پەکەکە ل سەر دەرەو و سەختەکرنا مژاران بەردەوامە و هەری داوی ژی ب ڤیدەئۆیەکێ خواست گەلێ کورد ب گشتی و جەماوەرێ خوە ب تایبەتی بخاپینە و درەوێن خوە ب وان بدە باوەرکرن.
ئاژانسا ئانەفێ یا پەکەکێ د نووترین درەوا خوە دە کو وەکە زانیاری ژ جەماوەرێ خوە رە پارڤە کریە راگهاند، “پەدەکە دخوازە زاپێ دۆرپێچ بکە”، ژ بۆی ڤێ یەکێ ژی ڤیدەئۆیەک ژ هندەک ئامیرەت و پێشمەرگەیان ژ دوور ڤە کشاندیە و ووسا ددە خوەیا کرن کو پێشمەرگە بەر ب “قادێن گەریلا”ڤە دچە.
گەلۆ ئەڤ دیمەنێن د ڤیدەئۆیێ دە یێن کی دەرێ نە؟
د ڤیدەئۆیا کو ئانەفێ پارڤەکری دە تەپەیەک بلند کو چەندین پێشمەرگە لێ هەنە خوەیا دبە، ئەڤ تەپە ل جەم گەلێ ناڤچەیێ ب “گێرا چەلکێ” تێ ناسکرن و چ جاران چ گەریلایەک نەکەتیە ڤێ ناڤچەیێ، هەر وەها ئامیر و ترومبێلێن ژ بۆی چێکرنا رێ د ڤیدەئۆیا پەکەکێ دە خوەیا دبن ئالیێ رۆژهلاتێ بەنداڤا “گەلیێ رەشاڤا” نیشان ددە کو ئەڤ جی ب تەنێ یەک کیلۆمەتر دووری سینۆرێ ناڤچەداریا دێرالۆکێ یە و پێشمەرگە ژ بۆی رێگرتن ژ زێدەتر هاتنە پێش یا لەشکرێ ترکیێ هن بارەگەهێن خوە ل ور چێدکە.
ئانەفێ هەر وەها راگهاندیە، “پەدەکە هەول ددە ل گەلیێ رەشاڤا، گێرا چەلکێ و مێرگێ ب جيهـ ببە و نوقتەیێن نوو ئاڤا بکە”، ئەڤ جیهێن کو پەکەکە باس دکە تەڤ جیهێن نیشتەجیبوونێ نە و ب چ ئاوا و ل چ دەمەکی گەریلا لێ نەبوونە.
پەکەکێ گەلیێ زیلان، چەولگ و تەڤ مێرگ و دەشت و دۆلێن باکورێ کوردستانێ رادەستی ترکیێ کرنە و وان ناڤچەیان ب ناڤچەیێن پاراستنا مەدیا و قادێن گەریلا نزانە و نها ژی دخوازە گەلیێ رەشاڤا و گێرا چەلکێ و مێرگێ و هتد… وەکە ناڤچەیێن دن رادەستی ترکیێ بکە و دووڤ رە ب بکوشتن دانا هن جوانێن کورد ببێژە، ئەم ل بەر خوە ددن، مە لەشکرێ ترکیێ سەکناند، ئەم ب سەر کەتن و هتد…!
یا راست تەڤ لڤ و تەڤگەرێن هێزا پێسمەرگە ل باشوورێ کوردستانێ ب تەنێ ژ بۆی پاراستنا باشوورێ کوردستانێ و رێگریکرن ل زێدەتر پێشڤەهاتنا لەشکرێ ترکیێ یە، ژ بەر کو پەکەکە هەیا نها نەکاریە ل چ جیهەکێ ل بەر خوە بدە، هەر کو دچە پێتر پاشڤە ڤەدکشە و پێتر لەشکەرێ ترکیێ دکشینە ناڤا کووراهیا باشوورێ کوردستانێ دە.
پەکەکە ل تەڤ قادان راستی شکەستنێ هاتیە و دخوازە ب پارڤەکرنا نووچەیێن ب ڤی ئاوا درەو و سەختە جەماوەرێ خوە بخاپینە و وان ل دژی باشوورێ کوردستانێ هان بدە و پەدەکێ ب سەدەما تێکچوونا خوە نیشان بدە، لێ بەلێ ئێدی نەما کەسەک باهوەر ژ ڤان دەرەوێن پەکەکێ بکە، ژ بەر کو هەر تشت خوەیا و ئەشکەرەیە و ب دەرەوێن پەکەکێ راستی نایێن ڤەشارتن. پەکەکە پرا دەرباسبوونا لەشکرێ ترکیێ یە ژ بۆی باشوورێ کوردستانێ و داگیرکرنا ڤێ پەرچەیا ئازاد.
