بووبێ ئەسەر

من بەرێ ژی ل سەر رێبازێ ئانکو فەلسەفەیێ نڤیسی بوو و د ور دە ئانیبوو زمان کو دڤێت ئێدی ئەم فەلسەفەیا خوە وەکە رێباز ب ناڤ بکن دا کو پتر، باشتر و خوەشتر بهێت فێمکرن. لەورا ژی ئەز دێ ڤێ جارێ دیسا پێچەکێ ل سەر رێبازێ بسەکنم. ژ بەر کو رێباز قەدەرا مللەتەکی، ھەبوونا گەلەکی و ئاڤادانا وەلاتەکی ددە دیارکرن. ژ بەر ڤێ چەندێ یە کو دڤێت ئەم ژی وەکە کورد و ل سەر ئەردا خوەیا ئازاد، ب شێوەکی رەحەت و ڤەکری فێری ڤێ رێبازا خوە ببن. وێ فێری بچووک و زارۆکێن  خوە، جوان و کەسێن خوە بکن.

سەدەما کو دڤێت ئەم ل سەر رێبازێ بسەکنن ئەڤە. ژ بەر کو ملەتەک نکارە بێ رێباز وەکە مللەت بژی. ھەگەر ئەم ژی ملەتەک بن و خوەدی رێبازەکێ بن کو ئەو رێباز ژی ھەیە. رێبازا بارزانیێ نەمرە. ژ بەر ڤێ دڤێت ئەم وەکە ملەت وێ رێبازێ باش فێر ببن و وێ بدن فێمکرنێ. ھەتا کو رێباز د ناڤا گەل دە زیندی نەبە. ھەتا کو ئەو رێباز ل دبستانان نەیێ خوەندن. ھەتا کو مرۆڤێن کورد نەدن سەر شۆپا ڤێ رێبازێ، مرۆڤ  ژ ھێژایی و خوەشیێن مللەتبوونێ پیچەکێ دوور دکەڤە.

ھەگەر ئەم ل جیھانێ و ل مللەتێن وەکە دەولەت دژین بنێرن، دێ هێت دیتن کو ھەر مللەتەک خوەدیێ خوە و رێبازەکێیە. لەورا دەولەت ژی خوە ل گۆر رێبازا خوە دھوونە. خوە ل گۆر وێ دھوونە و نووژەن دکە. دەم و دەزگەھێن خوە ل گۆر وێ ژ نوو دە دادمەزرینە. جێشا خوە یا لەشکەری ل گۆر وێ ب رێخستنی دکە. زانکۆیێن خوە ل گۆر وێ ڤەدکن. د دبستانێن خوە دە ل گۆر رێبازێ کارێ خوەیێ پەروەردەیی دکن. ژ بەر کو رێباز روحیەتا نەتەوەیاتیێ ددە مرۆڤ. ژ بەر کو رێباز ئینسانێ خوە ل گۆر ھزرا نەتەوەبوونێ پەروەردە دکە.  لۆما ژی دەما مرۆڤ ل گۆر ڤان شەرت و شرووتان بهێت پەروەردەکرنێ، مرۆڤ دێ ب رەحەتی و بێ ترس بکاربە وەلاتێ خوە ل ھەمبەر ھەمی مەترسیێن ھەیی بپارێزە.  ژ بەر کو رێباز، دەستوورە، بەرنامە و قانوونە.

ژ بەر ڤان سەدەمانە کو دڤێت ئەم کورد ژی ل وەلاتێ خوە یێ ئازاد، رێبازا خوە بەری ھەرتشتی ب پێشڤە بخن. دڤێت کارێ رێڤەبەرێن مە یێن باشوور و ب تایبەتییا پەدەکێ و بارزانیان ئەو بە کو گەلێ خوە ب ڤێ مەزن بکە. مرۆڤێن خوە ل گۆر وێ پەروەردە بکن.

دڤێت نەیێ ژ بیر کرن کو رێباز، رێیا پاراستنا گەل، ب پێشڤەخستنا دەمۆکراسیا وەلات و ئاڤادانیا وێ یە. ملەتەکی بێ رێباز ئانکو رێبازا خوە نزانت دێ وەکە ماھرێ کو تو دارەکی ل سەرێ بدەی دێ هەرتم گێژ بە و دێ نکاربە رێیا خوە ب رەحەتی ببینە. ملەتەکی بێ رێباز دێ وەکە جێشەکا بێ چەک بە. ملەتەکی بێ رێباز دێ وەکە دارا بێ فێقی بە.

نە تەنێ ژ بەر ڤان سەدەمێن کو من ل ژۆر رێز کرین، ژ بۆنا مرۆڤ رێبازا خوە بپارێزە گەلەک سەدەمێن دن ژی ھەنە. لێ من یێن ئەساسی ئانین زمان دا کو رێڤەبەرێن مە یێن باشوور کو ئیرۆ گەلەک ئیمکان و دەرفەت د دەست وان دە نە، بلا ل سەر ڤێ یەکێ راوەستن و زووترین وەخت دەست ب ڤەژاندنا ڤێ رێبازا پیرۆز یا کو ئەم ژ دەستێ زلمکاران دەرخستنە و کرنە خوەدی وەلاتەکی ئازاد، بکن.

بلا ئەڤ رێبازە ژ نوو دە لێ وەکە بارزانییێ نەمر دانیە بێ نڤیسین. بلا ئەڤ رێباز د دبستانان دە بێ خوەندن. بلا ئەڤ رێباز ببە خالەک ژ خالێن پەروەرداییا ھێزا پێشمەرگەیان. بلا ئەڤ رێباز بکەڤە بەرنامەیێن پەدەکێ کو د ھەموو بەش و خەباتێن خوەیێن پەروەردایی دە بدە خوەندن، بدە فێر کرن و ژ نوودە زیندیکرنا وێ. ئەڤ کار بەری ھەر کەسی کارێ پەدەکێ و کەسێن ب ڤێ باوەرن دڤێت دەستپێ ببە.

ھەتا کو ئەڤ رێبازە د ناڤا گەل دە و د مەژیێن مرۆڤان دە، د رووحیەتا کەسان دە جھێ خوە نەگرە، دێ ھەر تم مەترسی ل سەر وەلاتێ مە یێ ئازاد ژی ھەبە. دڤێت رێڤەبەرێن مە و ب تایبەتێ پەدەکە ئیرۆ ب ڤی کاری ڤە رابن دا کو ئەڤە ل پارچێن دن ژی بێ زانین. وان ژی ل گۆر ئیمکانێن کو ئیرۆ ھەنە ئانکو ب رێیا تەلەڤزیۆن، رۆژنامە، کۆڤار و رادیۆیان دە بدە ناسین و زانین.

لێ دڤێت نەیێ ژ بیر کرن کو ب جھ ئانیننا ڤێ رێبازێ، بەلاڤ کرن و ژ نوودە زیندیکرنا وێ، ئێدی ئەم ژی دێ وەکە مللەت بێی کێماسی بژین. چ مللەتێن کو بێ رێباز دژین، نینە. مادەم کو ئەم ژی مللەتەک ژ وان مللەتێن جیھانێ نە، دڤێت ئەم ژی خوەدیتیێ ل ڤێ رێبازا پیرۆز بکن و خوەدی ل وێ دەرکەڤن و بزانبن خوەدی ل وێ دەرکەتاندن، پاراستنا وەلات و پێشختنا دەمۆکراسیا وی ب خوەیە..