ئیرۆ ژ ئالیێ سازیا ب ناڤێ HSM (ناڤەندا پاراستنا گەل) سازیا ھێزێن لەشکەری یێن پەکەکێ داخویانیەک هات دایین. د داخویانیا ھەسەمێ دە وھا ھات گۆتن: “ژ سالا 2017-2018 ڤە کو ئێدی پێویستیا گەل ب مە نەمایە، ئەم گاڤ ب گاڤ ھێزێن خوە ژ وارگەھێ ڤەدکشینن.”

ھەپەگێ د داخویانیا خوە دە وھا گۆت: “مە ھێزێن خوە ژ وارگەھا پەنابەرێن سییاسی یێن باکورێ کوردستانێ ئانکو مەخموورێ ڤەکشاندن. رێڤەبەریا تەڤگەرا مە دەستنیشان کر کو ھێزێن مە ل ور ئەرکا خوە ب داوی ئانیە و بریارا ڤەکشاندنا ھێزێن مە ژ مەخموورێ دایە. مە ڤەکشینا ھێزێن خوە یێن ھەپەگێ و یەژا ستارێ گاڤ ب گاڤ ب داوی کر. ژ نھا ڤە ھێزا مە ل وارگەھا پەنابەران یا مەخموورێ نەمایە.”

ھەر وھا د داخویانیێ دە ھاتە گۆتن کو “ژ بۆ ڤەکشینا ھێزێن مە یێن پاراستنا گەل ژ ھەرێما مەخموورێ بەر ب ھەرێمێن پاراستنێ یێن مەدیایێ ڤە چ داخواز ژ چ ھێزەکێ نەھاتیە کرن و ھێزا مە ب بریار و ئیرادەیا تەڤگەرا مە ژ وێ ھەرێمێ ڤەکشییایە.”

پشتی ڤێ داخویانیێ موراد قارایلان ژی داخویانی دا. د بەردەوامیا ئاخافتنا خوە دە دیار کر کو وان ئەڤ بریارە ب ئینسیاتیفا خوە گرتیە و وھا گۆت: “نھا گەریلایێن ئازادیا کوردستانێ ل ور رۆلا پێویست گێرا و ئەم نھا ئەرکا پاراستنا وارگەھێ رادەستی جوانێن ل ور دکن.”

داخویانیا قارایلان و ھەپەگێ ب کورتاسی وھا بوو. دبێژە بێی داخوازا کەسی/ھێزەکی ھەپەگە و رێخستنا وێ یا ژنان یەژا-ستار ڤەکشیان.

داخویانیا ھەپەگێ ڤێ ئاخافتنا وان “ئەم ژ شەنگالێ ڤەکشیان” تینە بیرا مرۆڤان

پێڤاژۆیێن دیرۆکی نیشان ددن کو داخویانیێن پەکەکێ و پێکھاتەیێن وێ گەلەک جاران راستیێ نیشان نادن و راڤەکرنێن وان نە جھێ پێباوەرییێ نە. داخویانیا ھەپەگێ یا کو ئەم ژ وارگەھا مەخموورێ ڤەدکشن، راڤەکرنا کەجەکێ یا “ئەم ھێزێن خوە یێن لەشکەری ژ شەنگالێ ڤەدکشن” ئانی بیرا مە. کەجەکێ د 23 ئادارا 2018 دە داخویانیەک دا و دیار کر کو ھێزێن خوە ژ شەنگالێ ڤەکشاندینە. لێ ئەڤ تەنێ ژ بۆ بکارئانینا ھندەک پەیوەندیێن فەرمی و خاپاندنا رایا گشتی بوو. پەکەکە و پێکھاتەیێن وێ یێن لەشکەری چ جاران ژ شەنگالێ دەرنەکەتن. بەرۆڤاژی ڤێ یەکێ، پشتی کو گۆتی ئەم ڤەدکشن، “پەکەکێ چیایێ شەنگالێ کوون-کوون کر خەندەک و تونەل لێ چێکرن و ئەڤ کار ھێژ ژی بەردەوامە.  پەکەکێ ھەموو خەباتکارێن خوە ئەرکدار کرن کو  ئێزدیێن شەنگالێ وەکە پێشانگەھەکێ بکاربینن. پەکەکە ژ شەنگالێ دەرنەکەتیە و قەد دەرناکەڤە ژی. شەنگال نھا وەکە مەرتالا زندییە د دەستە پەکەکێ دە شەرێ ب وەکالەت ل ور دمەشینە.

ھەپەگە چما ھات وارگەھا مەخموورێ؟

ھەیا کو مرۆڤ ئەرک و ئارمانجێن پەکەکێ یێن مەخموورێ ئاشکەرە نەکە نەزانیت ئەڤ گۆتنا ڤەکشینێ ژ کو دەرکەتییە. ژ بەر کو وارگەھا مەخموورێ نە جھەکە کو پەکەکە پاراستنا گەل لێ بکەیە. پەکەکە ل کامپا مەخموورێ ل گۆر ستراتەژی و ئاژەندەیا دەولەتا ئیراق و ئیرانێ وەکە ئەرکدار لێ دمینە.

پشتی ئێریشا چەتەیێن داعشێ یا سالا 2014 نشتەجییێن وارگەھی کۆچی دەڤەرا ناڤبەرا رانیا و قەلادزێ کر. تێ زانین کو وێ دەمێ ھەم یەنەکێ و ھەم ژی پەدەکێ گەلەک پێشنیاری پێشکێشی پەکەکێ کربوون کو ھەرێمێن ئەولە ژ بۆ گەلێ مەخموورێ پەیدا بکن. لێ پەکەکە وێ دەمێ لگەل ئیران و حکوومەتا بەغدایێ دە د ناڤا پەیوەندیێ دە بوو و پێشنیارەکا وان یا جودا ھەبوو. کامپا مەخموورێ د ناڤ سینۆرێن نەخشەیا پرۆژەیا ھەیڤا شیعەیا ئیرانێ دە جھ دگرە. ژ خانەقین ھەیا کەرکووک، مەخموور، مووسل و شەنگالێ پەکەکە وەکە جەحشێن پرۆژەیا ھیلالا زێرین ھاتە ئەرکدار کرن.  وارگەھا مەخموور وەکە راواستگەھەکا ڤان ھێزان ھاتە بکارئانین.

ل گەل ھەموو نەرازیبوونێن گەل یێن وێ دەمێ ژی پەکەکێ گەل ڤەگەراندن کامپێ و ھێزەکا لەشکەری یا مەزن ژی ل ور جھ کر. ب تایبەت د دەما داگیرکرنا کەرکووکێ یا سالا 2017 پەکەکێ ھەموو ھێزێن خوە ل سەر خەتا تووزخورماتو ل کامپا مەخموورێ ب جھ کرن.

   پەکەکە ڤەنەکشیا، ئارتێشا ئیراقێ ھات

سەرۆکوەزیرێ وێ دەمێ حەیدەر عەبادی و جەنەرالێ ئیرانێ قاسم سلێمانی سۆز دابوو پەکەکێ کو ھێزێن مەخموورێ مینا یەبەشێ یا شەنگالێ تەنزیم بکە. واتە ل گۆرەیی  ڤێ پرۆژەیێ پەکەکێ دخوەست ل مەخموورێ چەکدارێن کەڤن و جوان بکە بەشەک ژ حەشدا شەعبی و خوەدی مووچە.

پشت رە ژی ئامادەکاریێن ماییندە بوو کەمپێ ھاتن کرن. نھا چیایێ قەرەچۆخێ بوویە ناڤەندا تونەلێن پەکەکێ. خوە تێ زانین کو پەکەکێ ل چیایێ قەرەچۆخ ب کیلۆمەترەیان تونێل کۆلانە.

مەخموور ژ بۆ پەکەکێ وێستگەھەکا گرینگە. ژ سلێمانی – کەرکووک – مووسل – شەنگال بۆ ڤەگوھەستنا شەرڤان و جەبلخانەیان راوەستگەھەکا گرینگە. نە تەنێ ئەو، پەکەکە ب رێیا مەخموورێ خەباتەکا بازرگانی یا مەزن دمەشینە. گەلەک ئاگاھی ھەنە کو مادەیێن ھشبەر یێن ژ ئیرانێ تێن، ب سەر رێیا مەخموورێ بوو بەغدا، ھەولێر، مووسل و رۆژئاڤا تێ بەلاڤکرن.

گاڤا مرۆڤ ڤێ راستییا وارگەھا مەخموورێ دگرە بەر چاڤان، تێ دیتن کو نە مومکنە پەکەکە ژ مەخموورێ ڤەکشە. چاڤکانیێن ھەرێمی ئەشکەرە دکن کو پشتی ئێریشێن ڤێ داویێ، پەکەکە ل گەل پێکھاتەیێن شیعە یێن سەر ب ئیراقێ ڤە گفتووگۆ کریە و لھەڤکرنەک د ناڤبەرا ھەر دو ھێزان دە پێک ھاتیە. ل گۆری ڤێ ل سەر سێ خالا گھشتنە رێکەفتنێ:

1. 1. پەکەکە دێ ل ھندەک چەپەرێن خوە یێن ل بەرۆژێ چیایێ قەرەچۆخێ، ل نێزی کامپا مەخموورێ ئالایێ ئیراقێ دالقینە.

2. 2. ئارتێشا ئیراقێ دێ ل بەر دەریێ کامپێ و دەردۆرا وێ ل دەشتێ ب جھ ببە، لێ ناچە چییایێ قەرەچۆخ.

3. 3. کارمەندێن لەشکەری یێن پەکەکێ دێ ھاتنووچوونا کامپێ کێم کن.

4. 4. کادرۆیێن پەکەکێ دێ ل کامپێ بمینن.

ئەڤ خالێن رێکەفتنێ ڤێ یەکێ نیشان ددن؛ ھەپەگە ژ کامپێ ڤەنەکشیا، تەنێ ئارتێشا ئیراقێ دێ ھەبوونا پەکەکێ یا ل کامپێ د ئاستەکی مەعقوول دە بهێلە. گەلۆ چما پەکەکە مەجبوور ما کو بریارەکە وھا بدە؟

 بوویەرا دلۆڤان ئیشلەک و بەرتەکا گەل

د 17 جۆتمەھێ دە ل ھەرێما چنارۆک یا کۆیێ وەلاتیێ ب ناڤێ دلۆڤان ئیشلەک د ترۆمبێلا خوە دە ھاتە بۆمبەبارکرن. دلۆڤان ئاژۆکارەکی سڤیل بوو، لێ د ترۆمبێلا وی دە کادرۆیێن پەکەکێ ھەبوون. ھەر سێ ئەندامێن پەکەکێ د ڤێ ئێرشا درۆنا ترکییێ دە ب ساخی فلتین لێ دلۆڤان ژییانا خوە ژ دەست دا.

لێ ئەڤە بوویەرەکا پر تەڤلیھەڤ بوو. ژ بەر کو د ترۆمبێلێ دە ژنا ب ناڤێ کوردستان کو بەرپرسا ھێزێن لەشکەری یێن پەکەکێ یێن مەخموورێ بوو ژی ھەبوو. ئەڤ کارمەندا ژن یا پەکەکێ یەکەم جار د 7 جۆتمەھێ دە بوو ئارمانجا درۆنا. ئەو بێ زیان ژێ خلاس بوو. ھەمان ژن د 13 جۆتمەھێ دە دیسا ئارمانج ھات گرتن. ڤێ جارێ ژی ب سڤکی بریندار بوو و ئەو راکرن نەخوەشخانەیا سلێمانیێ.

ئەڤ کارمەندا ژن دیسا د ترۆمبێلا دلۆڤان ئیشلەک دە بوو. واتە د ناڤ دەھ رۆژان دە 3 جاران ھەمان ژنا پەکەکەیی ھات ئارمانجکرن. ل گەل ڤێ یەکێ ژی پەکەکێ گەل کر قوربانێ ڤێ خەباتکارێ. دلۆڤان ئیشلەک ل گەل دایکا خوە ژ بۆ ڤان کارمەندێن پەکەکێ بوون مەرتالێ زندی.  پشتی ڤان ھەموو ئێرشان خەلکێ مەخموورێ ژ پەکەکێ پرسی گەلۆ چما ئەڤ ژنە ئەو قاسی تێ ئارمانج کرن. بێ گومان ئاگاھییێن دەربارێ ڤێ خەباتکارا ژن دە ژ ناڤا پەکەکێ بۆ ترکان دچن.

قەتلکرنا دلۆڤان ئیشلەک ژ بەر رەفتارێن بێبەرپرسیاری یێن پەکەکێ د ناڤ رایا گشتی دە بوو سەدەما کارڤەدانەکا مەزن. د ناڤا کامپێ دە کۆمەک جەماووەری یا سەرەکی یا پەکەکێ ھەیە. ب گشتی ئەڤ کۆمە داخویانییێن مەدیایی بەلاڤ دکە. لێ ژ بلی ڤان، ل کامپێ خەلکێ ژ کریارێن پەکەکێ بێزار بوویی ژی دەنگێ خوە بەرز دکن.  ڤێ جارێ خەلکێ بێزار ب گشتی ل دژی پێکھاتەیا لەشکەری یا پەکەکێ راوەستیان و ھەلوەستەک توند نیشان دا.

ژ بەر کارڤەدانا خەلکی، پەکەکێ لگەل دەولەتا ئیراقێ ل ھەڤ کر و دەستوور دا ئارتێشا ئیراقێ کو دەرباسی ھندەک جهێن کامپێ ببە. واتە پەکەکە ژ وارگەھێ مەخموورێ دەرنەکەتیە، تەنێ ڤێ جارێ ئارتێشا ئیراقێ ژ بۆ ڤەشارتنا ھەبوونا پەکەکێ ل ور ب جھ بوویە.