بووبێ ئەسەر
پێکڤەژیان تێگەھەکە د ژیانا مرۆڤاتیێ و یا نەتەوەیاندە گرینگ و واتەدارە. ژ بەر کو د گەلەک وەلاتان دە پر ئۆلی و پر باوەوەری ھەنە کو دڤێت ھەمی نشتەجھێن وەلاتی بکاربن ل گەل ھەڤ ب ھەمی دژبەرێن خوە رە بژین.
ژ بەر گرینگیا ڤێ خالێ بوو کو بارزانیان ئەو وەکە خالەک ژ خالێن رێبازێ دانە زانین کو کورد بکاربن ل گۆر وێ خوە ب رێز بکن، خوە و وەلاتێ خوە ل گەل ھەڤ، ل سەر ئاساسێ نەتەوەیی و کێمنەتەوەیان ب ھەڤرە بژین.
دەما کو ئەم ل کوردستانێ دنێرین دبینین کو ملەتێ مە، خەلکێ مە، کەسێن ل سەر ئەردێ پیرۆز دژین، ب گەلەک ئۆل و باوری نە. ل سەر ئەردێ پیرۆز ھندەک ژ کێمنەتەوێن دن ژی دژین. ب گۆتنەکا دن کوردستانا رەنگین یا پر ئۆلی و کێمنەتەوەیێن جودایە. ژ بۆنا ھەمی کورد و یێن نە کورد، یێن مسلمان و نە مسلمان ل گەل ھەڤ ل سەر ئەردێ پیرۆز ب سەربەستی بژین و وەلاتێ خوە ژ ئێریشێن داگیرکەران بپارێزن ئەڤ خال د رێبازێ دە ھاتیە ب جھ کرن.
بارزانیێ مەزن باش دزانی کو باوەریا ئۆلی تەنھا کەسایەتان ئەلاقەدار دکە، ژ بۆنا کو ملەتێ ل سەر ئەردێ کوردستانێ ژیانەکە ھەڤبەش و ل گەل ھەڤ، ب ھەڤرە بژین، ئەو باش ل سەر ڤێ خەبتیە. لۆما وەکە خالەکا رێبازێ ئەو پێشکێشی گەلێ خوە کرییە.
ژ بەر کو بارزانیێ مەزن خوەدی تەجروبەیەک درێژ بوو. وی ملەتێ خوە، مرۆڤێن ل سەر ئەردا کوردستانێ ل گەل دۆست و دژمنێن خوە ژی باش ناسدکر. ھایا وی ژ ھەمی رەنگ و دەنگێن ل کوردستانێ ھەبوو. دزانیبوو کو ملەتێ کورد پر ئۆلی و خوەدی گەلەک باوەریانە. وی دزانیبوو کو ھندەک کێمنەتەوە و ھندەک ژی یێن نە کورد ل کوردستانێ دژین، ھەنە. ژ بۆنا کو پێکڤەژیانەکا مایەندە د ناڤا کوردان و نە کوردان، د ناڤا یێن مسلمان و یێن نە مسلان دە، پێک بینە خالا پێکڤەژیانێ ئانکو ل گەل ھەڤ ل سەر ئەساسێ وەکھەڤیەک دەمۆکرات ژیانەکا مایندە ل کوردستانێ بخولقینە ئەڤ خال ژ بۆنا مە دەستنیشانکرییە و پێشکێشی گەلێ خوە کرییە.
مرۆڤ دکارە بپرسە: گەلۆ بارزانیێ مەزن چما ئەوقاس گرینگی دایە ڤێ خالێ؟ بەرسڤ پر زەلال و ڤەکرییە. ژ بەر کو ئەو بکاربە مللەتێ خوە یێ پر ئۆلی ژ بۆنا دۆزا کوردستانێ د بن یەک کۆنی دە بپارێزە ئەڤ خال ئانییە. ل گۆر ڤێ رێبازێ، ئەو کەسێن نە کورد و کورد، ل گەل ھەمی ئۆل و باوەریێن خوە، چ دبە بلا ببە، ھەگەر ژ وەلاتێ خوە حەز بکە، ھەگەر ژ بۆنا وەلاتێ خوە تەکۆشینا ئازادیا وی بدە، ئەو دبە پارێزگەرەکی وەلاتێ خوە کو دڤێت ھەمی رێ ژ رە بێن ڤەکرن.
دەما ئەم ل تەڤگەرا بارزانیان دنێرین کو وان ب خوە ئەڤ خال د ژیانێ دە پێک ئانینە. پێکانینا وێ ژی دەما ئەم ل رەوشا پێشمێرگەیان دنێرین کو ژ ھەر ئۆل و باوەریێ، پێشمەرگەیێن ژ بۆنا وەلاتێ خوە تەکۆشین دانە و بوونە جان گۆری ھەنە.
دەما کو ئەم ل تەڤگەرا بارزانیان دنێرین دبینین کو ژ ھەمی ئۆل و باوەریان بەرپرسێن دام و دەزگەھان و یێن پێشمێرگەیێن قەھرەمان ھەنە. ئەم دبینین کو ھێزا پێشمێرگەیێن قەھرەمان ژ رۆژا ئەول دە، نە تەنێ ژ ئۆلەکێ ئان باوەریەکێ پێک ھاتیە. ئەڤ ب مە ددە زانین کو خالا پێکڤەژیانێ ژ رۆژا بارزانیان دەست ب شۆرەشا ژ بۆنا ئازادیا کوردستانێ کرنە، ئەڤ خال ژی ب ڤی رەنگی دانە زانین.
ژ مسلمانان بگرن ھەتا مەسیحیان د ناڤا بارازانیان دە وەکە ئەندام ئان بەرپرسێ پەدەکێ و ھەمی ھێز و باوەریێن خوە ل ھەمبەر داگیرکەران شەرێ ئازادی و سەرخوەبوونا کوردستانێ دانە. د شەر و تەکۆشینا خوە دە چ ئەندام ئان پێشمەرگەیان ژ بۆنا باوەریێن شەخسی و ئۆلی ب ھەڤ نەکەتنە و ل دژی ھەڤ شەر نەکرنە.
ژ بەر ڤێ خالا پیرۆز بوو کو پێشمێرگەیێن بارزانیێ نەمر ژ چ ئۆل و باوەریێ بان فەرق نەدکر. ژ بەر کو ھەرکەسێ خوە وەکە پارێزگەرەکی/ێ کوردستانی دزانیبوون. ژ بۆنا خوە ئازاد بکن تم مل ب مل ل گەل ھەڤ شەرێ ئازادیا کوردستانێ ددان و دانە.
خوەشبوون و گەشبوونا مللەتەکی ئەوە کو ھەمی رەنگ، دەنگ و باوەریێن ئۆلی بکاربن ل گەل ھەڤ ژ بۆنا پاراستنا وەلاتێ خوە کار بکن. ژ بۆنا وێ ژی کەسێن خوە کورد دزانن دڤێت کار و ھەلوەستێن خوە ل گۆر ڤێ خالێ دەینن. کەسێن نە کورد و نە مسلمان ژی دڤێت بزانبن کو ب سایا ڤێ خالا رێبازا پیرۆز، ھەرکەس دکارە ب ئازادی و د وارێ دەمۆکراتیک دە ل گەل ھەڤ ل سەر ئەردێ پیرۆز بژیت و مافێ ھەرکەسێ ھەیە کو خوەدی یەک ماف بن.
ئەڤ خالا پیرۆز ئیرۆ ل کوردستانا ئازاد ئانگۆ ل باشوورێ کوردستانێ د ھەمی قادا ژیانێ دە پێک تێ. ھەرکەسێ ئۆلدار ل گۆر باوەریا خوە ئاڤاھیێن خوە دادمەزرینن و عیبادەتێن خوە ب سەربەستی و ئازادی دکن. ژ بۆنا ھەر کێمنەتەوەیێن ل کوردستانێ مافێ وان یێ ب زمانێ خوە پەروەردەیی ببینن ھەیە. ھەرکەسێ ل سەر ئەردێ ئازاد و پیرۆز دژیت مافێ وییە کو ببە دەستھلات، ماف ژی هەیە رێبەری و سەرۆکاتیا گەلێ خوە بکە.
ژ بەر کو خالا پێکڤەژیانێ، ژیان ب خوەیە. ھەبوونا مللەتێ کورد، پاراستن و خوەدی لێدەرکەتاندنا ھەرکەسانە کو وەلاتێ خوە کوردستانا شرین ل ھەمبەر ھەمی داگیرکەران بپارێزن و خالا پێکڤەژیانێ ل گەل ھەڤ پێک بینن…
