کەرکووک دشەوتە، ژ بۆ ل ھمبەر ئێریشێن نژادپەرەستێن عەرەب دەرکەڤن جوانێن کورد سینگێ خوە کرن مەرتال و 4 جوان شەھید بوون. دەستھلاتا حکوومەتا ھەرێما کوردستانێ بوویەرێن کەرکووکێ ب توندی شەرمەزار دکە و ژ بۆ رەوشا خراب ل کەرکووکێ ھەیی ھەلوەستێن خوە ب زەلالی ددن دیارکرن. ئەڤ یەک ژی بەلگەیەکە کو دەما بقەومە کورد دکارن دەست بدن ھەڤ و دەستکەفتیێن خوە بپارێزن.
مەدیایا کوردی گاڤ ب گاڤ نووچەیێن بوویەرێن کەرکووکێ بەلاڤ دکن. بەرپرسێن پارتی و رێخستنێن کوردا داخویانیا ددن و گەلەک نڤیسکار و رەوشەنبیرێن کورد ب یەک دەنگی دبێژن “کەرکووک کوردستانە” و دڤێت بێ پاراستن. پشتی ریفراندۆما 2017 مخابن ھندەک ھێزان کەرکووک رادەستی حکوومەتا ئیراقێ و یێن کو نھا کوردان دکوژن و ھەول ددن کەرکووکێ ژ کوردا پاکژ بکن کرن. ئیرۆ سەدەما ئالۆزیێن کەرکووکێ ئەو ھەلوەستا وان ھێزێن کوردە.
ھلبژارتنێن ھەریمێ نێزک دبن، ب ڤەگەرا پەدەکێ بۆ کەرکووک ژی جاردن ترس کەت زکێ نژادپەرەستێن عەرەب دە. ژ بۆ ڤێ ژی دەست ب ئاژاوەگێریان کرن و دخوازن جاردن رەوشا ئەولەھیا کەرکووکێ تێک بدن.
ل گۆر داخویانیا دەستھلاتا کوردستانێ دخوەیە ڤێ جارێ لەیزتکا نژادپەرەستێن عەرەب سەرناکەڤە و دەما پێویست بە، کورد دکارن خوە بپارێزن و ئەڤ ئیرادا کوردا ل باشوورێ کوردستانێ ھەیە.
ژ خوە دخوەیە کو سەرۆکێ ھەرێما کوردستانێ گەلەک ڤەکری ب ئاوایەک فەرمی بالا سەرۆکوەزیرێ ئیراقێ کشاندیە. ھەروەھا بریارا کوردستانێ ب زەلالی دایە خویاکرن.
د ڤان بوویەران دە تشتەک گەلەک بالکێش ھەیە کو د مەدیایا پەکەکێ دە ھەتا ڤێ گاڤێ د دەرباری بوویەرێن کەرکووکێ دە یەک نووچە توونەیە. مەدیا پەکەکێ کو دەما مێشەک دفرە دکارە ب ھەزاران نووچەیان ل سەر چێبکە، و سەدان دەرەوان بەلاڤ بکە. لێ د دەربارێ کەرکووکێ دە بێ دەنگە. گەلەک ڤەکرییە کو پەکەکە ھێژان ھەلوەستا خوە یا پشتی ریفراندوما 2017 رادەستکرنا کەرکووکێ ژ بۆ حکوومەتا ئیراقێ بەردەوام دکە.
یانی جاردن پەکەکە ب ھێزێن خوە ل کەرکووکێ دکارە ل دژێ ھێزێن کوردستانێ ل تەنشتا ھێزێن ئیراقێ و حەشدا شەعبی بسەکنە.
ھەر ئالیێ سیاسی کو پشگریا کەرکووکێ دکە و دبێژە “کەرکووک کوردستانە” دڤێت ڤێ مەترسیا پەکەکێ ل سەر کەرکووکێ ببینە و ببە خوەدی ھەلوەست. وەک دن تەنێ ب سلۆگانا خوەدی لێ دەرکەتنا کەرکووکێ نابە.
“کەرکووک کوردستانە” و “کەرکووک دلێ کوردستانێ یە”. جاردن ب تەکرار، ئیرۆ ئەو ئیرادە و ھێزا کوردا یا کو کەرکووکێ بپارێزە ھەیە. دەما پێویست ئەڤ یەک ب رێیێن مەشرووع تێ کرن.
رۆژەڤا کورد
