بووبێ ئەسەر
ئەڤین حەزکرنە. ئەڤین روومەتگرتنە. ئەڤین پاراستن و خوەدی دەرکەتنا ل تشتێن ب نرخە. ئەڤین خوە ناسکرن و ھەبوونە. لۆما ژی د رێبازا بارزانیێ نەمردە ئەڤ خالە جھ و وارەکی گرینگ دگرە. ئەڤین نە تەنێ حەزکرنا رەگەزان ئانکو مێ و نێران یا ل ھەمبەری ھەڤە. ئەڤین نە ئەوە تەنێ کەچ یان ژی کورەک، حەز ژ ئێک دو بکن. ئەڤین نە تەنێ دلگرتنا کەچ یان ژی کورانە. ژ بەر ڤێ یەکێ یە کو د رێبازێ دە ئەڤ خالە گەلەکی خوەش و رند ھاتیە ب کارئانین و پاراستن. د رێبازێ دە ئەڤ خال ھاتیە ڤەهاندن دا کو ھەرکەس ببە حەزکریێن وەلاتێ خوە و ببن ئەڤیندارێ گەلێ خوە. ئەڤ خالە د رێبازێ دە گرینگ و پیرۆزە. لەوما ل ڤێ دنیایێ ھەر تشتەک ل گۆر بنگەهێن حەزکرنێ تێ ئافراندن. ھەگەر حەزکرن تونە بە، ژیان ژی نابە…
ژ بەر کو وەلاتێ کوردان داگیرکرییە لەوما گەلەک تشت و ھێژاییێن وەلاتی ل سەر ناڤێ ئەڤین و ئەڤینداریێ ھاتن گۆتن. د بەرھەمێن مەلایێ جزیری دە د مەم و زینا ئەحمەدێ خانی دە ل سەر رەوشا ئەڤین و ئەڤینداریا وەلات گەلەک تشتێن خوەش و ھێژا ھاتنە ب کارئانین و نڤیسین. مەم و زین و گەلەک بەرھەمێن دن یێن رەوشەنبیرێن کوردان، ب بەرنامە و ھێژاییا دەولەتبوونێ، حەزکرنا وەلات، ب ئەڤین و ئەڤیناداریا وەلات ھاتنە خەملاندن.
د گەلەک بەرھەمێن کوردی دە ئەڤین و ئەڤینداریا وەلات ب ئاوەیەکی مەجازی ئانکو ب حەزکرنا کور و کەچان ئانینە زمان کو دژمن ژ وان فێم نەکن. لۆما ژی بارزانیێ نەمر ئەڤە وەکە خالەکا فەلسەفەیا خوە دیاری مە کوردان کرییە. ژ بەر کو کوردان ئەو ئیمکانا کو راستە راست ناڤێ وەلاتێ خوە ب کاربینە نەدیتنە لۆما رەوشەنبیر و نڤیسکارێن کورد تم ژ بۆنا ئێش، جەفا و دەردێ وەلاتێ خوە ل سەر ناڤێ ئەڤین و ئەڤیندارێ ئانینە زمان.
دەما مرۆڤ ل سترانا محەمەد شێخۆ “ئای لێ گولێ” گوھداری دکە، دزانن کو ئەو گول کوردستانە و پشتی تێکچوونا سالا 1975 دنالە، دئێشە گازی و ھاوارا ل کوردان دکە کو خوەدی ل کوردستانا خوە دەرکەڤن. خوەدی لێ دەرکەڤن و وێ گولێ ئانکو وەلاتێ خوە ژ بندەستیێ دەرخن. چما وەھا گۆتیە؟ ژ بەر کو وێ دەمێ دەرفەت تونە بوو کو وەلاتێ خوە ب ناڤێ کوردستانێ راستە راست ب ناڤ بکە، نالین و ئێشا وی ئانیبا زمان.
لێ بارزانیێ نەمر ژی ھەمی بەرھەم و بێژەیێن ل سەر ئەڤینێ ھاتبوون گۆتن و نڤیساندن، کرینە خالەکا گرینگ یا رێبازا خوە. ژ بەر کو وی باش دزانیبوو و فێم کربوو کو ب رێیا ئەڤینێ ئانکو حەزکرنێ مرۆڤ دگھێژە مرادا خوە. لەوما وی خوەست کو گەلێ وی، حەژێکەرێن وی، کەسێن ل شەر شۆپا وی دڤێت ژ وەلاتێ خوە، ژ ملەتێ خوە، ژ خەلکێ خوە حەز بکن.
لەوما د ڤێ خالا ئەڤینداریێ دە، بارزانیێ نەمر کرییە کو ھەرکەس ببن ئەڤیندارێ وەلاتێ خوە دا کو بکاربن وێ ئەڤیندارا خوە بپارێزن. خاوەنداریێ لێ بکن و وێ ژ ناڤ دەستێن داگیرکەرێن دەڤبخوین ئازاد بکن. و ھەر وەھا ژی کر و بوو. ھەگەر ئەو خالە نە با، باشوورێ کوردستانێ ژ ناڤا ئەوقاس دژمنان دە دا چاوا ئازاد ببە؟ لێ ب سایا وێ ئەڤینا کو بارزانی د رێبازا خوە دا خوەستبوو کو ھەرکەس ببن ئەڤیندارێ وەلاتێ خوە، لەوما باشوورێ کوردستانێ ئیرۆ ئازادە. سبە دێ ببە سەربخوە.
سەدەم چ بوو کو ئەڤ خالە وەکە خالەکا گرینگ د رێبازا بارزانی دە جھ گرتیە؟ ژ بەر کو دەما مرۆڤ دبە ئەڤیندارێ کەچەکێ، ژ بۆنا وێ خەو ل مرۆڤ حەرام دبت، مرۆڤ ژ خوارنێ تێ برین، فکر و رامانێن مرۆڤ تم ل سەر ئەڤیندارا مرۆڤە کو مرۆڤێ چاوا و چ دەمێ خوە بگەهینتێ و ب مرادا خوە شاد ببە، ھەر گاڤ هزرا وێ دکە و حەژ وێ دکە. ژ بۆنا ب دەستخستنا وێ مرۆڤ کوور و دوور دفریت و د ناڤا رامانان دا وەندا دبە. د دیرۆکا مە دە تێ زانین کو گەلەک جامێران ژ بۆنا ئەڤیندارا خوە ب دەست بخن، گەلەک زۆر و زەحمەتی دیتنە، گەلەک ژ وان تەرکی دنیایێ بوونە. گەلەکان مال و ملکێن خوە تەرکاندن و تەنێ ب دووڤ ئەڤینا خوە کەتنە. واتە کەسەکی ئەڤیندار ژ بۆنا ئەڤینا خوە ھەر تشتەکی دکە، ھەر زەحمەتیێ ددە بەر چاڤێن خوە دا کو خوە بگهینە ئەڤینا خوە.
ژ بەر ڤێ سەدەمێیە کو بارزانیێ نەمر ئەڤە وەکە خالەکا رێبازێ دایە دیارکرن کو ئەو کەسێن ببنە ئەڤیندارێ وەلاتێ خوە، دێ ژ بۆنا وێ ھەر فەدەکاریان بکە. دێ تم د ناڤا ھەولدانان دە بن کو دژمنێن کەتنە سەر ئەڤینا وی راکە. ژ وەلاتێ خوە دوور بخە. ل ھەمبەر وان شەر بکە دا کو ئەڤینا خوە ئانکو وەلاتێ خوە ئازاد بکە. لۆما ژی ب سالانە کو کوردێن ئەڤیندارێ وەلاتێ خوە، ژ وێ رێبازێ ھێز و قاوەت وەرگرتنە دا کو وەلاتێ خوە ئازاد بکن. لەورا ژی کەسێن کو ب ڤێ رێبازێ باوەرن دڤێت ئەو ژی ببن ئەڤیندارێن وەلاتێ خوە.
ئەڤ حەزکرن و ئەو ئەڤین بوو کو باشوورێ کوردستانێ ل گۆر وێ رێبازێ ھاتە ئازاد کرن. لێ دیسا دڤێت کەسێن ب وێ رێبازێ باوەرن، ل گۆر وێ، پارچەیا خوە ئازاد و ئاڤادان بکن، ژ بۆنا وەکھەڤی و دەمۆکراسیا وێ دڤێت کار بکن. ھەروەھا دڤێت پارچەیێن دن ژی ژ بیر نەکن.
ب سەبر بن دا کو ھوون، ئەم ھەمی ب ھەڤرە د کوردستانەکا ئازاد و سەربخوە یا ل گۆر رێبازا بارزانیێ نەمر و ل سەر خەتا نەتەوەیی ببینن و تێدە بژین…
