“کۆلەتیا پسیکۆلۆژیک”

کۆنگرەیا ھەدەپێ چێبوو و وەک کو ل پیشیا کۆنگرەیێ ھاتی دیزاین کرن ھەڤسەرۆکێن ھەدەپێ ھاتن گوھەرتن. جاردن ژنەک ترک بوو ھەڤسەرۆک ژ بۆ کو وەک چاڤدێرەکێ بە ل سەر سیاسەتا کو ھەدەپە دێ بکە.

گەلەک مەدیایێن کوردی (ژ بلی مەدیایا پەکەکێ) یێن کو حەمد یان ژی بێ حەمدێ خوە ب زانەبوون یان ژی ژ خەشیمیا خوە پشگریا سیاسەتا ھەدەپێ واتە یا پەکەکێ دکن، دەست ب نرخاندنا ل سەر رەوشا ھەدەپێ کرن و ھەول دان و ددن کو جاردن مەشروعیەتا ھەدەپێ د ناڤ کوردان دە بدن قەبوول کرن.

گەلۆ ئەڤ ئەڤینیا پەکەکێ یا کو ژ ئالیێ پەکەکەلیێن شەرمۆک ڤە تێ کرن دێ ژ جڤاتا کورد رە چەوە بێ ئیزاح کرن. ھەرکەس دیرۆکا دامەزراندنا ھەدەپێ دزانە. د دەما نیک دلەکی “پێڤاژۆیا چارەسەریێ” دە، وەزیرێ دەولەتێ و سەرپەرەشتێ حکوومەتێ ژ بۆ ڤێ پێڤاژۆیێ بەشیر ئاتالای د کانالا حکوومەتێ TRT دە ڤەکرێ دا خویاکرن کو ھەدەپە ژ بۆ پێویستیا ڤێ “پێڤاژۆیا چارەسەریێ” ھاتیە دامەزراندن و ژ ئالیێ دەزگەھێ ئیستباراتا ترکیێ ئانکو میتێ و ئیمرالیێ ڤە ھاتیە دامەزراندن. ھەتا وەک ڤێ گاڤێ ژی هیچ کەسەکی کەسەکی ژ پەکەکێ ئەڤ گۆتنا ئاتالای دەرەو دەرنەخستیە. ھەروەھا ئەڤینا ئۆجالان یا سەرۆکێ میتێ یێ وێ دەمێ تێ زانین و ئۆجالان د چەند گۆتارێن خوە دە گەلەکی وەسفا فیدان دکە.

ھەدەپێ نھا ئەرکا خوە تەمام کریە و یان ژ ئالیێ دەولەتێڤە تێ گرتن یان ژی ئەو ب خوە داویێ ل ژیانا خوە تینن. ھەدەپێ نھا ب ڤێ کۆنگرەیێ بریار دا کو داویێ ل ژیانا خوە یا سیاسی بینە و تەڤلی پارتیا چەپا کەسک ببە. ھەتا پارتیا چەپ ژی نھا ھەولددە کو، فۆرمولەکی ببینە و ناڤێ خوە بگوھەرێ دا کو کراسەکی ل ڤێ ئالۆزیا کو دژین بکە.

گەرەک ئەو ئالیێن کو پشگریا ھەدەپێ ب ئاوایەک شەرمۆک دکن ژی باش تێبگھن کو ھەدەپە ھەموو دەزگەھ و پارتیێن کو پەکەکێ ڤە گرێدایی، نە خوەدی ئیرادەنە و نە ناوەندا بریارێنە. پارتیێن گرێدایێ سیاسەتا پەکەکێ یێن کو ل ترکیێ یاسایینە ژ بەری ھەر تشتەکی مەجبوورن ل ئالیەکی ترکان د ناڤا ھەڤپەیمانیەکی دە بن. ھەدەپە ھەر تم پرانی ژ ئالیی چەپێن ترکێن کەمالیستڤە ھاتیە رێڤەبرن . ھەڤسەرۆکێ ھەدەپێ ھەموویان ژی پرۆپاگاندا کەمالزمێ کرنە.

پارتیێن سیاسەتا پەکەکێ ڤە گرێدایی ب تەنێ ب مەرجەکی دکارن بەر ب خەتەک نەتەوی ڤە ھەرن و ژ کوردان رە ببن مال. ئەو ژی ئەوە کو، وەسایەتا پەکەکێ رەد بکن، ب ئیرادا خوە سیاسەتێ بکن و ژ بۆ راستیا خوە ناوەندا بریارێ ببن ئەو ب خوە. وەک دن چ جاران نکارن ببن ئالیەک کوردەوار و ژ بۆ کوردا سیاسەتێ ناکن.

کا ل پارلەمەنتەرێن پارتیا چەپا کەسک بنێرن. کینە و چنە؟ دێ ھنگێ پێتر راستیا ھەیی هێت تێ گهشتن.

گەلۆ مرۆڤ دکارە ئالیەکی کو دژمناتیا مرۆڤی بکە بپارێزە. ئەڤ ئەڤینیا ھەدەپێ تایبەتی ل باشوورێ کوردستانێ نایێ فام کرن. گەلۆ ئەڤ یەک ژ بۆ مەدیا باشوور کو پرۆپاگاندەیا سیاسەتا پەکەکێ ب رێیا ھەدەپێ و دەزگەھێن دن کو پەکەکێ ڤە گرێدایێنە دکە نە کێماسیەکە. ھەروەھا گەلەک سیاسەتمەدارێن باشوور کو پشگریێ ب ناڤێ کوردبوونێ ددن ھەدەپێ نە د ناڤا تەڤلیهەڤیەک خراب دەنە؟ مخابن تایبەتی ل باشوور بەشەک ژ مەدیایێ ل گەل ھنەک کارمەندێن خوە و بەشەک سیاسەتمەداران، د “سەندرۆما ستۆکھۆلمێ” دژین.

ئەو راستیا پەکەکێ باش دزانن لێ ب زانەبوون ڤێ یەکێ دکن..

سەندرۆما ستۆکھۆلمێ چیە:

سەندرۆما ستۆکھۆلمێ بوویە دیاردەیەکا ب ناڤ و دەنگا جیھانێ، کو تێ وێ واتەیێ کو کەسێن دیل تێن گرتن ب تاوانباران رە هاریکاریێ دکن، ناڤبەرا وان و تاوانباران دە گرێدانەکا هەستیاری ژی پەیدا دبە. ئەڤ یەک وەکی کۆلەتیا پسیکۆلۆژیک تێ پێناسە کرن.