پەیاما ئۆجالان یا نەورۆزێ، قیرینا ئازادیێ یان پەیمانا تەسلیمبوونێ؟
داخویانیێن عەبدوللا ئۆجالان یێن کو ھەر سال د دەما نەورۆزێ دە تێن بەلاڤکرن، ئێدی نە تەنێ پەیامێن جەژنێ نە، بەلکو ئەو ڤەگوھەرینە مانیفەستۆیەکا ئیدەۆلۆژیک کو د بنگەھا خوە دە “سەرخوەبوونا کوردستانێ” بناخ دکە. ئەڤ داخویانی، ل شوونا کو داخوازێن نەتەوەیی یێن گەلێ کورد بینە زمان، ب زمانەکی نهێنی و رۆمانتیک ھەول ددە کوردان د ناڤ سینۆرێن “میساقا مللی” و بەرژەوەندیێن دەولەتا ترک دە ئاسێ بکە.
د ڤێ داخویانیا داوی دە ژی تێ دیتن کو ئۆجالان ب توندی ئێریشی کۆنسەپتا “نەتەوە-دەولەتێ” دکە. لێ ئەڤ رەخنە نە ژ بۆ ھەموو دەولەتانە؛ ئەو تەنێ ژ بۆ کوردانە کو مافێ وان یێ دەولەتبوونێ ژ دەستێ وان بگرە. دەما ئۆجالان سینۆران وەکی “خەیالی” پێناسە دکە، ئەو د راستیێ دە سینۆرێن ترکیەیێ یێن کو ب زۆرێ ل سەر ئاخا کوردستانێ ھاتنە نەخشاندن، رەوا دکە و و داخوازا سەرخوەبوونێ وەکی “پاشڤەرووتیێ” نیشان ددە. ئەڤ نێزیکاتی، ل شوونا کو ببە خزمەتا ئازادیا کوردان، دبە مەرتالەکی ئایدۆلۆژیک ژ بۆ یەکپارچەییا دەولەتا ترک.
ئۆجالان ب داخویانیێن خوە یێن نەورۆزێ، ب ئەشکەرەیی دەست ژ دۆزا دەولەتبوونا کوردان بەردایە. ب شەرمەزارکرنا “نەتەوە-دەولەتێ” وەکی بەرھەمەکێ کاپیتالیزمێ، ئەو د راستیێ دە مافێ کوردان یێ دەولەتبوونا ل سەر خاکا وان ژ دەستێ وان دگرە.
“بناخکرنا خەیالا “کوردستانا سەربخوە
زمانێ “براتیا گەلان” و “سەدسالا ترکیەیێ” کو ئۆجالان وەکی ئەلتەرناتیف پێشنیار دکە، د راستیێ دە پرۆژەیا ئاسیمیلاسیۆنا نەرم و “تورکیەبوویینێ”یە. ئۆجالان ب ڤێ داخویانیێ کوردان د ناڤا سینۆرێن سیاسی یێن ترکیەیێ دە زیندانی دکە. ئۆجالان د بن ناڤێ “براتیا گەلان” دە، ناسنامەیا نەتەوەیی یا کوردی دحەلینە و کوردان وەکی “دینامیکا دەمۆکراتیککرنا ترکیەیێ” بکارتینە. ل شوونا کو کورد ببن خوەدی ستاتویەکا سیاسی یا سەربخوە، ئەو وان دکە “دینامیکا دەمۆکراتیککرنا ترکیەیێ”. ب ڤی ئاوایی، خوینا کوردان ژ بۆ کو ترکیە ببە دەولەتەک “دەمۆکراتیک” تێ رژاندن، نە ژ بۆ کو کوردستان ئازاد ببە.
د بەشەکا دن یا پەیاما خوە دە، ئۆجالان، بەحسا روحا “ئەم” دکە و دبێژە، ” تێگەھا ‘ئەم’ د حەرەکا دیرۆکێ یا ڤان خاکان دە خوەدی واتەیەکا گرینگ و بەرفرەھە. لێ ئیقتیدارێن بژارتە ئەڤ تێگەھ تەنگ کرنە و داخستنە ‘یەک’ێ. ئێدی دەما وێ ھاتیە کو ئەم روح و پراکتیکا بەرێ دیسا بدن تێگەھا ‘ئەم’ێ. لێ بەلێ، ئەڤ “ئەم” یا کو ئۆجالان قالا وێ دکە د راستیێ دە “نەتەوەیا ترک” یا نووژەنکرییە. ب راکرنا سینۆرێن ئەتنیکی د بن ناڤێ “نەتەوەیا دەمۆکراتیک” دە، ئۆجالان ناسنامەیا کوردی د ناڤ دەریایا “گەلێن رۆژھلاتا ناڤین” دە دحەلینە. ئەڤ یەک د وارێ پۆلیتیک دە ھەری زێدە خزمەتا دەولەتا ترک دکە، ژ بەر کو داخوازێن ئەتنیکی یێن کوردان لاواز دکە.
بەلێ، ئۆجالان ژ ئیمرالیێ ڤە مینا شێورمەندەکی ستراتەژیکێ دەولەتێ تەڤدگەرە. ب داخوازا “ڤەگەرا ل روحا دیرۆکێ”، ئەو کوردان ژ داخوازێن وان یێن مۆدەرن و سیاسی دوور دخە و وان د ناڤ “رۆمانتیزما مەزۆپۆتامیایێ” دە دفەتسینە. ئەڤ سیاسەتا پاسیفیزاسیۆنێ، د دەما کو ئێریشێن ل سەر دەستکەفتیێن کوردان بەردەوام دکن، تەنێ رێ ل بەر پۆلیتیکایێن دەولەتێ خوەش دکە.
ئۆجالان د ڤێ پەیاما خوە دە وەکە هەرجار ھەول ددە کوردان ل گۆری بەرژەوەندیێن نوویێن گلۆبال و ھەرێمی یێن ترکیەیێ “دیزاین” بکە. ب ڤی ئاوایی، تەڤگەرا کوردا کو وەکی مەترسیەک ژ بۆ یەکپارچەییا ترکیەیێ دھات دیتن، ڤەدگوھەرە “پارێزڤانێ سینۆرێن میساقا مللی” د بن ناڤێ “جڤاکا دەمۆکراتیک” دە.
لۆما ئەم دبێژین، پەیاما نەورۆزێ یا ئۆجالان، بێتری کو ببە قیرینا ئازادیێ، وەکی “پەیمانا تەسلیمیەتێ”یا ل ھەمبەری سینۆرێن ھەیی خویا دکە. د دەما کو گەلێن جیھانێ ژ بۆ سەروەریا خوە تێدکۆشن، ئۆجالان ژ کوردان رە “بێدەولەتبوونێ” و “براتیا ب زۆرێ” وەکی سەرکەفتن نیشان ددە.
