گەلەک جارا ھندەک سیاسەتمەدارێن کورد بەحسا راستیا پەکەکێ دکن. ئەگەر مرۆڤ وەرە و بەرێ خوە بدە راستیێ، ل باکورێ کوردستانێ ھەرکسەکی سیاسەت کری، پارتیەک سیاسی دە ژ سالا 1975ێ پێدە جھ گرتی، رەوشەنبیر، نڤیسکار، ھونەرمەند ھەموو ژ کەسێن بەحسا راستیا پەکەکێ دکن پتر پەکەکێ ناس دکن. یەک جیاوازی ھەیە ئەوێن کو پەکەکێ ناسدکن و بەحسا راستیا ڤێ رێخستنێ دکن د تەڤگەرا ئازادخوازا کوردی دە تەڤلی راستی و خەلەتیێن خوە درووستن. یێن کو پەکەکێ ناسدکن و ل دووڤ سیاسەتا پەکەکێ دچن، یێن کو ژ بۆ بەرژەوەندیێن رۆژانە پرۆپاگاندەیا پەکەکێ دکن، یێن کو دزانن لێ نابێژن، ئەو نە درووستن و حەمد یان بێ حەمدێ خوە خیانەتێ ل ملەتێ کورد دکن.
ژ بەری چەند رۆژا بەرپرسێ پەکەکێ یێ یەکەم جەمیل بایک د کانالەکا تەلەڤزیۆنا پەکەکێ دە دبێژە: “ل کوردستانێ دو خەت ھەنە، یەک خەتا ئازادیێ یا دن ژی خەتا خیانەت و سیخووریێ یە. ژ بلی ڤان خەتەک دن تونەیە.”
بەرێ خوە بدنێ، جەمیل بایک دەما ڤێ یەکێ دبێژە د جھدە پەدەکێ وەک نوونەرێ خەتا “خیانەتێ” ددە ناساندن. نھا وەک سەری دە ژی ھاتی گۆتن، ھەرکەسێ کو ل باکورێ کوردستانێ سیاسەت کری پەکەکە ناسدکە، دزانە سەرۆکێ پەکەکێ ئۆجالان چ گۆتیە و نەگۆتیە. ژ خوە عەبدوللا ئۆجالان ڤەکری دبێژە دەولەتا ترک: “ھوون مەجالێ بدن من، ئەز ناھێلم بارزانی نەفەسێ بستینە”.
نھا د راستیێ دە ل کوردستانێ دو خەت ھەنە، یەک خەتەک نەتەوی کوردستانیە و یەک ژی خەتا تێکبرنا دەستکەفتێن نەتەوی و کوردستانی یە. راستە پەدەکە نوونەراتیا خەتەکی دکە و پەکەکە و ھەموو ھەڤالبەندێن پەکەکێ نوونەراتیا خەتەکی دکن. ئەڤ یەک ژی گەلەکی ئەشکەرەیە کی نوونەراتیا چ دکە.
نھا خەتەریا سیاسی نە د پەکەکێ و سیاسەتا پەکەکێ یا سیخووری و دژاتیا دەولەتخوازیێ دە یە. خەتەریا مەزن ئەون یێنن کو ژ ئالیەکی ل نالێ و ئالیەک دن ل بزمارێ ددن. خەتەری ئەوێن بێ رەنگن، ئەون کو دکارن ھەموو کەسایەتا خوە (ئەگەر ھەبە) بفرۆشن کورسیەکی د پارلەمەنتۆیا ترکیێ دە یان ژی شارەداریەکی. سەدەم چبە بلا بە، ئالیێن کو، ب سالان پەکەکە و رێخستنێن پێڤە گرێدایی ب توندی رەخنە کرن ھەتا ئەو ب خیانەتێ تاوانبار کرین، ئیرۆ د بن وێنەیێ عەبدوللا ئۆجالان و سەمبۆلێن پەکەکێ دە سیاسەتێ ب سێتەکی ژی دکن ئەو د سیاسەتا تەڤگەرا ئازادخوازا کوردستانێ دە ژ پەکەکێ خەتەرترن.
د ڤی واری دە کێماسیێن پەدەکێ ب خوە ژی ھەنە. دەما پێوەندی ل گەل ئالیێن سیاسی ل بەشێن دن یێن کوردستانێ، کەسایەتان، ھوونەرمەندان، نڤیسکارا و رەوشەنبیرا رە دەینە گەرەک ھندەک پیڤان ھەبن. ئەگەر پیڤان نەبن جارنا مرۆڤ بێ حەمدێ خوە خزمەتا دژبەرێن خوە ژی دکە.
ئەڤ بابەتێ د ڤێ نرخاندنێ دە ھاتین دەستنیشانکرن، مرۆڤ دکارە ب سەدان رووپەلا ل سەر بنڤیسە. لێ نە حەوجەیە کو گەلەک بێ درێژ کرن. وەک دبێژن: “یێ دزانە ژ خوە دزانە، یێ نزانە باقێ نیسکایە”.
