کادرۆیا په‌كه‌كێ هێلین ئومید د هەڤپەیڤینا خوە یا ل گەل یەک ژ ئۆرگانێن مەدیایی یێن په‌كه‌كێ ده گۆت، ئەز په‌ده‌كێ وەکە کورد نابینم. هێلین ئومید ژی وەکە هێلینا ترک د ناڤ په‌كه‌كێ دە تێ ناسکرن. هێلینا ترک چاوا دبە کو یەکی ترک دەربارێ کوردان دە ب بێژە ئەو نەکوردن؟!.
گەلۆ هێلین ئومید کی یە؟
ناڤێ وێ یێ راست نیلۆفەر چۆبانە، د سالا 1978ێ دە ل باژارێ کاستۆمۆن یێ ترکیێ هاتیە دنیایێ. ل ستەنبۆلێ مەزن بوویە. د سالا 1997ێ دە ب رێیا حەزکرییێ خوە تەڤلی په‌كه‌كێ ببوو. ده‌ستپێكێ چوو یەونانیستانێ، پشترە چوو شامێ و ل وێرێ ل گه‌ل ئۆجالان ما. ژ وێرێ ژی شاندن ئەورۆپایێ. پاشی ژی ئەو رێکرن قەندیلێ.
ئەنداما کۆمیتەیا ناڤەندی یا په‌كه‌كێ یە و ب سالان ل گه‌ل مسته‌فا قاراسوو د رێڤەبەریا کۆمیتەیا چاپەمەنیێ یا رێخستنێ دە کار دکە. د ژیانا خوە دە باژارەکێ کوردان ژی نەدیتیە و ژ بلی کوردێن د ناڤا په‌كه‌كێ دە چ کورد نەدیتنە. ئێجا زارۆکا ترکان رابوویە ب بێحورمەتی دبێژە «ئەز په‌ده‌كێ ب کورد نابینم».
دەما په‌ده‌كه هەیی هێژ سەرۆکێ تە ژ دایک نەببوو
بارزانی ئەڤ 150 سالە و په‌ده‌كه ژی ئەڤ 80 سالن شەرێ ئازادییێ دکە. ب هەزاران پێشمەرگە شەهید بوونە. کورد ب پێشەنگیا په‌ده‌كێ فێری شەرێ رزگاری و ئازادییێ بوون. رێبازا بارزانی -په‌ده‌كێ ل هەر چار پارچه‌یێن کوردستانێ بوو چاڤکانییا خەبات و تەکۆشینێ. هەگەر دونیا نها کوردان ناس دکە ب خێرا سەرێ په‌ده‌كێ یە. ب تەکۆشینا په‌ده‌كێ هەرێما کوردستانێ ئاڤا بوو و پەیمانا لۆزانێ شکاند. هێلینا کماخ شکەستی ژی رابوویە و بێرێزییێ ب نرخێن کوردان دکە. ما کی کوردە و کی نە کوردە دێ تو و پارتیا تە دیار بکن هەی بێ ره‌وشت. په‌ده‌كه و بارزانی ب تەکۆشینا 100 سالان کورد و کوردستان ژ نه‌مانێ رزگار کرنە.
دەما کو هێلین ترک و پارتیا وێ نه‌بوون، بارزانی و په‌ده‌كه هەبوون و ل سەر ناڤێ کوردان تێدکۆشین. یێن کو هێلین ترک ژی خوە رە رێبەر دبینە مینا دوران کالکان ژی، ب خێرا په‌ده‌كێ فێری چەک گرتنێ، ئاگر پێخستنێ و ژیانا پارتیزانی بوونە. هێلین ترک د ناڤا په‌كه‌كێ دە ب پالپشتییا مستەفا قاراسوو و دووران کالکان بوویە ئەنداما کۆمیتەیا ناڤەندی. ئەڤ نەجس ئەو قاس سەرخوە دە چوویە ئێجا دخوازە بالانسێ بدە کوردان ژی. په‌كه‌كە نرخێن روومەتێ د ناڤا کوردان دە تونە دکە.
ب راستی ژی ئەڤ بێ ئەخلاقییا هێلین ترک راستیا په‌كه‌كێ ئەشکەرە دکە. دیار دکە کو په‌كه‌كێ چقاس ب پیڤەرێن ئەخلاقی لیستییە.
ئەڤ 40 سالن په‌كه‌كە هەول ددە دەست دانیته سەر هەموو دەستکەفتیێن کوردان. سواربوونا ل سەر پشتا زارۆکێن کوردان نەبەس بوو ڤێجا ترکان ژی سوار دکە. د کیژان تێکۆشینا جیهانێ دە گەلێن سەردەست-کۆلۆنیال د کارین شیرەتان ل گەلێن بندەست بکن؟
ما ئینگلیزەک بچە ناڤ ئیرلاندا و ببە رێڤەبەر دکارە ببێژە “ئەز باوەر ناکم ئەڤ کەس ئێرله‌ندی بە”؟ وەنابێژە…
ئێجا چما ترکێن د ناڤ په‌كه‌كێ دا وه‌ها دبێژن؟ ژ بەر کو په‌كه‌كە نە تەڤگەرەکە کوردەوارییە. بەرووڤاژی تەڤگەرا کۆنترۆلکرنا کوردانە. د بن ناڤێ ئەنتەرناسیۆنالیزم و براتیا گەلان دە ترکان وەکە قەیووم ل سەر کوردان دسەپینە.
شاگردێن یالچین کوچوک ل سەر کارن
ل ئالیەکی سری سوره‌یا ئۆندەر، ل ئالیێ دن فیگەن یوکسەک، ل ئالیەکی هێلین ئومید، ل ئالیێ دن دووران کالکان، ل ئالیێ دن ڤاسڵس یایلال و ل ئالیێ دن ڤەیس سارسوزەن. ئەڤ هەموو ترک وەکە دۆستێن کوردان تێن پێشکێش کرن و ل سەر مەدیا کوردی دەستهلاتن. موسیبەتا هەری مەزن ئەوە کو ئەڤ گورگێن ب کەڤلێ میهێ ل خوە کرنه، وەکە نوونەرێ کوردان د ئاخڤن.
هەر گەلێ مەزلووم و بندەست خوەدی دۆستێن وسانە. هەموو ژی کەسێن بێرێز، بێئەخلاق و بێره‌وشتن. مخابن هەول ددن بندەستان بکشینن هەقیقەتێ (!).
هەڤسەرۆک یالچین کوچوک و جیگرێ وی سری سورەیا ئۆندەر
په‌كه‌كە ژ بۆ کەسێن وه‌ها کەشتیەکە پر باشە. ل کو دەرێ دژمنێن وه‌ها دۆست هەبن، د بن سه‌یوانا په‌كه‌كێ و سازیێن وێ دە، د بن ناڤێ هەڤکاریێن سیاسی یێن وەکە براتیا گەلان، ئاڤاکرنا دەمۆکراسیا هەڤپار، تێکۆشینا هەڤپار، ترککرن و هتد.، د بن سه‌یوانا په‌كه‌كێ دە ئێریشی کوردان دکن. په‌كه‌كە و سازیێن وێ بوونە هێلینا ڤان کەسێن بێ ناسنامەیا ئەخلاقی. ئێریشی ناسنامە، دیرۆکی و رابردوو یا کوردان دکەن.
په‌كه‌كێ ژ سالێن 1980یی ڤە هەموو قادێن خەباتا خوە، ب تایبەتی چاپەمەنی ژ کاربدەستێن دەولەتا ترک، میسیۆنەر و کرێگرتیێن وها رە ڤەکری یە. یالچین کوچوک ناڤەکی دێرینێ دەولەتێ یە. د ناڤبەرا سالێن 1990-1999ان دە ب ئۆجالان رە مینا هەڤسەرۆکەکی خەبتین. ل پشت ئێریشا په‌كه‌كێ یا سالێن 1990ێ یا ل سەر کوردستانێ دیسا یالچین کوچوک هەبوو. بەرپرسیارێ پەیوەندیێن دەولەتا ترک و په‌كه‌كێ بوو. دنیا هەموو ڤێ دزانە. پاشێ شوونگرێن یالچین کوچوک دەرکەتن هۆلێ. سری سورەیا ئۆندەر د ناڤ ڤان کاربدەستان دە یەک ژ سەرۆکێن مەزنە. تلییا وی د ناڤا كاره‌ساتێن وەکە شەرێ خەندەکان دە هەیە. درووشما «ئەمێ تە نەکن سەرۆک» ژی وی ب سەلاحددین دەمیرتاش دا گۆتن.
ترکێن نوونەرێن دەولەتێ یێن د ناڤا په‌كه‌كێ دە جڤیایی دبێژن کوردێ نەتەوپەرەست خرابن، په‌ده‌ك خرابە، یێ کو پڕ ب کوردی د ئاخڤە خرابە، یێ کو گرانیێ ددە کوردایەتیێ خرابە، یێن کو دبێژن بلا کورد خوە ب رێڤە ببن و دڤێ دەولەتەکە وان یا جودا هەبە، خرابن. ب کورتی ئەڤ میسیۆنەرێن دەولەتێ د ناڤا په‌كه‌كێ دە ئەرکدارن. ل سەر پشتا کوردان بوون خوەدی کورسی، پەرە و ناڤ. کوردێن دژ ڤان نوونەرێن دەولەتا ترک رادبن تێن تەشهیر کرن.
لێ بەلێ ئەم دبێژن ئەڤ ترکێن وەکە دۆستێن کوردان خوه‌یا دكه‌ن نکارن ببن دۆستێ کوردان. و مینا وێ پەیڤا د پرتووکا گریگۆری پەترۆڤ یا ب ناڤێ وەلاتێ زامباک دە گۆتی؛ “یا خوەدێ، تو من ژ دۆستێن من بپارێزە، ئەزێ خوە ژ دژمنێن خوە بپارێزم”.
