ترکیێ ناڤچەیێن جودا یێن رۆژئاڤا بۆمبەباران کرن

درۆنێن ترکیێ ھەرێمێن رۆژئاڤایێ کوردستانێ ل حەسەکێ، عاموودێ، دربێسیێ و چلاغا بۆمبەباران دکە و د ئەنجامێ دە 8 کەس ھاتن کوشتن و ھەژمارەک کەس ژی بریندار بوون.

رەوانگەھا سووری یا مافێن مرۆڤان بەلاڤ کر، درۆنێن ترکیێ ئۆتۆمۆبیلەک ل نێزیکی تاخا مشێرفێ یا حەسەکێ بۆمبەباران کر کو د ئەنجامێ دە 2 کەس ھاتن کوشتن.

ل گۆری زانیاریێن رەوانگەھێ، ل گوندێ تل حەبەش یێ باشوورێ عاموودێ ژی، د ئەنجاما بۆمبەبارانا درۆنێن ترکیێ ل سەر بارەگەھەکە لەشکەری دە، 6 کەس ھان کوشتن و 2 کەس ژی بریندار بوون.

دا زانین ژی، درۆنەیێن ترکیێ 3 جھ ل رۆژئاڤایێ کامپا واشۆ کانی بۆمبەباران کرن، بێیی کو چ زانیاری ل سەر زیانێن جانی و مادی بێن راگھاندن.

ھەروھا درۆنەکە ئارتێشا ترکیێ ھەرێما پیشەسازی “رەھب یا لەشکەری” ل چاترێ یا دربێسیێ – تەل تەمرێ یا ل باکورێ رۆژئاڤایێ حەسەکێ بۆمبەباران کر.

ل ھەرێما مووشەریفا یا ل سەر رێیا کەڤن یا دربێسیێ، بارەگەھەکە ھەسەدێ ھات ئارمانجکرن، د ئەنجامێ دە ژی تانکەرەکە سۆتەمەنیێ شەوتی و 3 کارکەر ژی بریندار بوون.

پشتی ئێریشا پەکەکێ یا 1ێ ئیلۆنێ ل سەر وەزارەتا ناڤخوە یا ترکیێ ل ئەنقەرەیێ، سەرۆککۆمارێ ترکیەیێ رەجەب تەییب ئەردۆگان د پارلەمەنتۆیێ دە راگھاند، ئەو دێ شەڤەکێ ژ نشکا ڤە بەرێ خوە بدن رۆژئاڤایێ کوردستانێ.

پشتی ڤێ ئاخافتنا ئەردۆگان، ئارتێشا ترکیێ ئەڤ چەند رۆژن ئۆپەراسیۆنێن ئاسمانی ل سەر بنکەیێن پەکەکێ دایە دەستپێکرن و ئەگەرا ئۆپەراسیۆنەکە بەژاھی یا دەرڤەی سینۆری ل سەر رۆژئاڤایێ کوردستانێ ژی د رۆژەڤێ دە یە.