بووبێ ئەسەر
دڤێت ئەم ئانگۆ کورد ڤێ یەکێ باش فێر ببن کو ھەر ملەتەک ل سەر کۆکا خوە، ب چاند و ھێژاییێن خوە مەزن و ب پێش دکەڤە.
ھەلبەت ئەڤ پیڤان ھەتا ژ دەستێ داگیرکەران ھاتیە و دهێت ناھێلن کو وەلاتێ ئەو داگیر دکن، خەلکێ وی ب وان مەزن ببە.
ژ بەر کو داگیرکەر تەنێ ب داگیرکرنا ئەردێ وەلاتەکی نایێن سەر. لەورا دزانن کو دەما ئەو وەلاتەکی داگیر دکە، پێویستی دبینە کو مەژی و ھەمی ھێژاییێن گەلێ وی ژی داگیر بکە دا کو ئەو ملەت ئێدی نکاربە خوە ئازاد و وەلاتێ خوە ژ بن دەستێ داگیرکەریێ رزگار بکە.
لۆما ژی ژ رۆژا کوردستانا شێرین ھاتیە داگیرکرن و ھەتا نھا ئەڤ داخوازا داگیرکەران ل کوردستانێ پێک نەھات بوو. ژ بەر کو ملەتێ کورد ملەتەکی ئەسلسازە، مەزن و د دەما خوە دە خوەدیێ چەند دەولەت و ئیمپاراتۆریان ژی بوو. ل ھەمبەر ھەمی زلم و زۆرداریا داگیرکەران ھەتا ژێ ھاتیە بەرخوە دایە.
پشتی دابەشکرنا کوردستانێ د ناڤا چار داگیرکەرێن دەڤبخوین دە و ل گۆر پەیمانا لۆزانا 1993، ئارمانج و ھەدەفا داگیرکەران ئەو بوو کو د ناڤا سەد سالان دە کوردان تونە بکە. ل گۆر ڤێ ئارمانجێ ژی کارێ خوە کرن و دکن.
لێ کوردان ژی ب ھەمان شێوەیی، ب قاوەت و ھێزا خوە، تەکۆشینا ئازادیا خوە دا و خوە رادەستی دژمن نەکر. دژمن دیت کو ئەو ب ڤێ رێیێ ب سەرناکڤن، دەست ئاڤێتن فەن و فووتان، درەو و بۆختانان دا کو ملەتێ کورد خوە ب خوە قرا ھەڤ بینە. د ڤێ دە وەکە وان دخوەست ب سەرنەکەتن. ڤێ جارێ دەست ئاڤێتن وێ یەکێ کو ل سەر ناڤێ کوردان تەڤگەر ئان پارتیەکی دامەزرینن و ل سەر دەستێ وێ، ئارمانجا تونەکرنا کوردان پێک بینە. و باوەرم ھەتا دەرەکێ ب سەر ژی کەتنە.
ب ڤێ ھەول و خەباتێ چ نەما بوو کو ل ھەر چار پەرچێن کوردستانێ وێ داخوازا تونەکرنا کوردان ب دەستێن ھندەک کوردان ب سەر بکەتا. پشتی کو سەدام خوەست کووەیتێ داگیر بکە، ئاھا د ڤردە ئەو ل دژ بەرژەوەندیا مەزنێن دنیایێ تەڤگەریا و ئەڤ بوو وەکە تو چرایەکی د شەڤرەشا کوردان دە پێکەی. پێکەتنا وێ بوو رۆناھیا گەلێ کورد. پێخستنا وێ بوو ئازادیا باشوورێ کوردستانێ.
ئێدی مە و داگیرکەرێن مە، مە فێم کرن کو دێ کوردستان ھەر بمینە. لۆما پشتی ئازادیا باشوورێ کوردستانێ ئێدی داگیرکەران و ب تایبەتی ژی داگیرکەرێن ترک بێترین ھێز و قاوەتا خوە ب کار ئانی دا کو ل سەر دەستێ ھندەک پارتیێن کوردان باکور و رۆژئاڤا تێک ببە.
ل باکورێ کوردستانێ ژی ھەما ھەما ب سەرکەتنە. ھەتا نھا چ خوەستنە وەکە وان بوویە. چ ھێز و قاوەتەکا نەتەوەیی ل باکور نەھشتنە کو ئەو بەرخوە بدە. نەھشتنە یان گەلەکی قەلس کرنە. لەورا وان کارێ خوە کرن کو چ قاوەت یان ھێزەکا نەتەوەیی ل باکورێ کوردستانێ نەمینە. لێ مە ژی وەکە کوردێن باکورێ کوردستانێ نکاریبوون بەرخوە بدن. خوە ژ بەلایا ووسا ئازاد بکن و ببن خوەدی ئەنیەکا نەتەوەیی.
ل گۆر من ئاساسێ دامەزراندنا ئەنیەکا نەتەوەیی د ھلبژارتنا ترکیێ و باکورێ کوردستانێ یا سالا 2023 دە ھاتبوو ئاڤێتن.
ب سەرپەرەشتیا ھاک-پارێ و ب پشتگریا حەرەکەتا ئازادی. کەدەپە، پاک و تەڤگەرێ ئەو ئاساس ھاتە دانین. دل دخوەست کو ئەڤ ھەڤکاری و ئالیکاری نە تەنێ ژ بۆنا ھلبژارتنان با. داخواز ئەو بوو کو پشتی ھلبژارتنان ژی ئەو تێکلی و ب ھەڤرە کارکرن بەردەوام بکە ھەتا کو ئەو ببە ئەنیەکا نەتەوەیێ.
ئەز ھێژ ب ھێڤی مە کو دێ ئەڤە ژی پێک بێ. پاک و تەڤگەرێ بریار دانە کو ببن یەک. ئەڤ تشتەکی باشە. ب ھێڤیا کو حەرەکەتا ئازادی، کەدەپە و ھاک-پار ژی ببن یەک و پشترە بێ کو وەخت دەرباس ببە ھاک-پار و پاک یان ژی ب ناڤەکی نوو ئەنیا خوەیا نەتەوەیی دامەزرینن.
د ئەنیەکا وەھا دە دڤێت ھەر کوردەکی دلێ وی ل سەر وەلاتێ وی دئێشە بکاربە ببە ئەندامێ ڤێ ئەنیییێ. ئەنی دڤێت فرەھ بە و بکاربە ھەمی رەنگ و دەنگێ جڤاتا کورد ھەمبێز بکە.
ئەم گھشتنە وێ قۆناغێ کو دڤێت ئێدی ئەم وەکە کوردێن باکورێ کوردستانێ ببن خوەدی ئەنیەکا نەتەوەیی و ل گۆر داخواز و پێویستیا گەل تەڤبگەرن و حەرەکەت بکن.
ھەگەر کوردێن باکورێ کوردستانێ زووترین دەمێ ڤێ پێک نەینن، ئەو ژی دێ تێک چن و جارەکا دن زەحمەتە کو ئەم فرسەتەکا وەھا بکاربن ب دەست بخن. ئەڤ سەد سالن کو مە ژ بەر نەیەکبوونا پارتی و ھێزێن خوە ھەر رۆژ وەندا کرنە و دکە. قەد نەبە د داویا ڤێ سەد سالا لۆزانێ دە یەکیتیا کو ھێسترێن چاڤێن دایکان بسەکنینە، دەنگێ رەوشەبیران ژ بۆنا راستیێ بەرز بکە، قەلەما نڤیسکاران ژ بۆنا بەرژەوەندیا گەلێ کورد تووژر بکە، پێک بینن.
ب ھێڤیا کو پارتیێن کورد و کوردستانێ ئانکو ھاک-پار و پاک ل بەندا ھلبژارتنەکا دن نەمینن و تێکلیێن خوەیێن ژ بۆنا ئەنیەکا نەتەوەیی بدۆمینن. تاقەتا ڤی ملەتی ھەتا سەد سالەکێن دن خوە ل سەر لنگان بھێلە نەمایە. ھەگەر رەوش وەھا ھەرە دایاخا ڤی ملەتی نە ھەتا سەد سالان، نەما دکارە دەھ سالان خوە ل بەر زلم و زۆرداریا داگیرکەران بگرە.
دڤێت ئەم ژ بیر نەکن کو دۆزا ملەتەکی ب یەکیتی و ب ھەڤرە کارکرنا وی پێک تێ. دەما ئەڤە تونەبە ئەو ملەت، ئەو گەل ژی تونە دبە…
