بەرپرسێ یەکەمێ پەکەکێ جەمیل بایک ل گەل شار پرێسسێ ئاخڤی و جاردن ل دژێ پەدەکێ دەست ب دەرەو و سەختەکاریان کر.
گەلەک جاران بەحسا سیاسەتا پەکەکێ ل دژێ دەستکەفتیێن ھەرێما کوردستانێ ھاتیە کرن و ئەڤ یەک وەک مەترسیا ھەری مەزن ژ بۆ ھەرێما کوردستانێ یە. قۆناغا کو ئەم تێرە دەرباس دبن، ل باشوورێ کوردستانێ گەفا سەرەکە پەکەکەیە. ژ خوە ئەڤ یەک د ھەموو ھەولدان و چالاکیێن پەکەکێ دە ڤەکری دخوەیە. سەرۆک و بەرپرسێن پەکەکێ ھەموو ب رێزێ ڤە شەر ل دژێ پەدەکێ رادگھینن و مەدیا پەکەکێ کامپانیایەک بەرفرەھ ل ھمبەر پەدەکێ ڤەکریە. پەکەکە ئەشکەرە و ب ئاوایەک ڤەکری پەدەکێ ب “خیانەتێ” تومەتبار دکە.
ژ بەری ھەر تشتەکی د ڤێ دەربارێ دە پیدڤییە بالا وی ئالی یان ژی رێخستن و کەسایەتیێن خوە نێزکی پەدەکێ دبینن و ب ڤی ئاوایی ددن ناساندن بی کشاندن. ژ بەر کو گەلەک ھەنە خوە وەک پالبەند و دۆستێ پەدەکێ ددن نیشاندان، لێ مەرحابەیەک ژی ل گەل پەکەکێ ھەیە، رۆژەک ژ رۆژا نکارن ل ھمبەر دژمناتیا کو پەکەکە ل دژێ پەدەکێ دکە بسەکنن و د ڤێ دەربارێ دە ل ھمبەر پەکەکێ ببن خوەدی ھەلوەست. بێ گومان د ڤێ دەربارێ دە کێماسیێن سیاسەتا پەدەکێ ھەنە و دڤێت ئەو سیاسەتا خوە ل ھمبەر دۆست و دژمنێن خوە بەرچاڤرا دەرباس بکە. ئەڤ پێوستیەکا نەچارییە.
جەمیل بایک د ھەڤپەیڤینا خوە دە دبێژە: “پەدەکە پشتگریا ئیستیخباراتێ ددە دەولەتا ترک و قادێن کو تەسپیت دکە، ژ دەولەتا ترک رە رادگھینە. پەدەکە ئالا باشوورێ کوردستانێ ژ بۆ نخوماندنا داگیرکەریا دەولەتا ترک ب کار تینە. ئەگەر پەدەکە ڤێ ھەڤکاریا ب دەولەتا ترک رە دەوام بکە، ئەم نە ئالیگرێ وێ ژی بن دێ شەر بقەومە.”
بایک گەلەک ئتیھامێن دن دکە و ئاخاڤتنێن ڤالا دبێژە. لێ ئەم دێ ب کورتاسی ل سەر ڤان چەند گۆتنێن دەرەو بسەکنن. بەرێ خوە بدنێ ئەو کادرۆ یان ژی چەکدارێن پەکەکێ یێن ژ لایێ درۆنێن ئارتێشا ترک ڤە تێنە کوشتن نە ل ھەرێمێن د بن باندۆرا پەدەکێ دە نە. ل رۆژئاڤایێ کوردستانێ ل ناڤەندا قامیشلۆ، حەسەکێ، عاموودێ واتە دەڤەرێن کو ب تەمامی د بن کۆنترۆلا پەکەکێ دەنە ئەڤ چالاکی دهێن کرن.
ژ ئالیەک دن، ل باشوورێ کوردستانێ ل دەڤەرا شنگالێ ئەڤ چالاکیێن ترکیێ ھەنە و ئەو دەڤەر ژی د بن کۆنترۆلا حەشدا شەعبی و چەکدارێن پەکەکێ دەیە. وەک دن دەڤەرێن د بن باندۆرا یەنەکێ دە کو پەکەکە ب تەمامی لێ دسەکنە درۆن چەکدارێن پەکەکێ دکە ئارمانج. ھەگەر تشتەک دەردکەڤە ھۆلێ، ئاژانێن دەولەتێ د ناڤا پەکەکێ دە ئاگاھداریا ددن ترکیێ، یان ھندەک ژ یەنەکێ ئاگاھداریا ددن ئارتێشا ترک و یان ژی بەرپرسێن پەکەکێ یێن دخوازن ھندەک کادرۆیێن خوە ژناڤ ببەن ڤان ئاگاھیان ددن ئیستخباراتا ترک. ئەڤ یەک گەلەک زەلالە. ژ بەر کو شانسەکی پەدەکێ تونەیە ڤێ یەکێ بکە.
ژ ئالیەک دن دەما بایک بەحسا ئالایێ کوردستانێ دکە، دبێژە “ئالا باشوورێ کوردستانێ” گەلۆ ئەو زھنیەتا کو ئالایێ کوردستانێ، سەمبۆلا نەتەوی رەد دکە، دێ چ ھێڤی ژێ بێنە کرن. گەلۆ د دەربارێ ئالایێ کوردستانێ دە چ جیاوازی ناڤبەرا ھزرێن بایک و داگیرکەرێن ترک دە ھەیە؟
یا ژ ھەموویێ گرینگتر، پەکەکێ ل دژی پەدەکێ شەرەک راگھاندیە و ھەولددە کو زەمینەکی ئامادە بکە ب ئاوایەکی لەشکەری ئێریشا ببە سەر ھێزێن پەدەکێ. خوە ئامادە دکە کو ل قادا باشوورێ کوردستانێ دە شەرەک چەکداری ل ھمبەر پێشمەرگەیێن کوردستانێ بکە.
خالەک گەلەک گرێنگ ھەیە کو دڤێت د رۆژەڤێ دە بە. ئیرۆ دەما پەکەکە ب ھەموو ئاوایی بانگەوازیا شەرەکی چەکداری ل دژێ پەدەکێ و پێشمەرگەیان دکە، گەرەک ژ نھاڤە ل ھمبەر شەرخوازیا پەکەکێ ئالیێن کورد یان ژی کوردستانی خوەدیێ ھەلوەستەکی بن. یێن ئیرۆ دەنگ نەکن و د بن سمبێلێن خوە دە بکەنن، سبەھی دەما پەدەکە یان ژی پێشمەرگەیێن کوردستانێ خوە بپارێزن، بەحسا “شەرێ براکوژیێ” بکن و داخویانیا راگھینن، ئەو تێ واتەیا کو ئەو ژ نھا ڤە پشتگریا پەکەکێ دکن و دژمناتیا ڤەشارتی یا کوردستانێ دکن.
پەکەکە د بنگەھێ خوە دە د کەسایەتا پەدەکێ دە شەرێ دەولەتبوونا کوردان دکە. لێ مخابن ب پرۆگاندە و سیاسەتا خوەیا کو دژمن پشیگریێ لێ دکە بەرێ خوە ددە پەدەکێ. چ شک نینە کو ئەڤ یەک ب پلانێن دەولەتێن داگیرکەر دهێت کرن. سەرەکانیا ڤێ سیاسەتا پەکەکێ یا دژێ دەولەتبوونا کوردان دەولەتێن داگیرکەرن. مخابن ھندەک پارتیێن کو ناکۆکی ل گەل پەدەکێ ھەنە پشتگریا ھەلوەستا پەکەکێ دکن و دکەڤن وارەک خراب دە.
