فەرماندارێ گشتی یێ ھەسەدێ مەزلووم عەبدی رادگھینە، “ئەم داخواز دکن کو ھەسەدە ببە بەشەک ژ سیستەما بەرەڤانیێ یا سووریێ.”
مەزلووم عەبدی د ھەڤپەیڤینەکێ دە لگەل “ئەل-مەجلا” دە دەربارێ ئالۆزیێن ل دێرازۆرێ دە راگھاند، “ھەڤرێزیەکا زەلال” د ناڤبەرا شام و تەھرانێ دە ھەیە، ب ئارمانجا پشتگریکرنا ھندەک نوونەرێن عەشیران.
فەرماندارێ ھەسەدێ گۆت: ترکیە ژی ب پشتگریا کۆمێن چەکدارێن سووری کەت سەر ڤێ خەتێ، لێ ئەو ھەر سێ وەلات ب سەر نەکەتن و “رەوش نھا ئارام بوویە.”
عەبدی دیار کر، ئالۆزیا داوی ل 5 گوندێن رۆژھلاتێ دێرەزۆرێ روو دان. لێ رەوش ئارام بوویە، و ئەو ھەول ددن کو داخوازێن خەلکێ ب جھ بینن و پرسگرێکێن وان چارەسەر بکن.
عەبدی دا زانین، رووسیایێ کۆمێن چەکدارێن کو “ھەول ددن خوە وەکە عەشیران نیشان بدن” بۆمبەباران کر. دیار کر ژی، رووسیا ب فۆرمولا بکارئانینا رەوشێ ژ بۆ ئۆپەراسیۆنێن نوو یێن ترکیێ رازی نابە.
ھەرواھا گۆت: ئامەریکا بەشداری ئۆپەراسیۆنێن لەشکەری یێن ل دژی عەشیران نەبوو، ژ بەر کو “د پێڤاژۆیا جێبەجێکرنا ئارامیێ دە، ژ دەرڤەیی پشتگرییا ئەسمانی، پێویستیا مە ب پشتگرییا ئامەریکا نینە.
فەرماندارێ ھەسەدێ راگەھاند، ئەو چوونا شامێ ژ بۆ دانووستاندنان رەد ناکە و گۆت: “لێ بەلێ ھەتا نھا شەرت و مەرج وێ یەکێ چێنەبوونە و مە چ نیشانەکە چارەسەریێ ژ شامێ نەدیتیە.”
ھەر وھا گۆت: “مە ژ رووسیایێ داخواز کر کو ئالیکاریێ بکە، تا کو ئەم بگھن چارەسەریەکە سیاسی کو داوی ل کریزا سووریێ یا مەزن بینە. ئەم ژ شامێ ژی دخوازن کو چارەسەریەکە سیاسی یا رەئالیست قەبوول بکە.”
لێ تەکەز کر، شام ھێژ ژی ل سەر سیاسەتا خوە یا رەدکرنێ رژدە و ھەر پێشنیارێن رەئالیستێن کو کریزێ ب داوی بکە و ببە ئالیکار ژ بۆ پەیدابوونا ئاشتی و ئارامیێ، رەد دکە.
مەزلووم عەبدی راگەھاند کو ھەسەدە “ھێزەکە پیشەیی و نشتمانییە، ئەم داخواز دکن کو ئەو ببە بەشەک ژ سیستەما بەرەڤانیێ یا سووریێ و پشترە رۆل و کارێ وێ ب یاسایەکێ بهێت برێکخستن.”
لێ عەبدی تەکەز کر ژی، ھەر ئاخافتنەک ل سەر ھلوەشاندنا ھەسەدێ بێ کرن، دێ ژ بۆ ئاستەنگکرنا ھەر چارەسەریەکا سیاسی یا موحتەمەل بە و چ جدیەتا دیالۆگێ نیشان نادە.
