نیقاشا د ناڤ ھەڤپەیمانیا رۆژھلاتێ کوردستانێ دە: گەلۆ پژاک ھەڤکارەکی باوەرپێکرییە؟
پێنج پارتیێن کورد ل رۆژھلاتێ کوردستانێ د 24ێ سباتێ دە دامەزراندنا “ھەڤپەیمانیا ھێزێن سیاسی یێن کوردستانا ئیرانێ” راگھاندن. ئەندامێ ھەری ناکۆکێ ڤێ ھەڤپەیمانیێ پژاکە.
ژ بەر کو رابردوویا پژاک نەزەلالە و د ئۆپەراسیۆنێن تاری دە ھاتیە بکار ئانین، ھەبوونا وێ دناڤا ھەڤپەیمانیەک ئەوقاس گرینگ دە، ژ بۆ کوردان ب گومانە.
چما پژاک د بن تاریتییێ دەیە؟
پژاک نە تەڤگەرەک ژ رۆژھلاتێ کوردستانێیە. ئەو ل سەر تەعلیماتا ئۆجالان ژ گرتیگەھا ئیمرالیێ فرێکری ژ ھێلا برایێ وی عۆسمان ئۆجالان ڤە ھاتە دامەزراندن و پاشێ رادەستی جەمیل بایک ھاتە کرن. د کۆنگرەیا دامەزراندنێ دە، جوانێن ژ رۆژھلات پر کێمبوون. ھەمی کادرۆ ژ باکور بوون. ئەڤ ھین ژی وسایە. ھەر چەند ناڤێن وەکی ڤیان پەیمان ل سەر ئەکرانێنە ژی، ئەو ھەمی کادرۆیێن پەکەکێ نە و ژ دەرڤەیی ئایدۆلۆژیا پەکەکێ ت زانینا وان یا گشتی و سیاسەتێ تونەیە. مەزلووم ھەفتەن ب سالان پزیشکێ تایبەتیێ جەمیل بایک بوو.
ئانگۆ، کەسێن کو ژێ رە دبێژن رێبەرێن پژاکێ د بن ئەولەھی و فەرمانداریا جەمیل بایک دە نە. بێ دەستوورا پەکەکێ ئەو نکارن جھێ پێلاڤەکێ ژی بگوھەرن. د ڤێ قۆناغا ھەستییار دە، بێ گومان، ئەو دێ بەرژەوەندیێن پەکەکێ بپارێزن، نەیێن گەلێ کورد.
ھەر کەس دزانە کو جەمیل بایک نوونەرتیا باسکێ ئیرانی یێ ناڤا پەکەکێ دە دکە. بایک د سالا 2004ێ دە ب ئیرانێ رە پەیمانەک ستراتەژیک چێکر. د سالا 2013ێ دە، پەکەکە تەڤلی پرۆژەیا ھەرێمی یا ئیرانێ بوو. بایک دو جاران لگەل فەرماندارێ ناڤدارێ ئیرانێ قاسم سلێمانی جڤیا. د سالا 2019ێ دە، د ھەڤپەیڤینەکا خوە دە جەمیل بایک ب ئەشکەرەیی گۆت کو “پەکەکە ئاستەنگیەکە ژ بۆ ھەڤپەیمانیا دژی-ئیرانێ”، بایک د ڤێ ئاستێ دە ئیران پارێزە.
و ئەڤ کەسێ ھەڤکارێ ستراتەژیکێ ئیرانێ، ئانگۆ جەمیل بایک، پژاکێ ب رێ ڤە دبە.
پژاک سیبەرا جەمیل بایک و پەکەکێ یە.
ب سالانە ئیران ھەول ددە کو ب ئاڤاکرنا پژاکێ ل دژی رێخستنێن کوردی یێن وەکی پەدەکی، پاک و کۆمەلەیێ، کوردێن ل رۆژھلاتێ کوردستانێ کۆنترۆل بکە.
ئیران بێناڤبەر بارەگەھێن رێخستنێن دن یێن رۆژھلاتی ل ھەولێر، سلێمانی و کۆیەیێ ب مووشەکان بۆمبەباران دکە.
لێبەلێ، پژاک ب سالانە ل دۆلا عەیشێ، بەردە نازێ، زەلێ، ماوە، خرپاپێ، دۆلا توویێ، دامبات، کێلە رەشێ، پێنجوین و ئاسۆسێ، کو تەنێ 2-3 کم ژ بارەگاھێن پاسداران دوورن، ب دەھان کامپ ئاڤا کرنە. گومرکێ داتینن و باجێ ژ خەلکێ دستینن. ل ئالیێ دنێ سینۆر، ل مەرگەڤەر، دامبات و کەلا رەش ب ئۆتۆمۆبیلان دگەرن. گەلۆ تەنێ جارەکێ ئێریش ل وان ھاتیە کرن؟ نا. چما؟
ژ بەر کو ئیرانێ ئەرکێ پاراستنا سینۆرێن خوە دایە پەکەکێ-پژاکێ. پژاک وەکە پاساوانێن سینۆری ل سەر حەسابا ئیرانێ ل دژی پەدەکی، پاک و کۆمەلەیێ سینۆرێ ئیرانێ دپارێزە. د 24ێ گولانا 2014ێ دە، پژاک لگەل پەدەکی، کو تەڤگەرەکا نوو ب ناڤێ راسان ل دژی ئیرانێ دابوو دەستپێکرن، پەڤچوونەک چێکر و دو پێشمەرگەیێن وێ شەھید کرن.
پژاکا خوەدی رابردوویەک وسا ئیرۆ دکارە چ ھەلوەستێ بگرە؟ ئەو دێ تەنێ وەکی ھێزەکێ کو پەکەکە پێ تەمەنێ خوە درێژ بکە دێ هێت بکار ئانین.
ئیرۆ، پەکەکێ ھەمی کادرۆیێن خوەیێن باکوریێن کو ل رۆژئاڤا بوون ڤەکشاندنە و د بن سیوانا پژاکێ دە بجیهکرنە و مەدیایا خوە ژی بۆ پرۆپاگاندایا پژاکێ ئەرکدار کریە. یانی، پەکەکە ل بەندێیە کو کا دێ ناڤا ڤێ ئالۆزییێ دە چ بکەڤە دەست وێ.
تەڤلیبوونا پژاکێ د ھەڤپەیمانیا د ناڤبەرا رێخستنێن رۆژھلاتێ کوردستانێ دە، ئان ژی پاراستنا ڤێ ھەڤپەیمانیێ ژ یێن دن بھێزتر، ئەرک و راستییا پژاکێ ناگوھەرینە.
مەسەلەیا ئەساسی ئارمانجا دامەزراندنا پژاکێ و پرسا کا خزمەتا کێ دکەیە. بێیی بەرسڤا ڤێ پرسێ، تو ھەڤپەیمانی نکارە باوەریەک راستین ئاڤا بکە، و گومانێن ل سەر پژاکێ نایێن راکرن.
