ب ناڤبەینکاریا عەشیرێن عەرەبان، 94 مالباتێن چەکدارێن داعشێ یێن ژ رەقایێ، ژ کامپا ھۆلێ یا ل حەسەکێ ھاتن دەرخستن.
رەوانگەھا سووری یا مافێن مرۆڤان بەلاڤ کر، 94 مالباتێن چەکدارێن داعشێ ب دەستپێشخەریا ئەنجوومەنا سووریەیا دەمۆکراتیک (مەسەدێ) و رێڤەبەریا خوەسەر و ب ھەماھەنگیا لگەل شێخ و رووسپێن عەشیرێن رەقایێ ژ کامپا ھۆلێ ھاتن دەرخستن.
ئەڤ گاڤا دەرخستنا مالباتان ژ کامپا ھۆلێ، د چارچۆڤەیا خەباتێن رێڤەبەریا خوەسەرا ڤالاکرنا کامپا ھۆلێ دە تێن.
رێڤەبریا خوەسەر چەندین جارن دبێژە کو رەوشا کامپا ھۆلێ پێویستیا وێ ب دەستێوەردانەکە ناڤدەولەتی یە و دڤێت وەلاتێن جھانێ وەلاتیێن خوە ژ کامپێ ڤەگەرینن وەلاتێن خوە.
رۆژا 29 تەباخا بۆری ژی، کۆمارا قرقیزستانێ 31 ژن و 64 زارۆکێن وەلاتیێن خوەیێن کو ل کامپێن رۆژ و ھۆلێ یێن رۆژئاڤایێ کوردستانێ نە، ڤەگەراندبوون.
کامپا ھۆلێ دکەڤە باشوورێ باژارۆکێ ھۆلێ یێ سەر ب پارێزگەھا حەسەکێ و دۆرا 56 ھەزار کەس ژ زێدەتر ژ 60 وەلاتان لێ دمینن، پرانیا وان ژن و زارۆکێن داعشێ نە.
