەحشاتی کری تەڤدگەرە و دخوازە وان وەکە دژبەرێن ھەرێما کوردستانێ ب کار بینە.
د رابردوویێ پارێزگارێ سلێمانیێ دە ژی ئالیێن تاری ھەنە
پارێزگارێ سلێمانیێ ھەڤال ئەبووبەکر ژ پارتیا گۆران ھات ھلبژارتن. د پێڤاژۆیا ھلبژارتنێ دە یەنەکێ گەلەک بەلگە ل سەر رابردوویا ھەڤال ئەبوبەکر پێشکێشی خەلکێ سلێمانییێ کرن. یەک ژ وان ھەلبەستەک بوو کو د رۆژنامەیێن وێ دەمێ دە ھاتبوو وەشاندن. پارێزگارێ نھا یێ سلێمانیێ ھەڤال ئەبووبەکر ھەلبەستەکا خوە دە پەسنا سەدام ددە و ئەڤ ھەلبەست د رۆژنامەیان دە ھاتنە بەلاڤکرن.
ھەڤال ئەبووبەکر د ھەمان دەمێ دە ئەندامێ پارتیا بەعس بوو و د رێخستنا جوانان دە ژی جھ گرتبوو.
ھەڤال ئەبوبەکر نھا کەسەکی نێزیکی پەکەکێ یە. بەرییا چار سالا د گۆت ئەم دێ سیستەما کۆنفەدەرال سازبکن ژ بۆ سلێمانییێ ژ ھەرێما کوردستانێ ڤەقەتینە پێشنییار کربوو. ھەڤال ئەبوبەکر ئەندامێ رێخستنا پەکەکێ یا ئەورۆپایێ کەنەکێ یە و ئەندامێ کۆمیتەیا باشوورێ کوردستانێ یە. وەکە ئەندامێ دایمی د ھەموو جڤێنێن پەکەکێ دە جھ دگرە.
گەر ئەو ناڤێن پەکەکێ ل دۆرا خوە کۆمکری وەکە سۆران عۆمەر،ی وسف محەمەد و ھتد باش بهێن لێکۆلین کرن، دێ د رابردوویێ وان دە ئالیێن تاری باش هێن دیتن. ئەڤ کەسە لگەل سەدام و ئیستیخباراتا ئیرانێ ناڤھەڤدە بوون.
ھەر چقاس گەلێ باکورێ کوردستانێ ڤێ راستیێ نەزانە ژی لێ گەلێ باشوورێ کوردستانێ باش دزانە و دبینە. ژ بۆ ڤێ ژی پشتی کۆنفەرانسا لۆزانێ یا پەکەکێ رایا گشتی ل سەر بەشداربوویێن کۆنفەرانسا پەکەکێ ئەڤ تشت گۆتن: “ژ بەر کو پەکەکە دژی سەرخوەبوونا کوردستانێیە، ھەلبەت ل دۆرا خوە قەھرەمانێن پێشمەرگە، نڤیسکار و سییاسەتمەدارێن کوردپەروەر کۆم ناکە. ئەو دێ کەسێن جەحش یێن بەرماھییێن سەدام کۆم بکە و وەکە نوونەرێن باشوورێ کوردستانێ دەست نیشان بکە”.
