بووبێ ئەسەر
ھندەک جاران وێنەیەک یان نڤیسینەک دبە بەرسڤ یان روورەشکرنا گەلەک پرس و بەرسڤان. د ھندەک نڤیس و وێنەیان دە ژی مرۆڤ بێ بەختی، روورەشی و کوردێن نۆکەرێ دژمنێ گەلێ کورد دبینە و دخوینە.
هەر دەما رەوشا باشوورێ کوردستانێ بەر ب ئارامیێ ڤە دچە و گاڤێن سەرخوەبوونێ تێنە ئاڤێتن، پەکەکە ژی ب ھەموو ئیمکانێن خوە ل دژ وان رادوەستە. ب ھەموو مەدیایە کو یالچین کووچووکێ مامۆستایێ سەرۆکێ وان عەڤدللا ژ وان رە ئامادە کرییە ل ھەمبەر بارزانیان ب کار تینن.
ئارمانج و ھەدەفا پەکەکێ ئەوە کو دێ چاوا و ب چ روو و رێبازان بارزانیێن کو ھەر چار داگیرکەران نەکاریبوون وان تێک ببن، کار دکن. کار دکن ژ بەر کو ل ھەمبەر داگیرکەران تەنھا بارزانی مانە و ئەو ل سەر لنگێن خوە نە و ژ بۆنا گەلێ خوە د ناڤا کار و خەباتێ دە نە.
ل گۆر رێ و رێبازا بارزانیێ نەمر، ب ھێز و قاوەتا پێشمێرگەیێن قەھرەمان، ل گۆر نەرین و دتینێن سەرۆک مەسعوود بارزانی کورد بوونە خوەدی پارچەیەک کوردستانا ئازاد. لێ ئەڤ ئازادی بوویە کەلەمێ بەر چاڤێن داگیرکەر و کرێگرتیێن وان.
ئەم باش دزانین کو داگیرکەرێن مە تم ل گەل ھەڤ خەبتینە و دخەبتن کو دێ چاوا بارزانیان تونە بکن. ژ بەر کو وان فێم کرنە بارزانی بوویە کوردستان، لۆما دخوازن وێ کوردستانا کو بارزانی دپارێزن تونە بکن. لێ د دەم و دەورانا نھا دە، نکارن بارزانیان راستە راست ل سەر دەستێ خوە تونە بکن. ژ بۆنا وێ ژی ھندەک پارتی و تەڤگەرێن ل سەر ناڤێ کوردان، لێ یا وان ب خوەیە دامەزراندن دا کو ل سەر دەستێ وان شەرێ کوردان و بارزانییان بکن.
داگیرکەران پەکەکە دامەزراند و بەردان کوردان دا کو وان تار و مار بکە. ل باکورێ کوردستانێ ب سەر کەتن. رۆژئاڤا خستنە چ حالێ دیارە. نھا تەنھا د دەستێ وان دە ئازادیا باشوورێ کوردستانێ مایە کو وێ ژی تێک ببن. کوردان ئێدی ل گۆر خوە دیزاین ئانگۆ وەکە ئەو دخوازن بکن. د ئەسلێ خوە دە ئارمانجا داگیرکەران و پێگرتێن وان کورد و کوردستانە، لێ ژ بۆنا ھندەک بێعاقلێن ئەندامێن خوە و ھندەک کوردان بخاپینن خوە تەنێ وەکە ل دژ بارزانیانە نیشان ددن.
کوردنۆ دڤێت ھوون ژی ئێدی شیار بن و بزانبن کو ئارمانج و ھەدەفا پەکەکێ تونەبوونا گەلێ کورد و بارزانییا نە. ھەگەر د رۆژێن وەھا دژوار دە کورد خوە نەدن دۆرا بارزانیان، ھەگەر ھەمی کورد ل گەل پارتی و تەڤگەرێن خوە ژ بارزانیان رە نەبن پشتگر، ھوونە بزانبن کو وێ ئەو پارچا ئازاد تێک ھەرە و پشتی وێ ژی دێ ئێدی کورد وەکە کورد نەمینە.
نھا پەکەکە ل گەل ھەمی دەم و دەزگەھێن خوە، د مەدیا خوە دە، د رادیۆ و تەلەڤزیۆنێن خوە یێن کو ب دەستێ دەولەتێ ژ وان رە ھاتنە دامەزراندن، دەست ب پرۆپاگاندا ل دژ بارزانیێن کو ئەڤ سەد سالێن داگیرکەران نکاریبوون زۆرا وان ببن، دکن.
ھەلبەت دژمن ئانگۆ داگیرکەرێن مە کارێ خوە دکن. ژ بۆنا کوردستان ئازاد نەبە و نەبە دەولەت چ ژ وان تێ ل گەل خولامۆکێن خوە، ل گەل پارتیێن کو وان ل سەر ناڤێ کوردان دامەزراندین شەرێ بارزانیان کو د ئەسلێ خوە دە شەرێ کوردان دکن.
ھەتا دەرەکێ ئەم ڤێ فێم دکن. لێ یا نایێ فێمکرن ئەوە کو ل ھەمبەر ڤان پرۆپاگاندێن پەکەکێ، وان تەڤگەر و پارتیێن کو دبێژن ئەم نەتەوەیی نە، بێ دەنگن. وان کەس و شەخسێن سبێ ھەتا ئێڤاری کارێ وان رەخنەکرنا دەستھلاتا باشوورێ کوردستانێ و بارزانیانە، ل ھەمبەر ڤێ پرۆپاگاندا پەکەکێ بێ دەنگن.
یا گرینگ ژی ئەوە کو ھندەک پارتیێن کو ژ خوە رە دبێژن ئەز کوردستانی مە و ل گەل پەکەکێ پرۆتۆکۆلێن ب ھەڤرە کارکرنێ ئیمزە کرنە و دکن و ل ھەمبەر ڤان گەفێن وان بێدەنگن. ھوون بزانبن کو ئێدی ب ئەشکەرەیی دیار دبە کو ئەو ژی ھەڤکارێن ڤان گەفێن پەکەکێ نە. واتە کوردستانیبوونا وان ھەتا کو بەرژەوەندیا وان دقەدیە…ھندەک پارتیێن کو 40-50 سالان ل دژی پەکەکێ بوو و نھا ژ بەر ھندەک بەرژەوەندیێن شەخسی کەتیە ڤی حالی، حەیف و گونەھە…ژ بەر کو ئێدی ھەڤکارێ وان نھا پەکەکەیە و پەکەکە ژی ب ھەمی ھێز و قاوەتا خوە ل دژ دۆزا کوردە.
ژ بەر ڤێ ئەز ڤەکری دبێژم: ئەو شەخس و پارتیێن ئالیکاری یان پشتگریا پەکەکێ دکن، ئەوێن ل ھەمبەر ھەمی کریار، بوویەر و پرۆپاگاندێن وان یێن ل دژی کوردستانێ و بارزانیان بێ دەنگن، ھوون بزانبن ئەو ژی ئاڤێ دکشینە سەر ئاشێ پەکەکێ دا کو ھەمی کوردان باش بھێرە.
کوردنۆ ڤێ یەکێ باش بزانبن ھەگەر باشوورێ کوردستانێ تێک ھەرە و بارزانی نەمینن ئێدی کورد ژی نامینن. ھەبوونا کوردان یا ئیرۆ، ب پاراستنا باشوورێ کوردستانێ و خوەدی ل بارزانییان دەرکەتاندنێ دەیە. ژ بلی ڤێ تو رێیێن دن تونەنە. ئێدی کی چاوا ڤان بوویەران دخوینە و دبینە، کی ئێدی ل ھەمبەر ڤان بێدەنگ بن، ئەو ب زانەتی ئان نەزانی ئالیکار و پشتگرێ پەکەکێ نە.
