Skip to contentته‌رۆر يان ماف
چه‌ندین جاران ره‌ژیما به‌عس یا فاشیست ئا ئیراقێ هه‌ولا ته‌رۆركرنا رێبه‌رێن ته‌ڤگه‌را رزگاریخوازا كوردستانێ ل باشورێ كوردستانێ كرنه، هنه‌ك ژ وان هه‌ولان ژ بۆی ته‌رۆركرنا رێبه‌رێ كاریزمایی یێ گه‌لێ كورد گه‌نه‌رال «مه‌لا مسته‌فا یێ بارزانى» بوون.
سه‌ركردایه‌تیا په‌ده‌كێ ژ «بارزانیێ نه‌مر» خوه‌ستبوو كو ده‌ستوورێ بده وان ئه‌و ژی هنه‌ك ته‌قینان ل دژی سه‌رانێن ره‌ژیما به‌عس ل به‌غدایێ ئه‌نجام بدن و گۆتن كو وان هه‌ڤال هه‌نه وێ ئه‌ركێ جی ب جی بكن.
بارزانیێ نه‌مر ژ سه‌ركردایه‌تییا په‌ده‌كێ ره گۆتبوو: گه‌لۆ هوون وێ ل ت ده‌ره‌كێ ڤی كاری بكن؟
د به‌رسڤێ ده سه‌كردایه‌تیێ گۆ: قه‌هوه‌خانه‌ك ل به‌غدایێ هه‌یه ب قه‌هوه‌خانا شه‌عب تێ ناس كرن، پڕ رێبه‌ر و به‌رپرسێن حزبا به‌عس ل وێ قه‌هوه‌خانه‌یێ د روون، ئه‌مێ ل ور چالاكیه‌كێ بكن و ته‌قینه‌كێ ئه‌نجام بدن. بارزانى گوت : گه‌لۆ هوون دكارن گارانتیێ بدن كو ل جیهێ كو هوونێ چالاكیێ لێ ئه‌نجام بدن ت كه‌سه‌ك سڤیل نه‌به قوربان؟
سه‌ركردایه‌تیێ گۆت: ل وێ قه‌هوه‌خانه‌یێ ته‌ڤ جۆرێن ئینسانان لێ هه‌نه و ئه‌م نكارن وێ گارانتیێ بدن كو ت كه‌سه‌ك سڤیل نابه قوربان.
بارزانی گۆت: ماده‌م ووسایه و هوون نكارن گارانتیێ بدن، نابه هوون ت چالاكیێن ووسا ئه‌نجام بدن، ژ به‌ر كو تشتا كو ئه‌م دكن، ژێ ره دبێژن شۆرشا ستاندنا مافێن ره‌وا یێن گه‌لێ كوردستانێ و ستاندن و وه‌رگرتنا وان مافان ب ته‌رۆرێ نایێن ده‌ست خستن، لێبه‌لێ ب تێكۆشین و شۆرشا راسته‌قینه تێن وه‌رگرتن.
راسته ره‌ژیما به‌عس هه‌موو هه‌ولێن ته‌رۆریستی ل دژی مه ئه‌نجام دده و ژ به‌ر ڤێ ئه‌مێ تێكۆشینا سیاسی و چه‌كداری ل دژی وان د مه‌شینن، لۆما هه‌گه‌ر ئه‌م ل هه‌مان رییا دژمن مه‌شیان ل وێ ده‌مێ ت فه‌رق و جوداتی نێڤبه‌را مه و وان ده نا مینه، هه‌ر وها تێكۆشین و شۆرشا مه وێ ژ ره‌واتیێ به‌ر ب نه ره‌واتیێ ڤه بچه و پشتره ل جیهانێ ئه‌م وێ ب كۆمه‌كه ته‌رۆریستی وه‌رن ناس كرن و ته‌ڤ وه‌لات وێ ل دژی مه گاڤا ئاڤێژن، ئانگۆ ئه‌مێ شۆرشا ره‌وا یا گه‌لێ كوردستانێ فه‌دایی كوشتنا هنه‌ك به‌عسییان نه‌كن.
بارزانیێ نه‌مر ووسا گۆتنا خوه دۆماند: گه‌لۆ هوون ئامه‌ده‌نه شور‌شێ فه‌دایێ كوشتنا هنه‌ك به‌عسییان بكن؟
پشتره گه‌لێ كورد وێ ببێژه:بارزانی ژ بۆی تۆلهدانا خوه شۆره‌ش فه‌دایێ ژیانا خوه كر، لۆما بلا ئه‌ز ببم قوربانی نه‌كو گه‌لێ كوردستانێ و شۆره‌شا كوردستانێ ببن قوربان.
ئه‌ڤ نیقاشه هێلا سه‌ره‌كه و خه‌تا ستراته‌ژیكا شۆره‌شێن ئیلۆن و گۆلانێ بوو و هه‌ر وها سه‌رهلدانا بهارا سالا 1991ان و هه‌یا رۆژا مه یا ئیرۆ ژی ده‌وام دكه.
د ده‌ما 30 سالێن شۆره‌شا باشوورێ كوردستانێ ده و 30 سالێن حوكمرانییا كوردستانێ ده، ته‌ڤگه‌را رزگاریخوازا كوردستانێ یێك كارێ ته‌رۆریستی ژی ل دژی ده‌وله‌تا ئیراقێ ئه‌نجام نه‌دا، ئه‌ڤ یێك ژی ناهێته وێ واتایێ كو شۆره‌شا كوردستانێ یان پارتیێن باشوورێ كوردستانێ هێز و شیانا وێ یه‌كێ نه‌بوو، لێبه‌لێ رێخستنێن وان یێن نهێنی د ته‌ڤ ئۆرگانێن ده‌وله‌تێ ده هه‌بوون و ل ته‌ڤ باژاران، ب ته‌یبه‌ت ل باژارێن كوردان، كوردان ل جیهێ كارێن ته‌رۆرێ فه‌لسه‌فا لێبۆرینێ بكارئانی و ب سه‌دان جاران كه‌سێن پایه‌بلند یێن ده‌وله‌تا ئیراقێ كه‌تنه ده‌ستێ پێشمه‌رگه‌هان یان ده‌ستێ رێخستنێن نهێنی و ل جیهێ تاسفیه كرنا وان، رێز لێ دهات گرتن و ل گۆری یاسایێن مافێن مرۆڤان ره‌فتار ب وان ره دهات كرن.
باشترین میناك ل سه‌رهلدانا سالا 1991ان و ل سالا 2003ان ب هه‌زاران له‌شكرێن ئیراقێ و كه‌سێن پایه بلند یێن ره‌ژیما به‌عس كه‌تنه دده‌ستێ ته‌ڤگه‌را رزگاریخوازا كوردستانێ ده، لێ وێ ته‌ڤگه‌رێ ب رێز نێزی وان بوو و د ئه‌نجامێ ده ساخ و سه‌لامه‌ت ژ بۆی مالێن وان دهاتن شاندن.
ئه‌ڤ ستراته‌جی بۆ سه‌ده‌م كو ته‌ڤگه‌را رزگاریخوازا كوردستانێ ل جیهانێ ببه جهێ رێزێ و شۆره‌شێن كوردستانێ ژی ب شۆره‌شێن ره‌وا و مه‌شرووع هاتن ناس كرن.
