Skip to contentته‌رۆر و ماف
ده‌ما كه‌سه‌ك یان سازیه‌ك كاره‌كی ئه‌نجام دده، باوه‌ر ب وى كارى هه‌یه لۆما ئه‌نجام دده، ژ بۆ كو ره‌واتیێ ژی بده وی كارێ خوه دكه‌ڤه ناڤا هه‌ولێن مه‌زن ده.
ئه‌ڤ نه‌رین هه‌یا ئاسته‌كی جیهێ خوه د سه‌رده‌مێن به‌رێ ده دگره، لۆما ژی چه‌ندین شه‌رێن دژوار چێبوون و ئه‌و شه‌ر دبوون سه‌ده‌ما وێرانكرنا گه‌ل و ولاتان و تم خه‌ته‌ری و ترس مێهڤانێ رۆژێ بوو.
ژ بۆی پێشیگرتنا ل وێ مالوێرانیێ، پرانییا ده‌وله‌تێن جیهانێ ژ بۆ كو خوه و گه‌لێ خوه بپارێزن به‌رێ خوه دان نه‌ته‌وێن یه‌كبوویی و هنه‌ك یاسا چێكرن و پێناسه دان هه‌ر كریاره‌كێ.
پشتی زه‌لالكرنا وان یاسا و پێناسه‌یان، هه‌موو ولات پابه‌ند كرن بۆ جی ب جی كرنا وان یاسایان و ل گۆر وان پێناسه‌یان و هه‌ر ولات یان هێزه‌كه كو ئه‌و یاسا بنپێ كربان، وه‌لاتێن دن ل دژی وان دكه‌تن لڤ و ته‌ڤگه‌رێ.
یێك ژ وان بریارا ئه‌و بوو كو پێویسته هه‌موو ولاتێن جیهانێ ل دژى كارێن ته‌رۆرێ ده‌ركه‌ڤن و نابه ب ت ئاوایه‌كی پشتگرییا ته‌رۆرێ وه‌ره كرن یان وه‌ره حه‌واندن.
ژ بۆ كو روویێ ئانالیزه‌كرنا كارێن ته‌رۆرێ به‌رفه‌ره‌هـ نه‌به و نه هه‌ر كه‌س یان ولاته‌ك ل گۆری به‌رژوه‌ندیێن خوه پێناسه‌یا ته‌رۆرێ بكه، هاتن پێناسه‌یه‌كه گورجوگول دان ته‌رۆرێ، ئه‌و ژى دیار كر كو ته‌رۆر واته ئه‌نجامدایینا كاره‌كی كو ژیانا ولاتیێن سڤیل و سازیێن سڤیل بكه‌ڤه د خه‌ته‌ریێ ده.
پارتیا كاركه‌ران یێك ژوان رێخستنانه كو كه‌تییه د لیستا ته‌رۆرێ ده ژ هێلا جڤاكا ناڤنه‌ته‌وی ڤه، سه‌ده‌ما سه‌ركه ژى ژ بۆی وێ ڤه‌دگه‌ره كو ڤێ رێخستنێ ب ته‌یبه‌ت د قۆناغێن ده‌رباسبوویی ده كارێن ب گۆمان ئه‌نجام دا نه، مینا ته‌قاندنا وه‌سایتان ل ئه‌ورۆپایێ، چێكرنا ترسێ ب رییا گه‌فخوارنێ ل سه‌ر ولاتیێن سڤیل و قه‌تلكرنا كادرۆیێن پارتیێن كوردستانی ل باكور و رۆژئاڤا و هه‌ر وها تاسفیه‌كرنا پارتی و رێخستنێن چه‌پ، پارتیا كاركه‌ران ل ڤر نه‌سه‌كنی، لێبه‌لێ ب ده‌هان كادرۆیێن خوه ب خوه ژی ب هنجه‌تێن جودا تاسفیه كرن.
هه‌گه‌ر ئه‌م قالا چالاكیێن ته‌رۆریستی یێن پارتیا كاركه‌ران بكن، دێ نه شاش به كو وه‌ره گۆتن كو مرۆڤ دكاره پرتووكه‌كی ل سه‌ر بنڤیسینه.
گه‌لۆ چالاكییا هه‌ری داوین یا پارتیا كاركه‌ران كو ل ئه‌نقه‌رێ ئه‌نجام دا یه دبه كاره‌كی ته‌رۆریستی؟.
ل گۆری یاسا و پێناسه‌یێن ته‌رۆرێ ئه‌و چالاكی دكه‌ڤه د كاته‌گۆرییا ته‌رۆرێ ده، ژ به‌ر كو مرۆڤ ب خوه خوه ب ته‌قینه و ل جیهه‌كی سڤیل به و ولاتیێن سڤیل بكه‌ڤن د خه‌ته‌ریێ ده، ئێنجام ئه‌ڤ كار دبه چالاكیه‌كی ته‌رۆریستی.
پرسا دویه‌مین ئه‌ڤه: گه‌لۆ كیژان ئالی زێده سوودێ ژ ڤێ چالاكیێ دبینه، پارتیا كاركه‌ران یان ده‌وله‌تا ترك؟
پرانییا ده‌وله‌تێن جیهانێ ل دژی وێ كریارێ ده‌ركه‌تن.
پرانییا ده‌وله‌تا ماف ب تركیه‌یێ دا كو ب هه‌ر ئاوایه‌كی به‌رگریێ ژ خوه بكه.
كوشتنا دختۆره‌كی ڤیتێرنه‌ری و دزینا ئۆتۆمۆبیلا وی دو پێناسه دان كوردان یێك كوشتنا مرۆڤێن سڤیل و یا دویه‌مین ژی دزی.
دو جوانێن كورد هاتنه كوشتن و دو پۆلیسێن ده‌وله‌تا ترك بریندار بوون، ژیان ژ ده‌ست دانا دو جوانێن كورد بێی كو چ ده‌ستكه‌فتیێن ستراته‌ژیك ژ بۆی كوردان بێن ده‌ستخستن، كاره‌كی بێئاقلانه‌یه، دیسا دو پۆلیس بریندار بوون كو ت پێوه‌ندییا وان ب سیاسه‌تا ده‌وله‌تا ترك ڤه تونه كو ئه‌و ببن ئارمانج.
هه‌یا نها زێده‌ی 300 كه‌چ و خۆرتێن كوردان هاتنه ده‌سته‌سه‌ر كرن.
ل رۆژا ئه‌نجامدایینا وێ چالاكیێ و هه‌یا نها ده‌وله‌تا ترك مه‌زنترین ئۆپه‌راسیۆنێن له‌شكه‌ری ب رییا بالافرێن شه‌ر ل دژی باشوور و رۆژئاڤا ده‌ستپێكرنه.
پرانییا سازیێن رۆژئاڤا یێن گرێداىی ژێرخانه‌یا ئابوورى هاتنه ژ ناڤ برن و وێرانكرن هه‌یا كو گهیشتیه ئاسته‌كی كو ب ده‌ستخستنا نانێ رۆژێ بوویه كاره‌كی هه‌ری زه‌حمه‌ت.
ل داویێ ژی دبێژم: گه‌لۆ كێ سوود ژ وێ چالاكیێ دیت؟؟
