پەکەکە یا کو ب کوشتنا کوردان، ب کوشتنا عەشیر، رێخستن و پارتییێن کوردان دەست ب شەرێ چەکداری کری، ھەتا ئیرۆ رایەدارەک یان رێڤەبەرەکی پارتییێن دەولەتێ نەکوشتیە و زرار نەدایە دەزگەھێن دەولەتا ترک. پەکەکە یا کو کەتیە خوینا ب دەھان ھەزار کوردان، دگەل دەولەتا کوور دە شەرەکی ب شێور و مشێور دمەشینە و ئیرۆ ژ بۆ پێشکەتنا تەکۆشینا نەتەوی و دامەزراندنا کوردستانەک سەربخوە بوویە ئاستەنگا ھەری مەزن. پەکەکە یا کو د شەرێ 40 سالی دە باکورێ کوردستانێ وێران کری، بوو سەدەما شەوتاندنا 4-5 ھەزار گوند و کۆچبەربوونا زێدەیی 10 ملیۆن کوردان، ھەتا ئیرۆ ل باکورێ کوردستانێ کۆخکەک مریشکان ژی ئازاد نەکریە و دەستکەفتنەک بەربچاڤ ب دەست نەخستیە.
پەکەکێ چاوا کو باکورێ کوردستانێ تار و مار و وێران کر، ئیجار بەرێ خوە دایە دەستکەفتییێن باشوور و رۆژئاڤایێ کوردستانێ و دخوازە ھەمان مالوێرانییێ ب سەرێ ڤان ھەر دو بەشێن کوردستانێ ژی بینە. ھەر چقاسی پەکەکە د سەری دە ژ بۆ کوردستانەک ئازاد و سەربخوە دەرکەتبە ھۆلێ یان ژی کورد ب ڤان سلۆگانان خاپاندبن ژی، ئیرۆ وەک ئاڤا زەلال ئەشکەرە بوویە کو پەکەکە نە ژ بۆ ئازادییا مللەتێ کورد و نە ژ بۆ کوردستانەک سەربخوە دەرکەتیە ھۆلێ. ھەموو رێڤەبر، بارۆن و قەیوومێن کو سەرکێشییا پەکەکێ دکن و کەچ و خۆرتێن کوردان ژ بۆ ئارمانجێن خەیالی و پووچ ددن کوشتن، پر ڤەکری و ئەشکەرە نەیارتییا کوردستانەک سەربخوە دکن و دوپات دکن کو ئەرک و وەزیفەیا وان و گەریلایێن وان پاراستنا سینۆرێن دەولەتێن داگیرکەرە و سەدەما نەیارتی و دژمناتییا وان یا ل ھەمبەر پەدەکێ و بارزانییان ژی ژ بەر ترس و نەیارتییا دامەزراندنا کوردستانەک سەربخوەیە.
دگەل گرتنا ئۆجالان پەکەکە و ئۆجالان نییەت و ئارمانجا خوە یا کو ب دەھان سالان د دلێ خوە دە ڤەشارتی ھشتبوون و کورد ب سلۆگانێن ئازادی و سەرخوەبوونێ خاپاندبوون، ئەشکەرە کرن. پشتی کو ئۆجالان ھاتیر گرتن (گرتنا وی و گەرا وی یا ئەرد و ئاسیمانان ب خوە ژی سەناریۆیەک ژ پلان و پرۆژەیێن دەولەتێ بوو) ل ھەر تشتی مکور ھات و د دیرۆکا تەڤگەرێن ئازادیخواز دە بوو “مکورکەر” و “ئیتیرافکارێ” ھەری مەزن. ئۆجالانێ کو داییکا خوە ژی کر ترک، تەکۆشینا ژ بۆ کوردستانەک سەربخوە ئاڤێت تەنەکا زبل و ئەرکا خوەیا ھەری داوی پێک ئانی و ب ئەشکەرەیی بوو خزمەتکارێ دەولەتا ترک. ئێدی ژ دەرڤەیی ئالیگر و مریدێن ئۆجالان و پەکەکێ، ھەموو کورد ب گشتی دزانن کو ئۆجالان زلامێ دەولەتێیە و پەکەکە ژی چەتەیا چەکدارا دەولەتێیە.
ئۆجالان پشتی گرتنا خوە نەتەو-دەولەت و کوردستانەک سەربخوە ل کوردان حەرام کر. بارۆن و قەیوومێن پەکەکێ ژی ب ھەمان سیاسەت و ئارمانجێ کورد ژ رێ دەرخستن و بەرێ کوردان دان ترکییەیەک دەمۆکراتیک و ترکییەییبوونێ، براتییا گەلان و بشافتنێ. ژ بۆ کو ھشمەندی و ھەستێن نەتەوی ژ دل و مەژییێ کوردان دەرخە ھەر تشت کرن و دکن. د سەری دە چاند و زمان، چ نرخەکی پیرۆز ھەبە بنپێ کرن، بێ واتە و بێ ناڤەرۆک کرن. دەولەتا کو نکاریبوو ب سەدێ سالان کوردان ئاسیمیلە بکە و ترکایاتییێ ب وان شیرین بکە، ئۆجالان و پەکەکێ د ناڤا 40 سالی دە کر و کورد ب ترکییێ ڤە پینە کرن. ژ بۆ کورد ل رۆژئاڤا نەبن خوەدییێن ستاتویەک کوردی یان نکاربن دۆزا فەدەراسیۆن یان سەرخوەبوونێ بکن، کانتۆن ئاڤا کرن و ھەموو خەلکێن بیانی کرن شیریکێن رۆژئاڤایێ کوردستانێ. رۆژئاڤا ژ کوردان ڤالا کرن و کەمبەرا عەرەبی یا دویەم ئاڤا کرن. ب ھەمان ئارمانجێ دخوازن دەستکەفتییێن باشوورێ کوردستانێ ژی تێک ببن و باشوورێ کوردستانێ د ناڤبەرا خوە و دەولەتا ترک دە بکن قادا شەر.
یەک ژ بارۆن و قەیوومێن پەکەکێ دوران کالکان (کو ب خوە ترکێ ئادانایێ یە و هەموو مالباتا وی نیژادپەرەست و ئالیگرێن مەھەپێ نە) ژ سازییەک چاپەمەنییا نێزیکی پەکەکێ رە راگھاند کو ژ 15 تەباخا 1984 ھەتا نھا 50 ھەزار پەکەکەییان ژیانا خوە ژ دەست دانە و دبێژە: “ئەڤ تێکۆشینا 39 سالان ب سەرێ خوە پێک نەھات. بھایەک خوەست، کوردان ژی دا. ڤیەتنامییان ل دژی ژاپۆن، فرانسا و ئامەریکایێ شەر کرن. کورد ل دژی ھەموو ناتۆیێ شەر دکن”. بێگومان ترکێن وەک دوران کالکان، موستەفا کاراسو، رزا ئالتون، ئەرتوگرول کورکچو، یالچن کوچوک، دۆغو پەرینچەک، فیگەن یوکسەکداغ و ب سەدان ترکێن کو د ناڤ پەکەکێ و ھەدەپێ دە سەرکێشییا کوردان دکن و قەیوومێن دەولەتێ نە، هەم ل سەر خوینا زارۆکێن کوردان دچەرن، ھەم ژی ل سەر پشتا کوردان نانێ خوە دخون، ھەم ژی ئاراستەیێ تەکۆشینا کوردان خستیە دەستێ خوە و ل گۆر بەرژەوەندییێن دەولەتا خوە (دەولەتا ترک) ھەسپێن خوە دبەزینن.
باشە، گەلۆ رۆژەکێ کورد ژ دوران کالکان ناپرسن و نابێژن “مادەم ھوون ل دژی نەتەو-دەولەتێ نە، مادەم ھوون ل دژی کوردستانەک سەربخوە نە، مادەم ھوون دۆزا ترکییەیەک دەمۆکراتیک و ترکایەتییێ دکن، وە ئەڤ 50 ھەزار کەچ و خۆرتێن کورد چما و ژ بۆ چ دان کوژتن؟ ھوون بارۆن و قەیوومێن دەولەتێ ژ کوردان چ دخوازن؟”.
ئۆجالان گۆتبوو “مە 15-17 ھەزار ئینفازێن ناڤخوەیی کرنە. ئانکو، مە 15 ھەتا 17 ھەزار ھەڤالێن خوە کوشتنە. 50 و 17 دکن 67 ھەزار گەریلایێن کورد. و ھەگەر ئەم کوردێن سڤیلێن کو د ناڤا 40 سالان دە ژ ئالی پەکەکێ و دەولەتێ ڤە ب شێور و مشێور ھاتنە کوشتن حەساب بکن، ئەڤ ھەژمار خوە دگھینە 150-200 ھەزار کەسان. ئەڤ یەک ددە خویاکرن کو ئارمانجا پەکەکێ قەت نەبوویە کورد و کوردستان و د کریارێن خوە دە ژ رۆژا رۆژ دە خزمەتا دەولەتا ترک و دەولەتا ئەرمەنستانێ کریە. ڤالاکرنا باکورێ کوردستانێ د سەری دە خزمەتا دەولەتا ترک دکە، ژ بەر کو کورد کۆچبەری مەترۆپۆلێن ترکییێ دبن، زمانێ خوە ژ بیر دکن، ئاسیمیلە دبن و دبن ترک. دویەم خزمەتا ئەرمەنستانێ دکە، ژ بەر ئەرمەنی باکورێ کوردستانێ وەک پارچەیەک ژ خاکا ئەرمەنستانا مەزن دبینن و دخوازن باکورێ کوردستانێ ژ کوردان ڤالا و خالی بکن.
پەکەکێ د شەرێ 40 سالان دە ب پلان و پرۆژە خزمەتا پرۆژەیێن ڤان ھەردو وەلاتان کریە و مخابن ھەتا ب ئاستەک بلند گھایە ئارمانجا خوە. پەکەکە نە تەنێ خزمەتا ترکییێ و ئەرمەنستانێ دکە، ھەروەھا بوویە دەرگەڤان و پارێزەرێ سینۆرێن ئیران، ئیراق و سوورییێ ژی. ئۆجالان بێی سەبەب نەدگۆت “ئەم پارتییەکا قۆنتراتچینە”. پەکەکە ژ دەرڤەیی بەرژەوەندییێن کورد و کوردستانێ بازرگانیا ھەرکەسی دکە، ژ دەرڤەیی کورد و کوردستانێ دۆستانی و ھەڤالتییا ھەرکەسی، ھەر مللەتی، ھەر وەلاتی دکە. ژ بەر ڤێ یەکێ ژی کوشتنا 50 یان 100 ھەزار گەریلایێن کورد نە د خەما پەکەکێ و بارۆنێن پەکەکێ دەیە.
رۆژەڤاکورد
