بووبێ ئەسەر
وەکھەڤی تشتەکی خوەش و دەلالە. وەکھەڤی تاما ژیانێ بۆ مرۆڤان خوەش دکە. وەکھەڤی عەدالەتە، خوەشییە، زانستی و رندییە. لۆما ژی د جڤاتان دە ھەر گاڤ بەحسا وەکھەڤیێ تێ کرن. ژ بۆنا وەکھەڤی د جڤاتەکێ دە پێک وەرە، گەلەک شەر و بەرخوەدان، سەریھلدان و بەدەلدایین دبە. ژ بەر ڤێ یەکێیە کو ژ رۆژا وەلاتێ مە ھاتیە پەرچەکرن و ھەتا نھا مە کوردان داخوازا وەکھەڤیێ ل داگیرکەرێن خوە کریە کو ئەم ڤێ د وەلاتێ خوە دە پێک بینن.
وەکھەڤی چیە ؟ وەکھەڤی نە ئەوە کو ھەمی جل و بەرگێن مرۆڤان یەک بن. وەکھەڤی نە ئەوە کو ھەمی کەس ب یەک رەنگی بن. وەکھەڤی نە ئەوە کو ھەمی کەس د ھەر حال و رەوشان دە یەک بن. وەکھەڤی نە ئەوە کو ھەرکەس وەکە ھەڤ بفکرن. وەکھەڤی ل سەر بنگەهێن مرۆڤاھی و عەدالەتەکا دروست پێک تێ.
وەکھەڤی دەما مرۆڤ ژ دایکا خوە دبە، وەکە ھەڤ تێنە دنێ. واتە ھەر ئینسانەک رویس ژ دایکا خوە دبە. ژ بلی وێ وەکھەڤی رەنگ دگوھەرە و ئەو رەنگ ل جڤاتێ تێ بەلاڤکرن. لەوما ئەڤە د رێبازا بارزانی دە ھاتیە دەستنیشانکرن کو دڤێت ئەم ڤی رەنگێ وەکھەڤیێ باش فێر ببن دا کو ئەم وێ د جڤاتا خوە دە، د وەلاتێ خوە دە پێک بینن. پێکبینن دا کو ئەم بکاربن ڤێ ل ھەر چار پەرچێن کوردستانێ ب جھ بکن.
وەکھەڤی، عاقلە، وەکھەڤی مەژییە، وەک ھەڤی نەرین و رامانە. وەکھەڤی باوەری و ب کارئانینا عاقلی یە. لەوما ژی بارزانیێ نەمر ئەڤە کرییە خالەک ژ خالێن رێبازێ دا کو گەلێ وی، خەلکێ وی ڤێ ب ئاوایەکی ژ خوە باوەر و ب رێیەکا دروست ب کار بینە. بارزانیێ نەمر باش ل سەر ڤێ راوەستیایە دا کو گەلێ وی ڤێ ب زانستی پێک بینە. ژ بەر کو وی خوەستیە گەلێ وی وەک ھەڤ بژی. خوەستیە وەکھەڤیا کو ژ دروستیێ پێک تێ د ناڤا گەلێ وی دە جھێ خوە بگرە. وی خوەستیە کو وەکھەڤیا کو ژ بۆ گەلێ وی لازمە پێک بینە.
بارزانیێ نەمر ئەڤ خالە د ژیانا خوە دە پێک ئانییە. وی ئەڤە پێک ئانیە دا کو ژ بۆی مە ببە میناک، ببە نموونە. لۆما دەما د سالا 1946 ل رۆژھلاتێ کوردستانێ ژ بۆنا ئازادیا گەلێ کورد تەڤگەر و سەریھلدانا ل دژ داگیرکەرێن ئیرانێ پێک ھاتی. بارزانیێ نەمر ل ور ل با قازی محەمەد جھێ خوە گرت و مل ب مل ژ بۆنا ئازادیا گەلێ خوە شەرێ رزگارکرنا کوردستانێ دا. ژ بەر کو ژ بۆنا وی کیژان پەرچێ کوردستانێ بھاتا ئازادکرن فەرق نەدکر. ژ بۆنا وی ھەمی پەرچێن کوردستانێ یەک بوون. لێ تەنێ دژمنان ئەو ژ ھەڤ جودا کربوون. ژ بەر کو وی دزانی بوو کو ئازادیا پەرچەکی دکار ببە دەستپێکا ئازادیا پەرچێن دن ژی.
ئاھا وەکھەڤیا کو د رێبازا دە ھاتیە دەستنیشانکرن ئەڤە. واتە ژ بۆنا کورد ل سەر ئەردا خوە ل گۆر زانین، ھێز، قاوەت و عاقلێ خوە وەکھەڤ بژین، ئەڤ خال کریە خالا ڤێ رێبازا پیرۆز. ھەر وەھا وەکھەڤیا د رێبازێ دە ھاتیە دەستنیشانکرن کو دڤێت ملەتێ کورد ل گەل ھەڤ وەکە برا بژین. دڤێت ھەرکەس بکاربن خوەدی ل مافێ خوە خوەدی دەرکەڤن دا کو تادە و زلم ل هندەکان نەیێ و ھندەک ژی ل سەر سەرێ گەلێ خوە نەبن دەستھلاتەکا بێ عەدالەت و دەمۆکراسی…
ھەلبەت د ڤێ خالا وەکھەڤیێ دە دڤێت ھەر تشت وەکە ھەڤ بن، تونەیە. ژ بەر کو بارزانیێ نەمر زانیبوو کو ھەر تشتێن هەیی نابن وەکە ھەڤ. لێ ھندەک تشتێن کو دڤێت مرۆڤاھی وەکە ھەڤ ب وێ و وان بژین ھەنە. لۆما د رێبازێ دە تشتێن کو ھەنە دڤێت ل گۆر مرۆڤان کار و خەباتێن وان، ل وان بێنە پارڤەکرنێ. واتە تە ب کار و خەباتا خوە، ب جھد و بەرخوەدانا خوە چ حەق کر ئەو حەقێ تەیە. کەسێن دەستدرێژیا وی حەقێ تە بکن، دڤێت بێ بەرسڤ نەمینن. لۆما د ڤێ خالا وەکھەڤیێ دە، مافێ کەسان خوارن، زلم و تەعدا ل کەسان کرن تونەیە. کێ چ حەق کربە دڤێت ببە خوەدیێ وێ.
ژ بەر ڤێیە کو داگیرکەرێن مافێ کوردان ب زۆرێ ژ وان ستەندیە، سەر ئەرد و بن ئەردێ وێ ئاخا پیرۆز دخون کو ب قاسی مسقالەکی نادن کوردان. مادەم ھەر مللەتەکێ مافێ خوە ھەیە کو ھەرکەس وەکە ھەڤ ل سەر ئەردێ خوە ب ئازادی بژین. دڤێت ئەڤ مافە ژ بۆ کوردان ژی ھەبە. ژ بۆنا ملەتێ کورد ژی وەکە ھەمی مللەتان بکاربە ب ئازادی ل سەر ئەردێ خوە بژی ئەڤ خال ھاتیە دەستنیشانکرن.
دڤێت ئەم کورد و ب تایبەتی جوانێن بارزانیان ڤێ رێباز و خالێ باش فێر ببن. فێر ببن و بزانبن کو ژ بۆنا مە کوردان کوردستان یەک پەرچەیە و دڤێت ھەرکەس ئانکو ھەر کورد ژ چاڤێن خوە پتر ڤێ دەستکەفتیا ھەیی ئانکو باشوور کوردستانێ بپارێزن. خوەدی لێ دەرکەڤن. ژ بۆنا خورتبوون و دەمۆکراسیا وێ خەباتێ بکن. ب ڤێ ژی دڤێت مرۆڤ واتە کورد ڤێ خالا پیرۆز کو د رێبازێ دە ھاتیە دانین، پێک بینن دا کو وەکھەڤیا گەلێ خوە بپارێزن.
دەما تە ئەردێ خوە یێ داگیرکری ژ دەستێ داگیرکەران دەرخست. مللەتێ تە دێ ل سەر وی ئەردی ب ئازادی بژی و ھەرکەسێ ل گۆر زانین، قاوەت و خەباتا خوە ببە خوەدی ماف و حەق.، ئاھا تو، ئەز و ئەم دێ بزانبن کو رێباز چیە و ژ بۆنا چ ئەڤ ژ رۆژا بارزانیان دەست ب تەکۆشینا ئازادیا کوردستانێ کرنە، پێک ئانینە و تینن.
ھەگەر مرۆڤ وەکھەڤیا گەلێ خوە ل ھەرچار پەرچان بخوازە، ھەگەر تو دخوازی ئازاد، رەحەت و ئارام ل سەر ئەردێ خوە بژی. ھەگەر تو دخوازی ب ھەڤرە ل سەر ئاساسێ وەکھەڤیا راست و برانە، ژیانا خوە بدۆمینی دڤێت تە ھای ژ رێبازا خوە و ڤێ خالێ ھەبە…
