شیرۆڤەیێن سەردانا هەڤکارێ بەرێ یێ كه‌جه‌كێ و بیناهیا چاڤێ ئاپۆ هاکان فیدان

سەردانا شێوه‌رمه‌ندێ بەرێ یێ میتێ و وەزیرێ دەرڤە یێ ترکیێ هاکان فیدان بۆ بەغدایێ، بوو مژارا سەرەکی یا رۆژەڤێ. هەلبەت ل گەل مژارێن ئیراق – کوردستان و ترکیێ، مژارا په‌كه‌كێ ژی هاتییە رۆژەڤێ. فیدان ئیرۆ ل گه‌ل رایەدارێن هەرێما کوردستانێ ژی هەڤدیتن کرن. دێ راستتر بیت کو مرۆڤ ئەنجامێن سیاسی یێن ڤێ سەردانێ پاشی ل بەر چاڤان بگریت.

لێ وەک هەر جار په‌كه‌كێ د مەدیایا خوە دا ل سەر ڤێ مژارێ گالگالا خوە بەردەوام کر. سیناریۆ نڤیسین، کارمەندێن خوە دەرخستنه‌ سەر ئەکرانان و سیناریۆیێن خیانەتێ بلێڤکرن. لێ کۆمیتەیا په‌یوه‌ندیێن دەرڤە یا كه‌جه‌كێ داخویانی دا و گۆت: «هێزا کو هاکان فیدان رازی کری کو بهێته‌ ئیراقێ په‌ده‌كه‌ یه‌. په‌ده‌كه‌ دخوازە ئیراق و ترکیێ نێزیکی هەڤ بکەت دا کو ب هەڤ رە په‌كه‌كێ ژ ناڤ ببه‌ن». واته‌ په‌كه‌كێ جارەکە دن په‌ده‌كە کره‌ هەدەف. ئیدیعا کر کو هاکان فیدان و بارزانی هەڤالێن هەڤن. گەلۆ ئەڤ یه‌ك راستە؟ هەلبەت نه‌.

ئاکتۆرێ سەرکی یێ حکوومەتا هەرێما کوردستانێ و رۆژهلاتا ناڤین بارزانی ل هەمبەر سەردانا هاکان فیدان نە خەمساره‌. تێکلی و ناکۆکیێن هەردو ئالیان هەنە. لێ هاکان فیدان بیناهییا چاڤێ ئۆجالانە، نە یا بارزانییانە.

دوهـ کۆمیتەیا په‌یوه‌ندیێن دەرڤە یا کجکێ داخویانیەک دا و بەحسا «چالاکیێن هاکان فیدان كرن دەما كو ئه‌و شێوه‌رمه‌ندێ میتێ بوو». د وێ پۆستێ دا فیدان ژ بۆ دەولەتا ترک كارێن گه‌له‌ك گرنگ مەشاندن. د ڤێ دەربارێ دا سەرۆکۆمار ئەردۆگان د 9ێ تەباخێ دا «میدالیا خزمەتا بلند یا دەولەتێ» دا وەزیرێ کارێن دەرڤه‌ هاکان فیدانی. فیدان 13 سالان زێدەتر د میتێ دا وەزیفەیا شێوه‌رمه‌ند و نوونەرێ تایبەتێ سەرۆکۆماریێ کر. د ڤێ میدالیا سەرکەفتنا هاکان فیدان دا، ب راستی ژی پارا په‌كه‌كێ هەیە. دەما پێویست دكر ئاگربەست ئیلان دكر، د دەما بەرخوەدانا گەزیێ دا بێدەنگ ما، گوهەرتنا دەستوورا بنگەهین پەژراند و هەتا داویێ پشتگری دا ئاكه‌پێ و فیدانی.

كه‌جه‌كه‌ هزر دكه‌ت کو ئەم هەموو بێ هشوبیرین. لێ ئەم وان دەمان ژ بیر ناکه‌ین کا ئۆجالان و په‌كه‌كێ چاوا پەسنا هاکان فیدان ددا و ئەو بۆ خوه‌ وەکە «رۆل مۆدەل» د پەژراند. ل دەمەکی ئەڤ رەوش هات ئاستەکێ وه‌ها کو دەما كادرێن هه‌ده‌پێ و په‌كه‌كێ ب هەڤرە د ئاخڤین، د گۆتنێ «هەڤال هاکان».

ئۆجالان: هاکان فیدان کۆبانێ رزگار کر

ل ئاخافتنێن ئۆجالان یێن کو ژ سالا 2018 ڤه‌ ب تەنێ ژی بنێرین ب دەهان جاران پەسنێ هاکان فیدان هەنە. د سالا 2018ێ دا د دۆزا «ساکینە جانسز و هەڤالێن وێ» دا ئۆجالان گۆتبوو ئاگاهیا «هاکان بەی» تونەیە. پشترە، ئۆجالان گۆت کو یێ کو کۆبانی رزگار کر هاکان فیدان بوو.

ئۆجالان د 4ێ سباتا 2015ێ دا وه‌ها گۆت: «ئەم 29ێ مژدارێ ب بیر بینن، رۆژا کو ژ سینۆرێ ترکیێ ڤە ئێریشا هەری دژوار ل سەر کۆبانێ هاتییە پێشخستن، موداخلەیا تایبەتا میتێ چێبوو. ژ خوە کۆبانی ژی وی رزگار کر. جارا یەکەمە کو ئەز ل ڤێرێ ڤێ راستیێ دبێژم. رۆبۆسکی، پاریس، بوویەرێن 6 -7ێ جۆتمەهێ و یێن وەکی دن، ڤان هەموویان دخوازن باڤێژن سەر میتێ. جڤاتا گویلەن هەر تشتی دکەت. ناڤێ 4 ئاژانێن میتێ یێن تێکلداری بوویەرا پاریسێ هاتن دان. گۆتووبێژ دکه‌ن کو هاکان فیدان چقاس بەرپرسیارێ ڤێ بوویەرێ یە. هه‌ر چه‌ند کو ئەو کەس گرێدایی میتێ بوو ژی، لێ تیما هاکان فیدان ئەڤ بوویەر نەکرینه‌» ئۆجالان گۆتیە، هاکان فیدان کۆبانی رزگار کر».

هەلبەت نە تەنێ ئۆجالان پەسنا فیدان د دا. میناک هەڤسەرۆکا گشتی یا هه‌ده‌پێ پەروین بۆلدان بۆ رۆژناما رادیکال «ئەزگی باشاران» گۆت، «ئەز ب خوە دخوازم هاکان ل سەر وەزیفەیا خوە بمینیت، ژ بەر کو ئاستەکێ باوەریێ چێبوویە. برێز ئۆجالان گەلەک جاران دیار کریە کو باوەریا وی ب هاکان فیدان پڕ هەیە».

دیسا د سالا 2014ێ دا سڕی سورەییا ئۆندەر پارلامەنتەرێ پارتیا چەپا کەسکان یا ستەنبۆلێ د بەرنامەیا سی ئێن ئێن تورکێ دا بوو مێڤانێ شیرین پایزین، سڕی سورەییا ئۆندەر گۆت «ئەز ب خوە هەری زێدە دخوازم برێز هاکان فیدان ببیته‌ وەزیرێ کارێن دەرڤە. ژ بەر کو مە د تەڤاهیا پێڤاژۆیێ دا هه‌ڤاكاری و كارێن زێدە ب هەڤرا کرینه‌».

هەڤالێن هەڤ یێن خەباتێ نابن دژمن

هەر چقاس کۆمیتەیا په‌یوه‌ندیێن دەرڤە یا کجکێ گۆت کو هاکان فیدان «پەترۆل فرۆت داعشێ، کۆنسۆلۆسخانەیا مووسلێ رادەستی داعشێ کر» و ..هتد. لێ تشتەک نەهات بیرا کۆمیتەیا کجکێ ئەو ژی ، «رێڤەبەرێن په‌كه‌كێ دەمەکێ درێژ ل گه‌ل هاکان فیدان هه‌ڤالینییا هه‌ڤكاریێ کربوون».

رێڤەبەرێن په‌كه‌كێ «مستافا قاراسوو، سه‌بری ئۆک، نووریە کەسبیر، زوبەییر ئایدار، ئادەم ئوزون» هتد. د هەڤدیتنێن ل ئۆسلۆیێ دا دەمەکێ درێژ ل گه‌ل هاکان فیدان و رایەدارێن دن یێن میتێ هەڤدیتن دکرن. بەردەوام پەسندارێن هەڤ بوون، ب هەڤرا بەقلاوه‌ دخوارن و قەهوە ڤەدخوارن. رێڤەبەرێن كه‌جه‌كێ ل گه‌ل «هەڤال هاکان» گەلەک هه‌ڤالینیا هه‌ڤكاریێ دکرن. نیقاشێن ل ئۆسلۆیێ هاتینه‌ کرن قەت نەهاتن ئەشکەرە کرن. هەڤدیتنێن ئۆسلۆیێ تەنێ بەشەک ژ کاری بوون. هەرده‌م ژی نامە بۆ هه‌ڤ د شاندن، ناڤبەینکار دهاتن و دچوون.

په‌كه‌كێ ژ بۆ دەستێ ئاکه‌پێ و هاکان فیدان خورت بکەت، گەلەک جاران ئاگربەست پێک ئینایه‌. وەک میناک د 7ێ سباتا 2012ێ دا دیسا جەماعەتێ خواست هاکان فیدان بهێته‌ دادگەهکرن، لێ په‌كه‌كێ ئێكسه‌ر ئاگربەست راگهاند. ئۆجالان گۆت، «ئەگەر ئەز هەلوەستا خوە نەگوهەرم، هەم هاکان و هەم ژی سەرۆکوەزیر دێ چن، دڤێت ئەم هاریكارییا هاکان بکه‌ین».

مە ب کورتاسی بەحسا په‌یوه‌ندیێن هاکان فیدان و په‌كه‌كێ کر، ئەم یەکسەر ببێژن «دۆستێن بەرێ نابن دژمن». گۆتنێن کو د رێیا مەدیایێ دا ئاراسته‌ی هه‌ڤ دكه‌ن زێدە واتەیا خوە نینە. په‌كه‌كێ ب سالان ب دەولەت و ئیستیخباراتا ترک را گەلەک کارێن تاری مەشاندنه‌. نها ژی رادبیت و دیسا ژ بۆ سەردانا هاکان فیدان یا ئیراقێ دکەته‌ گالەگال و دبێژیت «دێ مە تاسفیە بکه‌ن».

چ کەس ناخوازیت په‌كه‌كە ته‌سفیە ببیت

ئەم ب ڤەکری دبێژین، نە ئیراق و نه‌ ژی دەولەتا ترک په‌كه‌كێ تا‌سفیه‌ ناکەن. په‌كه‌كە ل رێڤەبەرییا ئیراقێ یا شیعە یه‌ د هەمبێزا رێڤەبەریا ئیرانێ دا دیژیت. د ئه‌جێندایا په‌كه‌كێ و هەڤکارێن وێ دا شەنگال ژ کوردستانێ قوت کرن، ژ گەلەک ئالییان ڤە ل سەر هەرێما کوردستانێ ئێرش کرن و ژ ناڤ برنا پێشمەرگە هەیە. ما ئیراق و ئیران دێ جەحشەکی مینا په‌كه‌كێ ل کو ببینن؟ نکارن ببینن، لەوما ئەگەر کەسەک بخوازیت په‌كه‌كێ ژ ناڤ ژی ببه‌ت، ئەو دەولەت دێ بەرگرییا په‌كه‌كێ بکن.

بێ گومان ترکیە ژی وسایە. ژ بەر کو ب سالانە ترکیە دبێژیت ئه‌م دێ په‌كه‌كێ ژ ناڤ به‌ین، لێ ب به‌هانه‌یا وێ سینۆرێن خوە بەرفرەهـ کرن، کورد ل دۆرا په‌كه‌كێ کۆم کرن و ب هەر ئاوایی حەلاندن. نها ژی دەولەتا ترک بخوازیت ئۆجالان د دو رۆژان دا دێ ئاگربەستێ ئیلان راگهینیت. گەر هێزەک هەول بدەت کو په‌كه‌كێ تاسفیە بکەت، دەولەتا ترک دێ بیته‌ مەرتالێ زیندی و په‌كه‌كێ ژ هەموو مەترسییان پارێزیت.

ئەڤ قییامەتا په‌كه‌كێ ل دەردۆرا ناڤێ هاکان فیدان راکری، تەنێ زارۆک پێ باوەر دکن. نەخوە دۆستانیا په‌كه‌كێ ب ئیستخباراتا ترک را بەریا هاکان فیدان هەبوو، پشتی وی ژی دێ هه‌بیت و به‌رده‌وام بیت.