سمکۆ عەبدولعەزیزی
بەشا دویەم: شۆرەش چییە و شۆرەشگەر کییە؟ کی تەمسیلا خەتا خیانەتێ دکە؟
ديارێ نه‌دیار، هێڤى دکم پاش هه‌فتیه‌ک لسه‌ر كراس چێكرنا ته ب داوی هاتی و ته خوە تافیل كرى و هاتیه سه‌ر هشێ خوە، گه‌ر ته هش هه‌بە و ئه‌و قه‌وانا ته توماركرى لسه‌ر شۆره‌ش و خیانه‌تێ ژكار كه‌تبە، دخوازم ژ تە رە باس ل شۆرەش و خیانه‌تێ بکم و ب تە بدم زانین شۆرەش چیە، شۆرەشگەر کیە و خیانەتکار کی یە.
به‌رى هه‌ر تشته‌كی دڤێ بزانبی كو شۆره‌ش و خیانه‌ت نه كارگه‌هـ و دوورینگەهەکە کو تو ل گۆر حه‌ز و ڤیانا خوە بکی كراس و بکی به‌ر كه‌سێ به‌رانبه‌ری خوە، به‌لكو شۆره‌ش و خیانه‌ت دو تێگه‌هێن هزرى و فه‌لسه‌فینه.
هن جورێن شۆره‌شێ هه‌نه، مینا شۆره‌شا سیاسى و شۆره‌شا چاندنیێ و شۆره‌شا مللى و شۆرەشا سپى و شۆرەشا چه‌كدارى و شۆره‌شا هه‌ڤدژ و شۆرەشا تەکنۆلۆژی و هتد…
ئەز باوه‌رم مه‌به‌ستا ته ب شۆره‌شێ زێده‌تر گرێداى شۆره‌شا سیاسی و چه‌كدارى یه.
ل گۆر تێگه‌هێن هزرى و فه‌لسه‌فی چه‌ندین پێناسه ژ بۆی هه‌ردوو شۆره‌شان هاتینه كرن، لێ د ئه‌نجام دە گهشتنه ڤێ پێناسا خوارێ:
شۆرەشێن سیاسى: ئه‌و شۆرەشن یێن گوهەرینێن بنه‌ره‌تى د وارى سیاسی و جڤاكى دە دروست دکن، و ژ ئالیێ پارتیه‌كە سیاسی یان ملله‌ته‌كێڤه د ناڤا ولاته‌كی تێن ئه‌نجام دایین.
شۆرەشێن چه‌كدارى: ئه‌و شۆرەشن ئه‌وێن تێ دە پارتیه‌ك یان تەخەک چه‌كان بكار تینە وه‌ك ئالاڤەک ژبۆی گوهەرینێ.
دیارێ نه‌دیار حه‌ز دكم ئه‌ز و تو ب هه‌ڤرە ڤان پێناسا بکین پێڤەر ژ بۆی هه‌ر دو پارتیان “پەدەکێ و پەکەکێ” و بزانین كا كیژان پارتیێ ب ئاوایەک پراکتیک شۆرەش كریه و كیژان پارتیێ ژی شۆرەش كریه قاچك و روژانه بێی چ ئه‌نجامه‌ك د ده‌ڤێ خوە دە دجویت.
پەکەکە:
1/ دروشمێ ده‌وله‌تا كوردستان مه‌زن به‌لاڤ كر و ب هەزاران شه‌هید و بریندار و زیندانیێن سیاسی دانه، د ئەنجام دە ژ ده‌وله‌تا مەزن یا کوردستانێ دابه‌زى دەمۆكراسیكرنا ترکیێ.
2/ یەک ژ ستوینێن هه‌ر ولات و ملله‌ته‌كێ گرێدایی ساخكرن و گه‌شه‌كرنا زمانێ وێ یه، لێ ئیرۆ به‌شێ هه‌ره زۆرێ كوردێن باكورێ كوردستانێ كو ناڤەندا خه‌باتا پەکەکێ یە ب زمانێ ترکی دئاخڤن، هەیا وی رادهی كو پرانیا گه‌ریلایان د نێڤبه‌را خوە دە ب زمانێ دوژمن دئاخڤن و هین نەبوونا زمانێ دوژمن د ناڤا پەکەکێ دە وەکە پاشڤەروویی تێ حەسباندن.
3/ پرانیا چیا و ده‌شت و دۆلێن باكورێ كوردستانێ د بن ده‌ستێ گه‌ریلا دە بوون، لێ ئیرۆ هێزا سیاسی یا پەکەکێ ئه‌و جی تەڤ راده‌ستى دوژمنى كرینه و سیمایێ گه‌ریلا ژبه‌رخودان و خوەراگریێ گوهەرتیه و كریه هێزه‌كە ره‌ڤوك و ل باشوور راوه‌ستاندینه و بووینه به‌لایا سه‌رێ باشوورێ كوردستانێ.
4/ هه‌ر هێزه‌كە چه‌كدارى یا نه‌ته‌وه‌یی هه‌موو هه‌ولا دده كو مرۆڤێن نه‌ته‌وا خوە ل دەردۆرا خوە کۆم بکە، لێ پەکەکێ یەکەم فیشك ل دژى نه‌ته‌وا خوە تەقاند و تەڤ هێزێن سیاسی یێن كورد ل باكور ب رێیا چه‌كێن خوە تاسفیە کرن.
چه‌ندین خالێن دن ژى هه‌نه، لێ ئەڤ ب تەنێ به‌سن.
پارتیا دەمۆكراتا كوردستانێ:
1/ پارتیا دیموكراتا كوردستانێ درووشما ئۆتۆنۆمى بلند كر و شۆرەشا ئیلۆنێ ئه‌نجامدا و ئۆتۆنۆمى ب ده‌ست خست، پشت رە درووشما فەدەرالیێ بلندكر و شۆرەشا گۆلانێ ئه‌نجام دا و سه‌رهلدان كر و فیدرالیه‌ت ب ده‌ست خست.
2/ پەدەکێ سیاسه‌تا دەستپێکێ زمان پشت رە ئه‌رد كر درووشما خوە، ئیرۆ یه‌ك كورد ل باشوور تونە کو ب زمانێ عه‌ره‌بى بپەیڤە و کوردی نەزانبە و تەڤ کەسێن د دبستان، پەیمانگەهـ و زانینگەهـان دە دخوینن و تەڤ کەسێن د سازیێن حكوومی دە کار دکن و هتد… ب زمانێ كوردى دئاخڤن و دخوینن و دنڤێسن.
3/ پەدەکێ ب رێیا پێشمه‌رگەیێن قارەمان د شۆرەشا ئیلۆنێ دە تەڤ چییا و دۆلێن كوردستانێ ژ ده‌ست دوژمن رزگار كرن. دیسان د شۆرەشا گۆلانێ دە ب هه‌ڤكاریا هن پارتیێن كوردستانى جاره‌ك دن به‌رخوەدان كر، رەژێما عیراقێ چەکێن كیمیایی ژى بکارئانی، لێ پیشمه‌رگەیێن قارەمان باشوورێ كوردستانێ چول نه‌كر و به‌رخوەدان كر، هەیا کو سه‌رهلدانا ئادارێ ئه‌نجام داى و باشوورێ كوردستانێ رزگار كری، ئانکو ناڤێ پێشمەرگە ل جیهانێ ده‌نگ ڤه‌دا و بوو سەمبۆلا قاره‌مانی و به‌رخوەدانێ.
4/ د شۆرەشا ئەیلۆلێ دە، پەدەکە کاری تەڤ ته‌خ و چینێن كوردستانێ د ناڤا شۆرەشێ دە هەمبێز بکە.
دیسان د شۆرەشا گۆلانێ دە، هن پارتیێن دن ل كوردستانێ په‌یدابوون كو ل دژی پەدەکێ ژى بوون لێ پەدەکە کاری وێ دژاتیێ بكه برا‌تى و د ئه‌نجام دە به‌ره‌یێ كوردستانى دامه‌زرینە و ب هەڤ رە خه‌بات كر هەیا کو حكوومه‌ته‌كە كوردى دامەزراندی.
ئه‌ڤجا دیارێ نه‌دیار، كێ شۆرەش كریه، کی شۆرەشگەرە و كێ ژی ژ بۆی تاسەک شۆربایێ ئیخانەت کریە و کورد ل هەر چار پەرچەیان مەحکوومی دەولەتێن سەردەست کرنە؟
خەتا خیانەتێ ئەو خەتە یا کو خوینا جوانێن کورد ژ بۆی دەمۆکراتیک کرنا ترکیێ درژینە و ل ئیراقێ ب حەشدا شەعبی رە، ل ئیرانێ ب سوپایێ پاسداران رە و ل سوریێ ژی ب رەژێما بەشار ئەسەد رە تەڤ دگەرە و ژ ترکیێ رە ژی بوویە پرەک ژ بۆی دەرباسبوونا ئارتێشا وێ ژ بۆی داگیرکرنا کوردستانا ئازاد.
تو ب گۆتنێن خوە یێن بێی بوها نکاری روویێ رەشێ پەکەکێ کو تەمسیلا خەتا خیانەتێ ل تەڤ کوردستانێ دکە بڤەشێری، روویێ پەکەکێ ئەو قاس رەشە کو نە ب تە، ب سەدان کەسێن مینا تەژی نایێ شووشتن.
