رۆژا 7/10/2023 ژ دەڤەرا غەززەیێ رێخستنا حەماسێ د دیرۆکا خوە دە ئێریشا ھەری مەزن بر سەر ئیسرائیلێ. نێزکی 1400 کەس ھاتن کوشتن، زێدەیی 200 کەس دیل ھاتن گرتن و زیانەک مەزن ل ئیسرائیلێ دا. ھەتا شکاناندنا روومەتا دەزگەھێ ئەولەھیا ئیسرائیل بوو جھێ گۆتوبێژەک بەرفرەھ. د ناڤ کوشتیا و کەسێن دیل ھاتین گرتن دە، ژن، زارۆک ھەنە پرانیا وان خەلکێ سڤیلن.
پشتی ڤێ ئێریشێ ئیسرائیلێ بەرسڤ دا و ب توندی ئێریشێ دەڤەرا غەززەیێ کر، ب ھەزاران ئاڤاھی خرابکرن و ب ھەزاران کەس ھاتن کوشتن و دەھان ھەزار ئینسان کۆچبەر بوون. ئەڤ شەرە ھێژان بەردەوامە و کەسەک نزانە دێ داویا ڤی شەری بگھێژە کو دەرێ. ھەتا دکارە ببە سەدەمێ شەرەک ھەرێمی و وێدەتر ژی ببە سەدەما شەرەک جیھانی ژی.
ل گۆرا مەدیایێ ئەڤە دو سالن حەماس ئامادەبوونا ئێریشەکا ب ڤی ئاوایی دکە. لێ ھەرکەس دزانە کو حەماس ب ئیمکانا خوە ب تەنێ نکارە ڤێ ئامادەبوونا ب ڤی قاسی بەرفرەھ بکە. ئیران ل پشتا حەماسێیە و ھەموو ئیمکان ژ بۆ ئامادەبوونا ڤێ ئێریشێ دایە حەماسێ. حزبوللاھا لبنانی پشتگریا حەماسێ کریە و ھەروەھا ھەموو رێخستن و ئالیێن کو د باندۆرا ئیرانێ دە ل ھەرێمێ تەڤدگەرن پشتگریا حەماسێ ژ بۆ ڤێ ئێریشێ کرنە.
ئەڤە دەمەک بوو وەلاتێن عەرەبی و ترکیە پێوەندیێن خوە ل گەل ئیسرائیلێ نۆرمالیزە کربوون. دخوەیە یەک ژ ئارمانجێن ئیرانی جاردن تێکبرنا ڤان پێوەندیان بوو. نھا حالێ حازر دەما مرۆڤ ل ھەلوەستا وەلاتێن عەرەبی و ترکیێ دبینە، دخوەیە کو ئیران گھایە ئارمانجا خوە. لێ ژ ئالیەک دن ھەلوەستا نەتەوەیێن یەکبوویی و وەلاتێن رۆژئاڤا ھندکبەژی لەیزتکا ئیرانێ خراب دکە.
وەلاتێن عەرەبان ڤەکری پشتگریا حەماسێ ناکن. ھەتا رادەیەکی سەرۆکێ فلستنیا مەحموود عەباس ب خوە ژی پشتگریێ نادە حەماسێ و داخویاکرن کو حەماس نوونەراتیا فلستینیا ناکە. لێ بڤێت نەڤێت شەرێ ھەیی جاردن وەک شەرێ ئیسرائیلی و فلستنیا تێ نرخاندن. نە وەک شەرێ ئیسرائیلی و حەماسێ تێ نرخاندن. ئەڤ یەک ژی تێ واتەیا ئیران ھەتا رادەیەکی د سیاسەتا خوە دە سەرکەفتیە.
ھێزێن گرێدایی ئیرانێ ل ئیراق، سووریێ، رۆژئاڤا و باشوورێ کوردستانێ رۆژانە ئێریشێ بنگەھێن ئامەریکایێ و ھێزێن ھەڤپەیمان دکن. نھا ھندەک بەرپرسێن ئیراقی داخوازا دەرکەتنا ھێزێن ئامەریکی و ھەڤپەیمانا ژ ئیراقێ دکن. گەلۆ ئەڤ یەک ببە، دێ جاردن ئیراق نەبە قادا شەرەک بەرفرەھ؟ دێ د ڤێ خالێ دە رەوشا باشوورێ کوردستانێ چەوا بە؟ ئەڤ یەک مژارەک ھەری گرینگە و دڤێ ل باشوورێ کوردستانێ کورد ڤێ بکن بابەتێ سەرەکی. تەدبیرا ھەری مەزن ژ بۆ ڤێ ئەوە کو، کورد د ناڤا خوە دە یەک دەنگبن و تفاقا د ناڤا مالا کورد دە ب ھەمی ئاوایی ئاڤابکن و ب ھێز بکن. ژ بەر کو ژ بۆ کوردا ئەولەھیەتا ھەری سەرەکی پاراستنا دەستکەفتیێن کوردستانی ل باشوورێ کوردستانێ یە.
دەما مرۆڤ پێوەندیا ناڤبەرا کوردا و فلستینایا دە ب کورتاھی بنرخینە، رەوشا ھەیی گەلەکی خەرابە. ژ بەرێ پێدە ئالیێن کورد ھەموو پشتگریا تەڤگەرا فلستینیان دکن. ھەتا رێخستنێن، ئیسلامی، یێن چەپ، یێن لیبرال ھەموو پشتگریا فلستنیان دکن. ژ بۆ چ ڤێ پشتگریێ دکن؟ ھەر ئالیەک ل گۆرا خوە تشتەکی دبێژە. کورد دەولەتبوونا فلستینیا ژی دپارێزن. ھەتا جارا د شەرێ فلستینیا و ئیسرائیلێ دە کوردان ل ئایێ فلستینیا جھ گرتنە و شەرێ ئیسرائیل ژی کرنە. لێ گەلۆ فلستینی ژ بۆ کوردان چ دفکرن؟ ئەڤ یەک گرینگە.
فلستینی وەک وەلاتێن عەرەبان یێن کو کوردستان داگیرکرنە دفکرن. وەک سووریا و ئیراقا سەدام ل کوردا دنێرن. فلستنی دەولەتبوونا کوردا ناپارێزن و ل دژی دەردکەڤن. ھەتا تێ زانین کو کاراسەتا حەلەبچەیێ دە ل تەنشتا سەدام سەکنین و شەرێ تەڤگەرا ئازادخوازا کوردا کرن. لێ ھمبەر ڤێ ھەلوەستا فلستینیا، کورد جاردن ل دژێ فلستینیان تەڤنەگەران و پشگریا تەڤگەرا وان ئا ئازادیخواز کرن.
بێ گۆمان ل سەر رەوش و ھەلوەستا فلستینیان گەلەک تشت ھەنە کو بێنە گۆتن. لێ یا گرنگ ئەوە کو ھەر وەلات و ھەر تەڤگەرەک ل ھەرێمێ و جیھانێ ژ بۆ بەرژەوەندیێن خوە تەڤدگەرە. چ کەس بەرژەوەندیێن خوە ناکن قوربانێ ئالیەک دن.
د ھەر شەرەکی دە، تشتا دلتەزین ئەوە کو تێ سەرێ خەلکەک سڤیل، ژن، زارۆک تێنە کوشتن، خەلک توشی کۆچبەریێ دبە، برچی دمینە و کارەساتێن مرۆڤاتی تینە ھۆلێ. ئەڤ تراژدی دلێ مرۆڤی دئێشینە.
ل ترکیا و باکورێ کوردستانێ، پارتی و ئالیێن سیاسی ترک، کورد، راست، چەپ، ئیسلامی و ھەموو جورەیێن ئایدۆلۆژیێن کو تێنە بیرا مرۆڤ، پرسا فلستین دە دبن یەک دەنگ و ب ھەڤرا پشتگریا فلستینیا دکن. گەلۆ نهێنیا ڤێ چیە؟ ئەگەر ئەڤ یەک بێ ڤەکرن و گۆتوبێژ کرن، بەلکی ببە سەدەمەک کو کورد ژی بکاربن ژ بۆ بەرژەوەندیێن خوە یێن نەتەوی رێیەکی ببینن کو ب ھەڤرە تەڤبگەرن!
