ھەر دەولەت و ھێزا کو دخوازە ل سەر وەلاتێ کوردستانێ سەردەست ببە و داخوازێن ئازادیێ یێن کوردان تێک ببە، دەستپێکێ د ناڤا کوردان دە تەڤگەرەکێ ژ بۆی خوە ئاڤا دکە. دژمنێ ھەری مەزنێ کوردان کورد بوویە. راستیا پەکەکێ ژی د ناڤا ڤێ راستیا دیرۆکی دە دکارە بهێت راڤەکرن. لێ پەکەکە ژ تەڤگەرێن کو د دیرۆکێ دە ل دژی کوردان ھاتنە بکارئانین جودایە. پەکەکە نە تەنێ ژ ئالیێ یەک کۆلۆنیالیست ڤە، ژ ئالییێ ھەر چار دەولەتێن داگیرکەر ڤە ل دژی تەڤگەرێن کوردێن ھەر چار پارچەیان ژی ھات بکارئانین.

پەکەکە ھێزەکا پارامیلیتەرە د دەستێ کۆلۆنیالیستێن کوردستانێ دە

ڤێ راستییا پەکەکێ ھەر کەسێ کو بێ لایەن و ب گشتی ل دیرۆکێ دنێرە، دبینە. ژ بەر ڤێ یەکێ پەکەکە 50 سالن ل ھەر چار پارچەیان کوردستانێ ھەیە. ل سەر بنگەھا رەژیما ئەسەد یا سووریەیێ، رێ نەدا کو تەڤگەرێن دن دەرباسی رۆژئاڤا ببن. ل سەر بنگەھا دەولەتا ئیرانێ ئێریشی تەڤگەرێن رۆژھلات کر. ب پلانا دەولەتێ ھەموو تەڤگەرێن کوردێن ل ترکیەیێ تەسفیە کرن. ل سەر بنگەھا رەژیما سەدام یا ئیراقێ، پشتی سالا 1988 ئێرشی پێشمەرگە کر. وەکە پاسەوانێن سینۆری یێن سەدام تەڤگەرییا. ئیرۆ ڤێ جارێ ژی خوە دسپێرە رەژیما نوویا شیعە یا بەغدایێ و ئێریشی ھەرێما کوردستانێ دکە.

پەکەکە ھەبوونا خوە نە ل سەر تێکبرنا دژمن و قووتکرنا پارچەیەک ژ دژمن، بەلکو ل سەر تێکبرنا کوردان و ژ ناڤبرنا دەستکەفتیێن تەڤگەرێن کورد ئاڤا کرییە. ژ بۆ پەکەکێ پێناسەیا ھەری باش ئەڤەیە: “پەکەکە ھێزەکا پارامیلیتەرە ژ ئالیێ داگیرکەرێن کوردستانێ ڤە دهێت بکارئانین”.

پەکەکە ژ بۆ ڤێ راستیێ ڤەشێرە، ب مەنتقێ “پاراستنا ھەری باش ئێریشە” ژ بلی خوە ھەموو کوردان خایین و سخوور دەستنیشان دکە. دیرۆکا پەکەکێ ب واتەیەکێ دیرۆکا شەرێ تایبەتێ کۆلۆنیالیستان ل سەر کورد و کوردستانێ یە.

پەکەکێ ب رادەستکرنا تەرمێن پێشمەرگەیان خوەست خوە ژ بۆی سەدام ئیسپات بکە

د سالا 1988 دە دگەل دەستپێکرنا ئەنفالێ دە گەلێ باشوور کۆچی باکورێ کوردستانێ و رژھلاتێ کوردستانێ بوو. ئەنفالا بەھدینان د 25 تەباخێ دە دەست پێ کر. گوند ھاتن شەوتاندن و گەل پەنابەر بوو. پێشمەرگە ل گەل خەلکێ پاشڤە ڤەکشیان. ژ ئیلۆنا 1988 ھەتا ئادارا 1989 پێشمەرگە ل خەتا حەفتەنین، بەرواری بالا، زاپ-ئاڤاشینێ ئانگۆ بەھدینان ھەژمارەک سینۆردار مان.

ھێزێن سەدام ژ بۆ کو پەدەکە و پێشمەرگە ڤەنەگەرن ھەرێمێ، دەست ب دانووستاندنان ل گەل پەکەکێ کرن. ھەتا وێ دەمێ جەحشێن گرێدایی سەدام ل ھەرێمێ ھەبوون و تێکلیا وان دگەل پەکەکێ دە ھەبوو. ڤێ جارێ د ناڤبەرا ئەندامێن ئیستیخباراتا سەدام یا مەرکەزی  و ئەفسەرێن ئارتێشا سەدام یێن ل ھەرێمێ دە ھەڤدیتن پێک ھاتن. پەکەکێ ھندەک ژ ڤان ھەڤدیتنان ل گوندێ دەرکارێ یێ ھەرێما حەفتەنینێ پێک ئانین. بەشەک وان ھەڤدیتنان ژی ل ئۆتێلا سولاڤێ یا ئامیەیێ ھاتینە ئەنجامدان.

پەکەکە ژی ژ بۆ کو باوەریا سەدام ب دەست بخە و ب ئالیکاریا سەدام ل بەھدینانێ ب جھ ببە، ل دەربارێ پێشمەرگەیان دە ئاگاھی ژ بۆی رەژیما سەددام دشاندن. ژ ئالیەکی دن ڤە، ئەو پیلانا ژ بۆ تەسفیەکرنا ھێزێن پێشمەرگەیێن کو دخوەستن دیسا بهێن ھەرێمێ و خەباتا خوە بکن پەکەکێ ل گۆرەیی پەیمانا ل گەل سەدام کری ئەو ب پیلان شەھید کرن. ژ بۆ کو ئیسپات بکە کو وێ پێشمەرگە شەھید کرنە، تەرمێن وان ژی رادەستی جەحش و جێشا سەدام یێن ھەرێمێ کرن.

پەکەکە؛ ب پیلان یێکینەیا ئەحمەد کادر شەھید خستن و چەکێن وان ژی وەک خەلات وەرگرتن

تێ زانین کو پەکەکێ د ناڤبەرا سالێن 1988-1990 دە گەلەک پێشمەرگە شەھید و بەرزە کرن

ب تایبەتی ھێزێن پێشمەرگە کو د ئەنفالا 1988 دە ڤەکشیابوون، د بھارا 1989 دە دەست ب ڤەگەرا سەنگەرێن شەری کرن. ژ سەر خەتا چەل، ئەلکی و قلابانێ یەکینەیێن بچووک دەست ب دەرباسبوونا باشوور کربوون. پەکەکێ ژ بۆ کو باوەریا سەدام ب دەست بخە، ئیستیخباراتا ڤان یەکینەیان دا سەدام. پەیرە ھندەک ژ وان شەھید کرن و جەنازەیێن وان رادەستی  جێشا ئیراقێ کرن.

د ئادارا 1989 دە، ھێزا پێشمەرگە کو ژ 6 کەسان پێک دھات، کو ژ بۆ بەرفرەھکرنا خەباتێ ھاتبوون ھەرێمێ، دەرباسی سەنگەرێن خوەیێن بەرێ دبوون. ل ور ھێزێن پەکەکێ پەیدا ببوون.  پێشمەرگەیان ب سالان نان دابوو ئاپۆچییان و ب ھەڤ را رێھەڤالتی کربوون. پێشمەگەیان باوەر نەدکرن کو زیانەک بگھێژە وان. شەڤێ ل یەک جیهی مان. یەکینەیا پێشمەرگە ژ رێیەکا دوور ڤە ھاتبوو. رۆژا دن خوەستن پاقژییا خوە بکن.  چەکدارێن پکەکەێ ژ وان رە گۆت “ئەم دێ زێرەڤانیێ ل وە بکن”. دەما پێشمەرگەیان سەرێ خوە دشۆشت و بالاڤا خوە دکر پەکەکێ ئەو ھەر 6 پێشمەرگە تازی شەھید کرن.

پشترە خەبەر دا جەحشان و تەرمێ ھەر 6 پێشمەرگەیان برن. بەرپرسێن جێشا ئیراقێ وەکە دییاری چەکێ پێشمەرگەیێن شەھیید دا چەکدارێن پەکەکێ.

ناڤێ وان پێشمەرگەیێن کو د ڤێ بوویەرێ دە شەھید بوونە وھا نە:

• ئەحمەد کادر.

• سەعدوللا ئاڤدەل.

• نزار محەمەد.

• محەمەد حەمدی.

• نزمی وەرمێلی.

• خالد وەرمێلی.

پەکەکێ ژ بۆ سەدام کوژەرتی کر: 3 پێشمەرگەیێن باکورێ کوردستانێ ژی کوشتن

ل گۆری پەیمانا کو دگەل سەددام دە چێکربوو، پەکەکێ یەکینەیێن پێشمەرگەیێن کو ھاتبوون ھەرێمێ دشۆپاند و ئەو ژناڤ دبرن. یەک ژ وان یەکینەیێن کو پەکەکێ ژناڤ برین ژی سێ پێشمەرگەیێن خەلکێ باکوورێ کوردستانێ یێن باژارۆکێ چەلێ بوون. د داوییا سالا 1989 دە پەکەکێ ل دەڤەرا ھەلوە بەرھێ کێلەکا ئاڤا زێ 3 پێشمەرگەیێن پەدەکێ دیتن. ئەڤ ھەر سێ پێشمەرگە ژ ھەرێما چەلێ یا باکورێ کوردستانێ بوون. سالا 1984 تەڤلی رەفێن پێشمەرگە ببوون. د سالا 1988 ل گەل ئەنفالێ دەرباسی ئیرانێ بوون و پشتی چەند مەهان دیسا ڤەگەرییان ھەرێمێ. پەکەکێ ل ڤێ یەکینەیا پێشمەرگە راست ھات و ئەو ژی مینا ھەر 6 ھەڤالێن وان یێن بەرێ ب پیلان شەھید کرن. ل کێلەکا ئاڤا زێ دەڤەرا بەرھێ. جەنازەیێن ھەر 3 پێشمەرگەیان رادەستی جەحشێن سەدام کرن. ناڤێ وان ھەر 3 پێشمەرگەیان وھا نە:

• حەحمەد چەلی

• حوسێن بیادیر (گوندێ نارل)

• سەمەد بیادر

بەلگەیێن پەیوەندیێن پەکەکێ دگەل رەژیما سەددام دە بەردەستن. د بەردێلا دژمنییا پەدەکێ دە، پەکەکێ د ئاستا بلند تێکلی، خوراک و چەک ژ ئارتێشا سەدام وەرگرتن.

پەکەکە گورکایا ھەمی کۆلۆنیالیستان نە

د دەربارێ شەرێ کووەیتێ د سالا 1991 دە کو وێ دەمێ کوردان خاکا خوە رزگار کرن، رێبەرێ پەکەکێ عەڤدللا ئۆجالان د سالا 1993 دە وھا د گۆت: “دخوازن ب دەستێ ڤان ھەر دو پارتیێن کوردی (یەنەکێ و پەدەکێ) رەژیما سەدام بچووک بخن” ئۆجالان تێکۆشینا ئازادیێ یا کوردان وەکە نەباشی شیرۆڤە دکر.

د شەرێ ئراقێ یێ سالا 2003 دە پەکەکێ لایەنگر و گرسەیا خوەیا ئەورۆپایێ ب درووشما “ژ شەری رە نا-ئەم شەری ناخوازن” داخست کۆلانان. سەدام ھێزەکە کو پشتگری د دا پەکەکێ، پەکەکێ نەخوەستن ڤێ ھێزێ وندا بکن، رەوشپارێزییا کو تێ دە جھ گرتبوون وندا بکە. ژ بۆ پەکەکێ ئاخ، رزگاری و ئازادییا کوردستانێ تشتەکی گرینک نینە، تشتا گرینگ بەرژەوەندییێن وێ نە.

لێ پەکەکە ل کێلەکا کۆلۆنیالیستان ل دژی کوردان شەری دکە و یەک سەر وەکە بوکالەمون “حرباء” رەنگی دگوھەرە. سەددام ژناڤ چوو، نھا ل بەغدایێ رەژیمەکا شیعە ھەیە. ئەڤ رەژیما شیعا ھەری کێم ب قاسی سەدام دژە کوردە. پەکەکە نھا ژی ھەمان خزمەتێ ژ بۆی رەژیما شیعە یا ئیراقێ دکە. ژ بۆ پەکەکێ یێ چوویی ئاغایە یێ ھاتی ژی پاشا. چاوا کو د بەردێلا نەھشتنا پێشمەرگەیان ل بەھدینانێ ژ رەژیما سەدام ھاریکاری دستاندن، نھا ژی د بەردێلا نەھشتنا پێشمەرگەیان بۆ شەنگالێ دیسا هاریکاریان ژ ئیراقێ دستینە.

لێ پەکەکە د ڤێ خوەلیسەریا کوردان دە دەرکەتیە ئاستا ھەری بلند. نھا راستەراست ئارما حەشدا-شەعبی ل سەر ملێن چەکدارێن پەکەکێ یە.

پەکەکەیا کو دبێژیتە ھەر کەسێ خاین، بلا بەرێ خوە بدەتە ئارما سەر ملێ چەکدارێن خوە.

پەکەکە گورکایا ھەمی دەولەتێن کۆلۆنیالیستە و ب دلسۆزی ژ دوژمنێن کوردان رە کوژەری دکە.