ده‌وله‌تا ترك بیلانچۆیا زرارێن جانی یێن په‌كه‌كێ یێن 8 سالان ئاشكه‌ره كرن و گۆت كو ژ تیرمه‌ها سالا 2015ان ڤه، 39 هه‌زار چه‌كدارێن په‌كه‌كێ هاتنه كوشتن!.
وه‌زاره‌تا پاراستنا نه‌ته‌وی یا تركیێ ئیرۆ رۆژا پێنجشه‌می 2/11/2023 بیلانچۆیا زرارێن رێخستنا په‌كه‌كێ ئاشكه‌ره كر و گۆت كو «ل باکورێ ئیراقێ و سووریێ ژی تێ دا د هەفتەیا داوین دا 87 چه‌كدارێن په‌كه‌كێ هاتن كوشتن. ژمارا چه‌كدارێن په‌كه‌كێ یێن د ئیسال ده هاتنه كوشتن دەرکەت 1802یان، ژ 24ێ تیرمەها 2015ان هەتا نها ژی 39 هەزار و 145 چه‌كدار هاتنه كوشتن».
هه‌ر وها ده‌ستنیشا كر، د ئۆپه‌راسیۆنا پەنچە کلیتێ یا ل باکورێ ئیراقێ دا هەژمارا چه‌كدارێن هەتا نها هاتنە كوشتن دەرکەت 630ان.ژ هێلا خوه ڤه رێخستنا په‌كه‌كێ ژی هه‌ر رۆژ و مه‌هـ بیلانچۆیێن شه‌رێ خوه یێ ب ئارتێشا تركیێ ره پارڤه‌دكه و هه‌ر رۆژ دبێژه مه ب ده‌هان عه‌سكه‌ر كوشتنه.
ده‌وله‌تا ترك و په‌كه‌كه هه‌ر ل ناڤبه‌را چه‌ند رۆژان بیلانچۆیا زرارێن هه‌ڤ رادگهینن، هه‌ر یێك دبێژه مه ئه‌وقاس كوشتنه، لێ هه‌ردو ئالی راست نابێژن و ڤێ وه‌كه شه‌ره‌كی تایبه‌ت ل دژی هه‌ڤ دمه‌شینن و یێ كو زرارا راستین ئا ڤی شه‌رێ بێ واته دده، گه‌لێ باشوورێ كوردستانێ یه.
