نووری چەلیک
د ڤێ جیھانێ دە جهێ ھەری ب پرسگرێک، ھەری ئالۆز، ھەری پاشکەتی و خوەدی ھەری ئایدۆلۆژی و باوەرمەندییێن کەڤنەپەرەست رۆژھلاتا ناڤینە. و مخابن، مللەتەکی وەک مللەتێ کورد پێشکەتی، دەمۆکرات، مرۆڤحەز و قەدرشناس د ناڤ رۆژھلاتا ناڤین دە ئاسێ مایە، بوویە ئێخسیرێ ھرچ و ھۆڤێن رۆژھلاتا ناڤین و وەلاتێ وی د ناڤ دەولەتێن ھەری ھۆڤ و نژادپەرەست دە ھاتیە دابەشکرن. د ئەنجاما ڤێ بندەستیێ و دابەشکرنێ دە ب ھشمەندی و گیانێ مللەتێ کورد ھاتیە لیزتن، نە تەنێ وەلاتێ وی، مەژی و ھەست و ھەر نرخێن وی یێن پیرۆز ژی ھاتنە داگیرکرن. ب ڤێ داگیرکرنێ کورد ژ ھشمەندییا خوە، ژ ھەست و گیانێ خوەیێ پاک و رەوان دوور کەتیە، کەسایەتییا خوە وندا کریە و د ئەنجامێ دە بوویە ئەڤیندارێ جەلادێ خوە.
ژ سەد سالان و ڤر دە، و ھەتتا ژ دەرکەتنا ئۆل و پێغەمبەرێن رۆژھلاتا ناڤین و ڤر دە، واتە ژ ھەزار سالان و ڤر دە، رۆژھلاتا ناڤین بوویە ماک و چاڤکانییا ھەموو ناکۆکی و ئالۆزییێن ل جیھانێ. ئەو ناکۆکی و ئالۆزی ئیرۆ ژی ھەنە، دێ سبێ ژی ھەبن، و بەلکی ھەتا رۆژا قیامەتێ ژی دێ بەردەوام بن. ھەتا دەولەت و رەژیمێن تۆتالیتەر و بەرژەوەندییێن ئابۆری، ئۆلی، چاندی، لەشکری و سیاسی ھەبن، دێ رۆژھلاتا ناڤین ژی وەک ماک و ناڤەندا ناکۆکی و ئالۆزییان بمینە.
دەمۆکراسی، ئازادی، وەکھەڤی
گۆتنێن دەمۆکراسی، ئازادی و وەکھەڤییێ ل بەژن و بالا رۆژھلاتا ناڤین نایێن. ژ دەولەت و رەژیمێن رۆژھلاتا ناڤین رە دەمۆکراسی، ئازادی و وەکھەڤی وەک کراسەکی ژ ئاگری یە. ھەلبەت ئەم ئالیگرێن دەمۆکراسی، ئازادی و وەکھەڤییێ نە. ئەم ئالیگرێن ئاشتی و دژبەرێن شەری و مرن و کوشتنێ نە. لێ ئاشتی، دەمۆکراسی، ئازادی و وەکھەڤی ژ رۆژھلاتا ناڤین رە تێ واتەیا ھەبوون و تونەبوونێ.
دەمۆکراسی دێ رەخنەکرنێ، لێکۆلینێ، لێپرسینێ، خوەندن و زانیارییێ، ئەشکەرەکرنا راستییێ و گەلەک ھەلوەستێن دن ب خوە رە بینە. ئازادی دێ حەق و حقووق، مافێ مرۆڤان، سەرھلدان و بەرخوەدانان، دەرکەتنا دەرڤەیی سینۆرێن ئۆلی و جڤاکی ب خوە رە بینە. وەکھەڤی دێ تەختێ دەستھلاتدار و رێڤەبرێن کو ل سەر ئۆلێ، ل سەر بەرھەمێن ئۆلدارییێ و ل سەر دەولەمەندییێن وەلاتی دچەرن بھەژینە. و ژ ھەموویان زێدەتر و گرینگتر، دەمۆکراسی، ئازادی و وەکھەڤی دێ ل رۆژھلاتا ناڤین ببە سەبەبێ ناسکرن و قەبوولکرنا ناسکرن و ھەبوونا کورد و کوردستانێ.
ناسکرن و قەبوولکرنا کورد و کوردستانێ ژی تێ واتەیا ئەشکەرەکرن و راستییا دەولەمەندییا چاند و زمانێ کوردی، بەرفرەھی و دەولەمەندییا جوگرافی و دیرۆکا مللەتێ کورد. ب ئەشکەرەکرن و قەبوولکرنا چاند و زمانێ کوردی دێ ئەشکەرە ببە کو (ب تایبەت ترک و فارس) بنگەھا چاند، زمان و رێزمانا وان ژ کوردی ھاتیە دزین. ب ناسکرنا جوگرافی و دیرۆکی دێ هێت دیتن کو وان وەلاتێ خوە ل سەر خاکا کورد و باپیرێن کوردان ئاڤا کرنە. واتە، نە چاندا وان دمینە، نە زمانێ وان، نە ژی دیرۆکا وان. ژ بەر کو ھەر تشتێ وان ل سەر ھەبوون و دەولەمەندییێن کوردان ھاتنە ئاڤاکرن، دێ تشتەکی کو کاربن خوە پێ بپارێزن ژ وان رە نەمینە. ئەڤ یەک د پێشییا دەمۆکراسی، ئازادی و وەکھەڤییا رۆژھلاتا ناڤین دە ئاستەنگییەک ب سەرێ خوەیە.
کورد و فلستینی، کوردستان و فلستین
رۆژھلاتا ناڤین ژ ئالییێ جیۆپۆلیتیک و دەولەمەندییێن سەرئەرد و بنەرد ڤە ھەلبەت گلیزا دەڤێ دەولەتێن وەک ئامەریکا، رووسیا، بریتانیا، فرانسا، چین و وەکی دن ژی دحەرکینە. دەولەمەندییا ئاڤ، گاز و نەفتێ (پەترۆلێ) و بەرژەوەندییێن دەولەتان ناھێلە کو ئیستیقرار و ئارامی ل رۆژھلاتا ناڤین چێببە. پارچەکرنا کوردستانێ د ڤێ چارچۆڤەیێ دەیە، دەولەمەندییا خاکا کوردستانێ یە. بنگەھا سیاسەتێ ئابۆری و بەرژەوەندییە. تێکلی، دۆستانی و دژمناتی ل سەر ئەساسێ بەرژەوەندییان دەست پێ دکن. ئەڤ یەک ژی گەلەک جاران ب ناڤێ مرۆڤحەزییێ، جارنا د بن پەردا ناکۆکی و ئالۆزییێ، جارنا ژی ب ناڤێ نیژادپەرەستی یان ئۆلپەرەستییێ تێن دەستپێکرن.
پرس و پرسگرێکا کورد و فلستینییان، پرسا کوردستان و فلستینێ ل رۆژھلاتا ناڤین دو پرسگرێکێن سەرەکە نە. پرسا فلستینی و فلستینێ وەک ھەرێم پرسگرێکا ئسرایلێ یە، سەرێ ئیسرائیلێ دئێشینە. چارەسەرکرنا وێ ژی پرسگرێکا ئیسرائیلێ یە. کورد و کوردستان جودایە، نە وەک فلستینێ یە. ھەگەر پرسگرێکا فلستینێ بنگەھا دەولەتا ئیسرائیلێ دھەژینە، کوردستان بنگەھا چار دەولەتان، ھەروەھا بنگەھا تەمامێ رۆژھلاتا ناڤین دھەژینە، دگوھەرینە. چارەسەرکرنا پرسا کورد و کوردستانێ تەمامێ پلان و پرۆژەیێن دەولەتێن مەزن یێن ل سەر رۆژھلاتا ناڤین دگوھەرینە، تێک دبە. ژ بەر ڤێ، پرسا کورد و کوردستانێ سەد قات ژ پرسا فلستینی و فلستینێ مەزنتر و گرانترە.
ئیسرائیل و فلستین، یان ژی جھوی و فلستینییێن عەرەب، ھەر دو ئالی ژی ھەبوونا خوە ل سەر ئەساسێ نەتەوپەرەستییەک توند ئاڤا کرنە و ب وی شێوەیی نەیارتییا ھەڤ دکن. دخویە کو چ ئۆلی بە، چ ژی دۆزا نەتەوی بە، نەتەوپەرەستی و ھەتتا نیژادپەرەستییا کو ھەردو ئالی دکن دێ د پێشەرۆژێ دە قەتلیعامێن مەزنتر ب خوە رە بینە. دل دخوازە کو ھەردو ئالی د چارچۆڤەیا دیالۆگ و سینۆرێن دەمۆکراسییێ دە پرس و پرسگرێکێن خوە چارەسەر بکن. لێ خویایە مەسەلە نە تەنێ ب ئیسرائیل و حەماسێ ڤە گرێدایی یە.
ترک و کورد، ئیسرائیل و فلستینی
پەکەکێ د 1/10/2023 دە ل پایتەختا ترکییێ، ل ئەنقەرێ، ل بەر دەرییێ وەزارەتا ناڤخوەیی چالاکییەک پێک ئانی و دو ھەڤالێن خوە دان کوشتن. ڤێ چالاکییێ ژ فایدەیێ زێدەتر زرار دا کوردان و رێ ژ بۆ دەولەتا ترک ڤەکر کو ئێریشی رۆژئاڤا و باشوورێ کوردستانێ بکە. ب تایبەت رۆژئاڤا د بن بۆمبەبارانا دەولەتا ترک دە ما و گەلەک کورد ھاتن کوشتن و بریندارکرن، گەلەک ژ جیھ و وارێن خوە بوون. پشتی وێ ب چەند رۆژان حەماسێ ب ئێریشەک مەزن و کەسێ نەدیتی ئێریشی ئیسرائیلێ کر و قیامەت رابوو. تو دبێی قەی ھەردو ئێریش ژی ژ ناڤەندەکێ و ژ بۆ ئارمانجەکێ ھاتنە پێکانین. بۆمبەبارانا دەولەتا ترکا ل سەر پەکەکێ، باشوور و رۆژئاڤا ژ رۆژەڤا جیھانێ دەرکەت، یان ژی ھات دەرخستن، ئیسرائیل و حەماس کەتن شوونا وێ. نھا بۆمبەباراندنا ئارتێشا ترکییێ نە د خەما کەسی دەیە، ئیسرائیل و حەماسێ ب شکلەکی رۆژەڤ گوھەرتن. ھەگەر شەرێ ئیسرائیل و فلستینییان بەرفرەھتر ببە و پەشکێن وێ خوە بگھینن حزبووللاھا لوبنان و ئیرانێ، دێ شەر مەزنتر و بەرفرەھتر بت، دێ ببە شەرەکی ناڤدەولەتی، شەرێ بلۆکا رۆژئاڤا و ئامەریکا و رووسیا و ھەڤالبەندێن ئیرانێ. گەلۆ ئەڤ لیزتکەک نوویە، یان ژ بۆ پرۆژەیا مەزنا رۆژھلاتا ناڤین گاڤەک نوویە، کەس نزانە. لێ خویایە دێ پەشکێن وێ ل مە کوردان ژی بکەڤن.
ھەرکەس ل سەر مرییێ خوە دگریت
وەک من ل ژۆر ژی ئانی سەر زمان، د ئەنجاما بندەستی و دابەشکرنا کوردستانێ دە ب ھشمەندی و گیانێ مللەتێ کورد ھاتیە لیزتن. نە تەنێ وەلاتێ وی، مەژی و ھەست و ھەر نرخێن وی یێن پیرۆز ژی ھاتنە داگیرکرن. ب ڤێ داگیرکرنێ کورد ژ ھشمەندییا خوە، ژ ھەست و گیانێ خوەیێ پاک و رەوان دوور کەتیە، کەسایەتییا خوە وندا کریە و د ئەنجامێ دە بوویە ئەڤیندارێ جەلادێ خوە. ژ بەر ڤێ عەجێبی و مالکمباخییێ، ئەم نە ل سەر مرییێن خوە، لێ ل سەر مرییێن خەلکێ دگرین. مە دەڤ ژ دۆزا خوە بەردایە، مە دایە دوو دۆزا خەلکێ. رۆژئاڤا و باشوور تێ بۆمبەکرن، کورد تێن کوشتن، دەنگ ژ کەسی دەرنایێ. لێ ژ بۆ فلستینییێن کو دەستەبرایێن سەدام بوون و دەستێ وان د خوین و نامووسا کوردان دە ھەیە کراسێ خوە دچرینن. ھەڤالبەندییا ئیسرائیلا کو پشتگرییا کوردستانەک سەربخوە دکر ناکن، لێ فلستینییێن کو کوردستانەک سەربخوە وەک خنجەرا د پشتا عەرەبان دە دبینن دکن تاجا سەرێ خوە.
ما ئەز چ بێژم…
خوەدێ کەریم و رەحیمە…
ھەلبەت دێ رۆژەکێ فەلەکا بێبەخت بەرێ خوە بدە مە ژی..
