پەکەکە ل باکور و ترکیێ تێک چوو، دخوازە شەری بکشینە باشوورێ کوردستانێ؛ گارە و گەرمیان

پەکەکە ل ترکیێ و باکورێ کوردستانێ بنکەت. ل ھەرێمێن رزگارکری یێن سالێن 1990، کو بریارگەھێن لەشکەری یێن پەکەکێ لێ ھەبوون ئێدی دەنگێ فشەک و گەریلایان نایێ. پەکەکێ پشتی کو ھەموو ترکیە و باکورێ کوردستانێ رادەستی دەولەتا ترک کرین، نھا ژی دخوازە چیا و باژارێن ھەرێما کوردستانێ بکە قادێن شەری.

رێڤەبەرێن پەکەکێ ھەر رۆژ دەردکەڤن سەر تەلەڤیزیۆنان و دبێژن “پێشمەرگە ناھێلە، پەدەکە دەستوورێ نادە” ئەم  دەولەتا ترک تێک ببن. دخوازە تێکچوون و تەسفیەیا ل باکورێ کوردستانێ ژییایی ل سەر ئاخا باشوورێ کوردستانێ ژی بسەپینە.

شەرێ پەکەکێ ئێدی نە ل ئامەدێ یە، ل ئامێدیێ و ئاکرێ یە.

بۆتان کو پەکەکێ ژێ رە دگۆت دلێ شەری، نھا بوویە ناڤەندا گەشتیاریێ، بەرواری بالا ژی بوویە ناڤەندا شەری.

پەکەکێ بۆتانێ تەرکاند و شەر ئانی بەھدینان.

کاتۆ ژیرکا و کاتۆ مارینۆس، د سالێن 1990 دە دەولەت نکاریبوو بکەڤێ و کەلھا پەکەکێ بوو، لێ بەلێ ئێدی نە قادا شەری یە، قادا ڤیستەڤالێ یە. ل کەلا مەمێ یەک گەریلا ژی نەمایە، شەر ل کورە ژاری تێ کرن. کاتۆ ئەو چیایێن سەرھلدێر بوون کو کوردان ژ ئیسکەندەرێ مەقدوونی رە ژی نەھشت بوون. لێ پەکەکێ نەکاری ل ڤر خوە راگرە و تێک چوو. پەکەکە یا کو ل کاتۆیان نەکاری دەولەتا ترک تێک ببە، ھاتییە ناڤا  گوندێن گوھەرزێ و بەرچێ یێن ئامێدیێ و دبێژە ئەم دێ دەولەتا ترک تێک ببن، لێ پەدەکە رێگریێ ل مە دکە.

ل شرنەخا کو ب سالان ناڤەندا قادا شەری بوو، ئێدی دەنگێ فیشەکان نایێ. شەر ھاتییە پشت شێلادزێ.

پەکەکە ل باکور شەری ناکە. پەکەکە ئێدی ل سەر سینۆرێ باکور و باشوورێ کوردستانێ ژی شەری ناکە. پەکەکە نە تەنێ باکور، دەردۆرا سینۆرێ باشوورێ کوردستانێ ژی ژ بۆی دەولەتا ترک ھشت و بازدا.

گابار بوویە ناڤەندا تووریزمێ و گارە ژی بوویە ناڤەندا شەری

لێ بنێرن، ئەڤە چیایێ گابارێ یە. ژ سالا 1983 و ھەیا بەرییا چەند سالان ناڤەندا شەرێ پەکەکێ بوو. د سالێن 1990 دە ھەرێمەکە رزگارکری بوو. دەولەتا ترک نەدکاری بکەڤە ھوندرێ گابارێ. نھا بوویە ناڤەندەکا گەشتیاری. ژ ئامەدێ و ستەنبۆلێ  رۆژانە گەشتییار تێن ور. خەلکێ گابارێ ئێدی ب کشتوکالی ڤە مژوولن. دەولەتا ترک ل گابارێ ب ئاوایەکی ئەکتیف ل پەترۆلێ دگەرە. پەکەکە ژ گابارێ دەرکەت، پاشڤە کشیا، سینۆر دەرباس کر خوە ل بەرواری بالا و حەفتەنینێ ژی رانەگرت گەهشتە ھەرێما چییایێ گارە.

ئێدی گارە بوو قادا شەرێ پەکەکێ. گوندیێن گارێ ئەڤ 30 سالن نکارن گوند و وارێن خوە ببینن. گوندی نکارن زەڤیێن خوە بکێلن، فیقییێ خوە بچینن و رەزێن خوە شین بکن. چما؟ ژ بەر کو پەکەکە دبێژە ئەو دێ ل گارە دەولەتا ترکا تێک ببن. ما گابار، بەستا و کاتۆ تێرا تە نەدکر کو تو دەولەتا ترکا تێک ببی؟

گارە نە بەسە، پەکەکە دخوازە گەرمیان ژی بکە قادا شەری. دبێژە کو ئەو دێ ژ گەرمیان دەولەتا ترک بن بێخن.

ل جیلۆ ڤیستەڤال، ل گرێ جوودی (گوندێ سێری) شەر

ئەڤ دەر چیایێ جیلۆیە. ئەو ناڤەندا فەرمانگەھا ئەیالەتا زاگرۆسێ بوو. د سالێن 1990 دە زێدەتر ژ سەدان گەریلا  ب تابووران ل ور ب جھ ببوون. سەدان گەریلایان ل سەر گۆلێن ساتێ وێنە د کشاندن. نھا ل ڤر دەنگێ گولـلەیان نایێ بھیستن. ئەڤ دەر نھا قادا ڤیستەڤال و گەشتییاریێ یە. دەولەتا ترک ھەرێما جیلۆ-چارچەل وەکە “پارکا مللی” راگەهاند. گەشتییار ھندەک پێلاڤێن مەکاپ یێن پاشمایێ گەریلایان وەکە بیرئانین وێنە دکن.

پەکەکە ل جیلۆ تێک چوو، نکاریبوو خوە ل ور بگرە، ڤەکشیا و ھات گرێ جوودی (گوندی سێری)یێ کو 8 کم دووری ئامێدیێ یە و دبێژە ئەم دێ داگیرکەرێن ترک تێک ببن.

نەوالا جەھەننەمێ “دۆلا ھەسپست” بوویە بھەشتا تووریزمێ

نەوالا جەھەننەمێ یا ل ناڤبەرا ھەزەخێ یا باسا یا ب سەر شرنەخێ ڤە د سالێن 1990 دە ناڤەندا شەری بوو. لەشکەرێن ترک ژ بەر کو نکاریبوون داکەڤن وی گەلی ژێ رە دگۆتن نەوالا جەھەننەمێ. د بن ھەر زنارەکی دە کۆزکەکا گەریلایان ھەبوو. گەل ھەتا داویێ پشتگری دا پەکەکێ. گەلییێ جەھەننەم ئێدی نە قادا شەری یە، بوویە قادا تووریزمێ. پەکەکە ژێ ڤەکشیایە ھاتیە و ل چیایێن سلێمانیێ بەحسا تێکبرنا دەولەتا ترک دکە.

ئیجار چما گەلییێ پساخا، دەڤەرا سندییان قادا شەری یە؟ ب سەدان دارێن فێقیان و شکەفتێن خوەزایی ب سالانە ژ گوندییان رە قەدەغەیە. گوندیێن گەلییێ پساخا ژ ئاخا خوە ھاتن ڤەقەتاندن و مەحکوومی زاخۆ بوون.

ئەڤ دەر دەشتا فەراشینێ یە، موراد قارایلان ل ڤر ب شەرڤانێن خوە رە پێشبرکا ئاژۆتنا ھەسپان دکر. نھا گەریلا لێ نەماینە. تەنێ کۆچەر و گەشتییار تێنێ.

ئەڤە سوولاڤا مارینۆسە، د سالێن 1990 دە یەکینەیێن لۆژیستیکێ یێن پەکەکێ ل ڤر پەز خوەدی دکر. ھاڤینگەھا قارایلان بوو. نھا ئەڤ سوولاڤ بوویە قادا گەشتییاری.

پەکەکە پێشی ئامەد، گارزان و بۆتان تەرکاند. پاشێ گها سەر سینۆر ئانکو خاخورک، حەفتەنین، بەرواری بالا و ژ ور ژی ڤەکشیا. نھا بازنێ دویەمین دخوازە بکە قادا شەری.

پەکەکە تێک چوویە، شێوازا شەرێ پەکەکێ تێک چوویە، گەریلاتی تێک چوویە. پەکەکە دخوازە ڤێ شکەستنێ ل سەر ھەرێما کوردستانێ بالاڤ بکە. و وەکە دەرفەتا  داوی ژی دخوازە پێشمەرگە تووشی شەری بکە. شەری ل سەر پێشمەرگێ کوردستانێ بسەپینە. دڤێت خەلکێ باشوورێ کوردستانێ بێژیتە پەکەکێ “ئێدی بەسە”.