بووبێ ئەسەر
شۆرەشا ئیلۆنێ بەرھەمەک ژ بەرھەمێن بارزانیێ نەمرە. لەورا ژی دەما مە خوەست ڤێ شۆرەشێ فێر ببن، دڤێ مرۆڤ ب ئاوایەکی بەرفرەھ ل سەر رێبازا بارزانییێ نەمر راوەستە دا کو بکاربە شۆرەشا ئیلۆنێ شرۆڤە بکە.
ئەزێ دخوازم د ڤێ نڤیسا خوە دە ب کورتاسی ل سەر شۆرەشا ئیلۆنێ و گوھەراندنێن مەزن یێن د ژیانا گەلێ کورد دە کرنە راوەستم. مەبەستا من د ڤردە وێ ئەو بە کو ئەم وەکە کورد بکارن شۆرەشێن خوە، ھێژایی و گوھەراندنا شۆرەشا ئیلۆنێ پێک ئانییە بناسن و بدن ناسین.
ھەتا سالا 1946 گەلەک شۆرەش و بەرخوەدان ل تەڤایا کوردستانێ ئانکو ل ھەر چار پەرچان پێک ھاتبوون، لێ ژ وان یەک ژی ب سەر نەکەتن. عەجەم، عەرەب و ترکان کۆمکوژیێن مەزن کرن. وان خوەستن گەلێ مە ب تەڤایی ژ ھۆلێ راکن و وی بێ دەنگ بکن. ژ خوە ئەو شۆرەشێن کو ھەتا 1946 پێک ھاتبوون، تێک چووبوون، ب سەرنەکەتبوون. ژ بەر وان تێکچوونا ل سەران سەرێ جھانێ کورد بێ خوەدان و بێ ھێڤی بوو بوون. لێ د سالا 1945 و پێدە خەباتا ژ بۆنا ئازادیا کوردستانێ، ل رۆژھلات ھێدی ھێدی لڤیا، تەڤگەریا، خوەشتر و گەشتر دبوو. حازریا شەر و بەرخوەدانەکا بەرفرەھ دھاتە کرن دا کو ل ھەمبەر داگیرکەرێن فارس شەرێ ئازادیێ بکن.
ب گرتنا بریارەکە وەھا ھاتە دیتن کو کورد ھین ژی زیندی نە، ل سەر لنگێن خوە نە و خوە ژ بۆنا ب دەستخستنا مافێ خوەیێن رەوا، وێ بەرخوە بدن. ڤێ کێفا کوردان ژ نوو دە ئانی بوو. لەورا دەما بارزانیێن کو د سەریھلدانێن خوەیێن ل ھەمبەر رەژیما ئیراقێ دە وەندەکر بوون، بەرب برایێن خوەیێن رۆژھلاتێ دە چووبوون. ژ بەر زلم و زۆرداریا داگیرکەرێن ئیراقێ ل ور ب جھ بوو بوون. لێ داخوازا بارزانیان ھەر گاڤ ئازادیا کوردستانێ بوو. لەورا ژی وان ژ سالا 1907 دە ژ بۆنا ڤێ ئارمانجا پیرۆز ل ھەمبەر داگیرکەریێ سەری ھلدابوون. لێ ب ئالیکاریا ھن عەشیرێن کوردان کو ل با دژمن جھ گرتبوون، ب سەر نەکەتبوون. ژ بۆنا کو ملەت و مرۆڤێن وان ب تەڤایی نەیێن قەتلکرن و وان بپارێزن، بەرب رۆژھلات دە چووبوون، ل ور ب جھ بوو بوون لێ ژیانا وان یا ور ژی گەلەک زۆر و زەحمەتی بوو.
دەما کو ل رۆژھلاتێ کوردستانێ ب سەرپەرەشتیا قازی محەمەد بریارا شەرێ ئازادیا کوردان یا ل ھەمبەری داگیرکەران ھەتا گرتن، ڤێ کێفا بارزانیان و ب تایبەتییا بارزانیێ نەمر ئانیبوو. لۆما ھەموو بارزانیان ل با برایێن خوەیێن رۆژھلات جھێ خوە گرتن دا کو ژ بۆنا ئازادیا کوردان شەر بکن. بەرھەما وی شەری، دو ھێژایی ژ بۆنا مە ئانی. یەک کۆمارا کوردستان ل ماھابادێ ھاتە دامەزراندن. یا دن ژی بارزانیێ نەمر ژ بەر خەبات و زیرەکبوونا خوە وەکە یەکەم گەنەرالێ کورد ھاتە دەستنشانکرن.
لێ چ مخابن ئەڤ کۆمار نە ل گۆر حەسابێن داگیرکەرێن مە و گەلەک دەولەتێن مەزن بوو. لۆما پشتی سالەکێ ھاتە رووخاندن و سەرۆکێ وێ قازی محەمەد ھاتە سێدارەدان. لێ بارزانیێ مەزن سەرۆکێ نەتەوەیی یێ کورد کو ل ور ب خەباتا خوە ببوو گەنەرالێ ملەتێ خوە، خوە تەسلیمی دژمن نەکر و ئەو ل گەل 518 چەکدارێن ھەڤالێن خوە بەرب سۆڤیەتێ دە چوون. ل ور ژ بۆنا دەمەکێ ب جھ بوون.
پشتی رووخاندنا کۆمارا کوردستانێ ل مھابادێ، ئێدی ژ نوو دە و ل سەرانسەرێ جیھانێ کورد بێ دەنگ مان. ژ بەر کو ھەتا وێ دەمێ ل ھەر چار پەرچێن کوردستانێ شەرێ ئازادیا کوردان ھاتبوو تەمراندن. ملەتێ کورد ھاتە قەتلکرن، وێرانکرن و کۆچبەرکرن. ب ڤێ بێدەنگیێ دژمنێن کوردان کێف کرن. وان باوەری ئانیبوون کو کورد دێ ئێدی نکاربن سەری ل ھەمبەری وان ھلدن. لێ سەرۆکێ نەتەوەیی بارزانیێ مەزن ئەڤ کێفا دژمن د قرکا وان دە ھشت و پشتی ژ سۆڤیەتێ ڤەگەریان، ژ نوو دە دەست ب شەرێ ئازادیا کوردستانێ کر. ڤی شەری ئانگۆ ڤێ سەرھلدانێ، کوردێن کو ب تەڤایی بێ ھێڤی مابوون، ب ھێڤی کر. کوردێن کو ل گۆر دژمن مربوون ژ نوو دە زندی کرن. واتە شۆرەشا ئیلۆنێ ژ نوودە زیندیکرنا گەلێ کورد و بەرخوەدانا ئازادیا وی بوو.
شۆرەشا ئیلۆنێ ژ بۆنا کوردان ل ئیراقێ ئۆتۆنۆمی ب دەست خست. لێ ئەو ژی نەھات حەسابێ دژمن، لۆما ژی ل ھەڤ جڤییان دا کو وێ تێک ببن و ب سەر ژی کەتن. لێ شەرێ کوردان یێ ژ بۆنا ئازادیا کورسدستانێ و ب سەرۆکاتیا سەرۆکێ نەتەوەیی بارزانیێ نەمر ھەر بەردەوام بوو.
لەورا ئەز دبێژم و دڤێت نەیێ ژ بیرکرن: د شۆرەشا کوردستانێ یا ل مھابادێ دە ئەم کورد بوونە خوەدی سەرۆکەکی نەتەوەیی ئەو ژی مستەفا بارزانیێ نەمر بوو. شۆرەشا ئیلۆنێ، ژ نوو دە زندیکرنا گەلێ کورد و یا گولانێ ژی ئازادیا وی بوو. لەورا ژی پێویستیا کو گەلێ کورد ب بەرفرەھی ل سەر ڤان راوەستن، شرۆڤە بکن، ھەیە. ب تایبەتی دڤێت جوان ڤان ھەردو شۆرەشان باش بزانبن دا کو دیرۆکا خوە باشتر بناسن.
یانی شۆرەش ئیلۆنێ ژ نوو دە زیندیکرن و ژ خەوا مرنێ راکرنا کوردان بوو. شۆرەشا گولانێ ژی دانینا ئەساسێ دەولەتێ بوو.
ئەز 62 سالیا شۆرەشا ئیلۆن ل گەلێ خوە پیرۆز دکم. دبێژم بلا جانگۆریێن مە رەحەت رازێن دا کو ئیرۆ ئەم کورد ب سایا تەکۆشین، بەرخوەدان و ب جانگۆریا وان ل باشوورێ کوردستانێ بوونە خوەدی پەرچەیەکە وەلاتێ خوە یێ ئازاد. ب ھێڤی مە کو ور سبە ببە کوردستانەکە سەربخوە…
بژی کورد و کوردستان
بژی شۆرەشا ئیلۆنێ یا کورد ژ خەوا مرنێ راکری…
