Skip to contentشه‌رم ژى ناكن
ناڤه‌ندا راگهاندنا پارتیا كاركه‌ران ل مالپه‌را خوه ئانفێ راگهاند كو چه‌كدارێن پارتیێ ب بوونه‌یا نێزیكبوونا 15ی ته‌باخێ، شه‌ره‌كی دژوار ل مه‌تینایێ ئه‌نجام دا.
یا راست وه‌ختا ئه‌ڤ نووچه كه‌تیه به‌ر چاڤێن من، ئه‌ز وه‌ك كورده‌كی باكور من پڕ شه‌رم ژ خوه كر، ژ به‌ر كو من فكر ل ده‌ستپێكا ئاڤابوونا باسكێ له‌شكرى یێ پارتیا كاركه‌ران كر كانێ ل وێ ده‌مێ ژ بۆی چ ئارمانجه‌كێ ته‌ڤدگه‌رییا و نها ژ بۆی چ چ ته‌ڤدگه‌ره.
قه‌ی تیمین گێریلا ل چیایێ مه‌تینایێ چ دكن؟ چما گێریلا ل چیایێ مه‌تینایێ جانێ خوه فه‌دا دكن؟ چما گێریلایان یێكه‌م گوللـه ل چیایێ مه‌تینایێ ئاراسته‌ى پێشمه‌رگه‌هێن كوردستانێ كر؟ گه‌لۆ چیایێ مه‌تینا ل كویه؟ چما وه‌ختا ئارتێشا ئیراقا سه‌رده‌ما حیزبا به‌عس ل ور گێریلا ئێریشی وان نه‌دكر؟
پشتى پێشمه‌رگه‌هێ كوردستانێ ل سالا 1991ێ باشورێ كوردستانێ ژ ره‌ژیما سه‌ددام ئا فاشیست رزگاركرى و گوند، باژارۆك و باژێرێن كوردستانێ به‌ر ب ئاڤه‌ندانیێ ڤه گاڤ ئاڤێتی، ل سالا 1994ێ پارتیا كاركه‌ران شه‌ر فرۆشته پێشمه‌رگه‌هێن كوردستانێ و هه‌ژماره‌كه زۆر ئا شه‌هید و برینداران ژ هه‌ردو ئالییان كه‌تن، ئێنجام پارتیا كاركه‌ران د شه‌ر ده راستی شكه‌ستنێ هات و د شكه‌فتێن قه‌ندیلێ ده جیهـ بوون، پشتره په‌یمانا ئاشتیێ د نێڤبه‌را حكوومه‌تا باشوورێ كوردستانى و پارتیا كاركه‌ران ده چێبوو و ئه‌ڤ په‌یمان ل سه‌ر بنگه‌ها نه‌بوونا گێریلا بوو ل باشوورێ كوردستانێ.
پشتى وێ په‌یمانێ جاره‌كه دن سه‌رۆكێ كوردستانێ ژ رێبه‌رێ پارتیا كاركه‌ران عه‌بدوللا ئوجا‌لان پرسى: قه‌ی چما وه ئه‌و شه‌ر ل دژی مه كر ؟ ئۆجالان د به‌رسڤێ ده گۆ كو: ئه‌و شاشێتیه‌ك بوو ژ هێلا پارتیا كاركه‌ران ڤه هاتیه ئه‌نجام دایین و دوباره نابه.
جاره‌كه دن باشوورێ كوردستانێ ده‌ست ئاڤێت ئاڤه‌دانییا وه‌لات و به‌ر ب ئاسۆیێن گه‌ش ڤه چوو و هه‌یا سالا ێ2014 پرانییا گوند، باژارۆك و باژێرین باشوور د گه‌شه‌دانێ ده بوون، تایبه‌ت ژ روویێ چاندنیێ و د ڤێ سالێ ده رێخستنا ته‌رۆرێ یا داعشێ شه‌ره‌كی خویناوى ل باشوورێ كوردستانێ ل دژى ستاتۆیا هه‌رێما كوردستانێ ئه‌نجام دا و حكوومه‌تا كوردى نه‌چار ما هه‌موو هێزێن خو یێن له‌شكرى ل چیایێن كوردستانێ ڤه‌كشه و برن ئه‌نیێن شه‌رێ ل دژى داعشێ.
ژ ئه‌نجاما نه‌بوونا هێزێن له‌شكرێ كوردستانێ ل چیایێن باشوور، پارتیا كاركه‌ران ئه‌ڤ یێك فه‌رسه‌نده‌ك ژ بۆی خوه زانی و هێزێن خوه ژ شكه‌فتێن قه‌ندیلێ ده‌رخستن و برن هه‌رێمێن كو به‌رێ پێشمه‌رگه لێ بوون و جیهـ بوون، پارتیا كاركه‌ران باره‌گه‌هێن خوه ب ئاوایه‌كی ئه‌شكه‌ره دانان و كۆمارا زاپێ راگهاندن و هنه‌ك رێڤه‌به‌رى دانان و په‌رله‌مانه‌كی كارتوونی ژی ل ئه‌ورۆپایێ چێكرن، ئه‌ڤ ژى بوو هنجه‌ته‌كه یاسایی كو ده‌وله‌تا ترك شه‌رێ خوه ده‌رباسی باشوورێ كوردستانێ بكه و پرانییا چیایێن باشوورێ كوردستانێ داگیر كرن و پارتیا كاركه‌ران جارنا مینا زركێتكا خوه ده‌ردئێخه ژ بۆ كو ئارتێشا ترك وێ ببینه و پشتره د ره‌ڤه و ئارتێشا ترك ل په‌ی وێ دچه و هه‌رێم ب هه‌رێم داگیر بكه.
ل شه‌ڤا 11 ل سه‌ر 12 ته‌باخا ئیسال 2023ان چه‌كدارێن پارتیا كاكه‌ران جاره‌كه دن مینا زركێتكا خوه ده‌رخست لێبه‌لێ ئه‌ڤجار نه‌چوون ل دژى ئارتێشا تركیێ شه‌ر بكن، لێ هه‌ولدان كو ب پێشمه‌رگه‌هێ كوردستانێ ڤه‌ده‌ن، لێ خوش به‌ختانه چ زیان ب پێشمه‌رگه‌ى نه‌كه‌تن.
